THE BIBLE SAYS SO!

Hun Hnuhnung Thu sawi hi chuan Daniela Hapta 70-na hi a serh zinga a mei ang a ni ṭhin a. I han sawi ve dawn teh ang. Pathianin Nebukanezara chu mang ropui tak a mantir a. Milim lian pui mai–a lu rangkachak, a âwm tangkarua, a dul leh malpui dâr, a ke thîr, kephah kahpathir leh bellei inchawh pawlh a ni. Daniela a hrilhfiah sak khan a lu chu amah Nebukanezara a ni a. Tangkarua kha Media leh Persia a ni a, a pum leh a malpui kha Grik lalram a lo ni leh a. A ke thîr kha Rom ram entirna a ni a, a kephah kahpathir leh bellei inchawh pawlh kha kan tun lai khawvel (?) entirna a ni. A kephah hrilhfiahna hi a dang, âwmkhan tak a awm bawk tho ve! Mahse kan tun lai khawvel sorkar te inchak hleih zia leh Judate chuan sâwm hi thil pumpui sawi nana an tawngkam hman a nih ve avang leh heng khawvel ram hrang hrangte rawn titawp veka vân Pathian hnen atanga Lal Isua lo kal hian kan tun lai khawvel nena tehkhin hi a inhmeh hle a ni.

Nebukanezara mumang hi Jentail khawvel sorkar te Lal Isua lo kal lehnain a rawn tihtawp dan tur min kawhhmuh a (Dan 2:24-45). Judate history chu Sakawlh hrohrâng chhe takin khawvel awp laia Lal Isua lokal nain a rawn tihtawp tur thu a ni ve leh a (Dan 9:27; Thup 19:11-20:5).

Tunah hian Babulon lalram chu Media leh Persia ṭangrualin Belsazar zuin laiin an hneh a, a tawp tawh. Media leh Persia lalram chu Lal Daria III-na chu Alexanderan a hneh a, an bo tawh bawk. Grik lal Alexandera chu naupangte-in a thi a, General 4-ten a ram an insem a. Rom sorkar rumra tak khan Grik lalram chu a luah ta. Chu Rom lalram chu historian thenkhatte sawi danin tuman an hneh vanga tawp a ni lo, a kawchhung a ṭawih nasa ema an keh darh ta.

Tichuan khawvel lo danglam zelin ram hrang hrangah lal an awm ta chek chuk a. Kan tunlai hun, ram tam taka lal tam tak awm, lal thenkhat US te, China te, Russia te an chak em em a, chutih laia ram tam tak chak lo em em leh rethei tak tak an tam mai. Chung lal thenkhat chak tak tak, lal thenkhat chak lo tak tak, remna leh muanna atana inremna reng reng nei thei lo kan tun lai khawvel chiah hi a lo ni ta.

Hetih lai hun ngeiah hian tlang atanga kuta laihchhuah ni lova Pathian hnen atanga Lungpui (Isua Krista) rawn lum hun (A lo kal lehna chu) kan nghak ta reng a nih hi. Nghahhlehawm i ti em?! Kan Baibul chuan "Chung lalte niah chuan vân Pathianin A lalram A rawn din ang a;.... Kumkhuain a ding reng ang" a tih kha (Dan 2:44). Chu thu vântirhkoh Gabriel-an a sawi chu Thuthlung Thar bu-ah a thlen dikna hun tur min hrilh a, heti hian "Vântirhkoh pasarihna chuan a han hâm a, tichuan khawvel lalram chu kan Lalpa leh A Krista Lalram a lo ni ta, Ani chuan chatuanin ro A rel ang" tiin an puang ta a nih kha (Thup 11:15).

Israelte history chu Daniela hnênah khan hrilh a ni ve thung a. A mi Israelte suahsualna avangin an Lal neih thin chu an nei ngai dawn tawh lo va, Babulon lal Nebukanezara khan a tihtawpsak a, Jentailte Nî a lo chhuak ta (cf. Luka 21:24; Thup 12:3). Heti hian Gabriel-a chuan a sawi a " Bawhchhiatna tikin tur te, sualna titawp tur te, ...i mite leh i khawpui thianghlim tân hapta 70 ruat a ni e" tiin (Dan 9:24). Hemi awmzia chu, a tawi zawngin sawi ta ila, in hnam pumpui in lo harh a in Messia in pawm theihna atan hapta 70 chhung hun pek in ni e' tihna a ni. Chu hun chhiar tanna tur chu Persia lalin "Jerusalem tungding leh sa ṭha tûra thupêk a chhuah atanga chhiar tan tur a ni. Chumi awmzia chu Persia lalin BC 445-a thupek a chhuah kha ni a kan ngaih chuan chawlhkar 69 kha AD 33 Good Friday hma Sandei Nî, keinin Palm Sandei NÎ kan tih chiah hi chawlhkar 69-na tawpna nî a ni. Sawi dan dangin sawi leh ta ila. Chawlhkar 7 sawi lan a ni a (v.25). Chawlhkar 62 sawi lan a ni leh a (v.26). Tichuan Israelte chuan Messia (Hriakthiha) thih hma Sandei kan tih ni khan hapta 69-na an hmang zo a nih chu.

He Daniela 9:26 ah hian hapta 62 ral hnua Hriakthiha thih tur thu a sawi a, chhiatna nasa tak thleng tur a sawi bawk a (Dan 9:26).

Dan 9:27 a han hawng ta a. Thu dangdai tak kan hmu ta a. Hei hi lehpekah kan zawm dawn nia.

-F. Lalthanzuala, 9436141242