Kawngpui ṭha–i dîm tlang ang u

Nikum 2025-a favang a thâwt chhoh khan Mizoram sawrkar chuan Aizawl khawpui chhunga kawngpuite an siam ṭan a, tun thlengin an la siam mek zel a. Aizawla kawngpui an siam tur zawng zawng thui zawng belhkhawm chu km. 90 tling lo deuh a nia sawi a ni a, chu chu Aizawl aṭanga Thenzawl inkar ang vel pawh a ni mai thei.

Tun favang/ṭhâl chhoa Aizawl khawpui chhunga kawngpui siam hi khawvel awm tirh ata Aizawla kawngpui an siam nasat ber ṭum a nih ka ring ve ngawt mai a; ka hriat ve theih chinah chuan an siam nasat ber ṭum a ni. Siam nasat ber ṭum a nih piah lamah, kawng siam a ṭhat dan (quality)-ah, a ṭhat ber ṭum niin ka hre bawk. A lawmawm ka ti tak zet mai. Mizoram sawrkar hotu te, a buaipuitu PWD lama hotute zawng zawng an fakawm tak zet zet e.

Hetih lai hian, kawngpui an han siam a, a nih dan tur ang taka siam a nih hmaa han hnawm deuh hlek hlek ang chi te leh a nih dan tur ang la ni lo deuh thil te a awmve zauh zauh a. Chungah chuan social media lamah mahni intihlar tum reng renga hmanhlelte'n an lo sawisel hmanhmawh pek ṭhin a. An hmanhmawh ṭhin mah mah a ni. Kawng siamntu lamin a hnu lawkah a nih dan tur ang takin an han siam leh a; sawiseltute hian han nghak deuh hlek se, mahni an inthehderê lo ni mai tur hi a ni a.

Aizawl khawpui chhung bik chu tunah chuan lirtheia tlan a nuam ta hle mai. Kawng blacktop ni tho si, sawt boh boh ang chi te kha tunah chuan a awm tawh meuh lo a, a mâm ta hle; a zît hian kan zît per per a ni ber mai. A lawmawm tak zet a ni.

Kawng a ṭhat hian tlan chak a awl a, tlan chak hian chetsual a awm bik, tlan muan ai chuan. Tunah Aizawlah kawng a ṭha a, traffic a jam a nih loh chuan lirthei pawh an tlan chak deunh hret niin a lang. Hetah tak hian mi tin kan fimkhur a ngai. Lirthei khalhtute an fimkhur a ngai a, kawngpui kân turte pawh kan fimkhur a ngai bawk. I fimkhur tlang ang u.

Tunah hian kan kawngpuite hi a mam ṭha ropui mai si a, tun ang hian a ni reng dawn em tih a hriat loh. Kawng ṭha kan neih rei leh neih rei loh hi mipui kutah thui tak a innghat ve. Mipuiin kan dim thiam a, kawngpui tichhe thei zawnga hmalakna kan neih loh tlan chuan kawngpui ṭha kan nei rei thei ang. Kan dim loh erawh chuan tunah ṭha viau mah se, nakin lawkah chuan a chhe leh thuai mai ang. Chuvangin, mipuite hian kan kawngpui ṭha takte hi i dim tlang ang u khai.

- Lalduhmawia