AMC hian mirethei a huam ve em?

AMC hi kan hre lar ta hle mai a, mi tam tak tan hnawksak ang zawng te pawh an nihna chen a awm a. Chutih laiin khawpui enkawltu an nih avagin mawhphurhna tam tak an nei a, thuneihna pawh an nei sang hle. Thil tam takah hma an la ve a, Aizawl khawpui pawhin hma a sawn phah viau tura ngaih a nih laiin kum tam tak khawpui an enkawl tawh hnu hian Aizawl hian hma a sawn phahna sawi tur a tam lo hle. 

Tuna AMC in hna an thawh tam tak side drain siam leh step rem tih vel hi chu AMC awm hma pawhin thawh a ni reng tawh tho. AMC awm hnu hian rawng hnawih leh AMC hna a nih thu colourfull tak taka ziak a tam ta deuh e tih hi AMC awm hma leh AMC awm hnu danglamna chu ni mai. Khawpui hian enkawltu a mamawh a, mi chi hrang hrang, duh dan inang lo tak tak chenna a nih miau avangin awmze nei taka enkawltu a ngai. AMC hian Aizawl chu hei chen hi an enkawl ta a, hausate tan chauh hamṭhatna awmna a ang viau. 

AMC-in miretheite tan eng thil nge a tih - veng ṭhenkhata chaw­hmeh zuarho seat an siam sak bak hi tih an nei lo. Kawng kamah motor-a eitur siam, Food Truck ho dinna tur takngial pawh an siam sak ngam lo - hrui chuan an han pawt ve tak na a, Food truck dinna tur an tih hi veng chhungin an phal loh chuan engmah tih ngam a ni chuang lo. Mipuiin kan hriat lar deuh chhan lah hi bawlhhlawh paihtu an nih hi a ni mai a. Chutah pawh chuan kan la buai reng a, bawlhhlawh ṭawih thei leh ṭawih thei lo thliar dan mumal a la awm thei lo. 

Term hmasa lamah khan free wifi pek min tiam a, beisei nei taka kan thlir laiin free wifi chu min pe leh thei ta chuang lo a! AMC aṭanga hna an sem leh an hna thawh duh dan chhui chian deuh chuan contractor-te tan bak hlawkna a awmin a lang lo tlat. Miretheite tan eng nge tih an tum ve le? An hawi zawng an thlak loh chuan mirethei tan an ding lo a, vantlang tana thil ṭha an tih te pawh thil lian tham lo tak takte a ni hlawm; hnam ro tling tham tih an la nei tlat lo. 

AMC a awm hnuah mi hausa eng zatin nge hausak belh, mi hausa zingah AMC zar zotu an tam a. Miretheite erawh an bet tlawk tlawk a ni ber mai. Bawlhhlawh paih  ringawt hi AMC din chhan a ni lo, free wifi tih te phei hi chu Aizawlah chuan hmasawnna nena inkungkaih pawh a ni tawh lo e. 

- Remremi