SAWRKAR HNA THAWH ROPUI

Kan ram hruaitute leh political party-te ṭhanmawhbâwk lian tak leh an sim theih hauh loh chu, party dang sawisel tum hrim hrimna ṭha lo tak leh dâwt hlawm hlak leh thu dik chanve hmanga inpuh tawn a, inchirhtheh an chin tawh ṭhin, an chin mek leh an la chin chhunzawm zel hi a ni. Political party hrang hrang an insawrkar chhawk chhung zawng hian tute pawh khan thawk ṭha hle mah se, tumah infak a, inlawmpui a, inchawimawi tum an awm ngai reng reng lo. Insawisel hrim hrim leh thu dik chanve hmanga inpuhchhiat tawnna hlirin an khat a, chu chu chuan Zoram mipui thinlung ngaihtuahna a tipiangsual zo tawh a, insawiselna chi ṭha lo tak a tuh zo vek tawh a ni.

Rorelna in (Assembly House)-ah state dangte hmuh leh hriata mawi tak leh entawn tlak tak ni awm takin gentleman deuha inthuamin an khawsa a, session zawha rorelna in an chhuahsan rual rualin an ze ngai bawk an chhuah leh si ṭhin. He an thil chin ṭha lo tak hi engtikah tak bânsan ang maw le?

Tu pawh sawrkar se, an thawh ṭhatah fak ngam ila, an thawh ṭhat lovah huaisen takin, hmangaihna tel chia al nen invenpui ngam zawk ṭhin ila a ṭha ni mai tur.

Tunah pawh tu sawrkarah mah la awm ngai lo tih hial turin Aizawl khawpui chhung kawngpui ṭha takin rulnganpa ang zar maia an han siam hi an thawk ṭhain an fakawm tak zet a ni. PWD SE Lalrinngheta chuan, “Tuna hna hi Aizawl kawngpui resurfacing project awm tawha la lian ber a ni a, km. 83 thawm ṭhat a ni dawn. Hna hi kum 2024-25 hmalakna niin, nikum April aṭang khan contractor-in a thawk ṭan. Kum 2025-26 hmalaknain km 20-30 hna a awm leh mek bawk,” a ti a; sorkar lakah an lawm thu leh PWD Minister leh hotu dangte’n an enpui reng chuan inrintawkna a pek thu a sawi a ni. Hetiang taka pui tham leh chhenfakawma Aizawl khawpui chhung kawngpui thawm ṭhat ang hi a la awm ngai lo hial awm e.

Aizawl khawpui kawng siam mek hi ZPM hruaitu eng emaw zat chuan January 17, 2026 zan khan an enpui a; kawng siam chu April 15, 2026-ah zawh hman tum a nih thu PWD hotute’n an lo hrilh. “Ṭhál chhungin Aizawl leh district khawpuia kawng pawimawh siam kan tum,” tia PWD Minister-in 10th January, 2026-a a sawite kha a ropuiin a nghahlelhawm hle. PWD Minister chuan, Aizawl–Thenzawl–Lunglei kawng pawh siam mek a nih thu a sawi a, “Lunglei lam aṭangin kawng siam ṭan a ni,” a ti a. NH Sairang-Kawnpui kawng chungchangah, “NHIDCL hnuaia contractor-te’n kawng siam hna an thawh ṭan tawh avangin kan vilpui lutuk tawh lo. Chutihrualin, ṭha tak leh rang taka zo turin kan nawr ve reng,” a ti bawk. (Courtesy: Vanglaini daily newspaper)

Tun sawrkarin hetiang taka beihpui thlaka kawngpui siam hna a thawk ta hi a ropuiin, mumang pawh a ang rum rum zawk hial a. Chuvangin, fakna rimawi kan hlan ve hi kan tihmâkmawh niin a lang. Eptu party lamte erawh chuan an rilruin fakawm tiin lawm rilru hle mah se, an tlin lohna lai phawrh tum reng rengin an lo hmanhlel leh mahna le. Rom 12:15, “Lawmte chu lawmpui ula, ṭapte chu ṭahpui rawh u,” tih hi chu zawm har kan tih ṭhin a ni. Fak tlakte chu fak a, chawimawi tlakte chu chawimawi ngam mai hi mifel nihna kawng awlsam ber chu a lo ni e.

- Dr. C. Lalrampana