Journalist vanga party inbeihna

Tun hnai lawka journalist pakhat laka rorel lai party mi ṭhenkhat chet dan leh a nupui zirtirtu transfer tih vel thu a darh chiam a. A zialo ka ti hle mai a. Assembly budget session neih mekah pawh sawi chhuah a ni a, a bik takin MNF MLA hovin a thlavang an rawn hauh viau mai.

Journalist-te hi pawl, sakhua, political party leh thil dangah pawh ni se, ṭan bik leh ṭan loh bik nei lo tura ngaih an ni ṭhin a. Mahse, chutiang chu an ni vek hauh lo. USA-ah a ni emaw, India ramah pawh ni se, journalist-te leh media house-te hian political party-ah ṭan bik leh âwn lam an nei ve fo a, thil nihphung pangngai a ni.

Mizorama kan journalist-te hi ka hre ve nual a, ka hriat miah loh pawh tam tak an awm ang. Mizoramah pawh kan journalist-te zingah political party âwn lam nei te, political party-a tel a, chanvo eng eng emaw chelhte pawh an awm niin a lang. Hei hi tun hnai thil ni lovin, tun hma aṭangin a ni tawhin ka hria. Chutih rualin, journalist-te zingah party âwn lam nei leh party-a inhmang an awm ṭhin rual hian, an zavai erawh chuan an ni lo va, party-a awmna nei lo leh ṭan bik nei lo tam tak an awm a. An zingah political party-a inhnim phûm chu a tlem zawk daih an ni awm e.

Sawi tawh angin, Mizorama kan journalist-te hi ka hre ve nual a. Tuna MNF hovin an phûlpui tak chiam Aizawl DDK reporter pakhat pawh hi hun rei tak chu ka lo râlhriat ve tawh a. MNF-ah a inziah luh leh ziah luh loh chu ka hre lo va, mahse, a MNF hle tih an sawi chu ka hre fo.

A nupui, sawrkara zirtirtu hna thawk chu amah journalist avangin thingtlang khaw hla takah an sawn niin a lang a. Hei hi a pawi ka tihpui khawp mai a. Anni tan chuan a na ve duh hle ang tih ka ring. Mahse, an sawn takah chuan a âwm ve viau thovah ka ngai. DDK Reporter hian a cho chhuak niin ka hria. A chhan chu, journalist a ni a, âwn lam nei lo tura ngaih a ni. Chumi piah lamah, sawrkar media (DDK)-a thawk a ni leh zel a, DDK-a thawk a nih avang ringawt pawh hian party-ah âwn lam nei lo lehzual tura ngaih a ni.

Mahse, âwn lam a nei tlat a, tun hma deuh aṭang tawhin a MNF zia hi social media-ah hmuh tur a awm ṭhin a ni. ‘Pu Ruatkima uite’ tih ṭawngkam te pawh a awm. A MNF em avang hian MNF lamin an vuipui nasa a, Congress erawh chuan an party ṭantu a nih loh avangin an vuipui ve viau hauh lo thung a nih hi.

Engpawhnise, kan journalist-te hi mi tam takin kan dah sang a, an lakah mipiu beisei pawh a sang a, social media vela inla journalist ve em em ringawtte ai chuan kan dah sang hle. Chuvangin, journalist-te pawh hi journalist nih dan tur ang takin, bias hauh lova an awm ve a ngai a, ṭan la sauh sauh turin duhsakna ka hlan a ni.

- Lalhlanpuia