RIMAWI RAM

Mizoramah hian Sairang thlenga Rel a lo luh tak avangin ram dang aṭanga Mizorama rawn zin an tam tak thu chanchin tharahte kan hre ṭhin a, Hman ni chu, mikhual thlen nana khualbuk siam ve, kan naute ka hmu hlauh mai a, an khualbukah chuan ram dang aṭanga mikhual lo kalte thleng duh an tam avangin, room an inchan loh thu mi an hrilh mawlh mawlh mai bawk a. A lawmawm hlein ka hria. Kan naute hnenah chuan, ram pawn mi lo zinte, chuan Mizoramah "Engti turin nge an rawn kal ber?" tiin ka zawt a, An ni chuan, kan ram mawina a lan theihna hmuna thlir leh hmun hmingthang deuhte tlawh a ni berin an sawi a ni. Chu bakah, India rama State ralmuang ber boruak rawn hip ve duhte pawh an awm a ni awm e.

A dik viauin ka ring a ni, ram dang leh hmun dang aṭanga Mizorama rawn zinte rawn zin chhan tam ber chu, kan ram mawinate hmuh an chak a ni ngei ang, Hmun hmingthang, hmun chakawm erawh chu, mi ramte angin kan nei vak si lo a, Kan ram mawina "Rimawi ram" hi a ni, hmuh an chak ber tur chu, Chuvangin, kan ram hi engtin nge ram dang mite hmuh chakawm tura kan chei zel ang tih hi kan ngaihtuah a ngai ta hle a ni. Mizoram hi Pathianin mawi tak maiin a lo duang sa hrim hrim mai a, Ram dang tam takte ang lo takin sik leh sa thu-ah pawh, lum lutuk lo leh vawt lutuk loin a siam a, Thing leh mau, thlai eng pawh, ṭhat duhna niin, kumtluana ram hmul pangpar chi hrang hrang an par vul chukna ram a ni, Nungcha tinrengte lah chu hlim em emin, an hram chuah chuah mai bawk si a. Kan hranghlui hla phuah thiamte pawhin engtin nge a lo chawi kha Vankhama chuan, "Kan Zoram rimawi ram leh thiang karah, Herse, khiang par leh ngiau par rimin min thawi, Lunglen zual tukram chul hlui fan ni hian, ṭhuva di zun zaiin nemten lo awi" a lo ti reng a ni. Liandala pawhin," Kan tlang ram par vulna, ṭhal khua eng riai romei karah, Lenkawl turni nem duai, Zai tin ri mawi an chiar nghian e" tiin. Heng hla pahnih aṭang ringawt pawh hian kan ram mawizia chu a hriat theih mai awm e.

He ram mawi tak leh nuam tak hi Mizote hian duat taka enkawl loin chhuanmang rorel an sawi ang maiin, Mizote hi kan ramah hian kan sapatal chiam chiam mai a, Kum tinin ram zau tak tak kan tikangin kan tichereu nasa hle mai a nih hi. Tun hma aṭangin duat takin lo enkawl ni ila chuan, Tun lai hunah pawh, ram dang mite tan pawha hmuhnawm tham a ni tur a ni a. Mizoten sum leh pai tam tak lakluh nan kan hmang mai tur a ni a. Nimahsela, tunah chuan kan ram hian a mawina a hlauh nasa em em tawh a, Rokunga'n "Hnam lungmawl tual kan lenna, Vangkhua hmun hi sang mah se, Lung kan mawl e, rairah riang", a lo timathlawn loin, kan ram kan tih chereu nasa lutuk hi chu, kan mawl vang tih loh rual chu a ni lo a ni. A pawi ngawt mai, Tunah kan ram mawina hmangin sum lak luhna kawng a rawn inhawng leh ta si a nih hi.

Hawh teh u, tunah pawh hian khua a la tlai lutuk lo a nia, Zofate hi harhin i tho teh ang u, kan ram mawi tak, Mizoram siam ṭha leh turin, kan ṭanrual chuan rei loteah Rimawi ram hi a par vul leh mai dawn a ni. Kan ram hi a tichereu zawnga sapatal tawh loin, Mi tinten kan ram ro hlu thing leh maute leh nungchate duat takin enkawl ila, kangmei lakah i veng fimkhur tlat teh ang u, Huan lo ram hal tur neite pawhin mei lam sial hmasa phawtin hal ila, ram kan lo tikang palh a nih pawhin, kan pi leh pute tih dan ang khan, a kan zau hmain ṭhelh ngei pawh tum bawk ila, a ṭha awm e. He kan ram, Rimawi ram hi kangmei lahah veng ṭhain i humhalh ang u. Mizo mipuite u, kan ram hi i tikang tawh lo hram ang u aw.

- Hausanga Hauzel