Mr. Forward & Mr. Copy-Paste

WhatsApp group-ah hian ka awm ve nual mai a. Ka awmna group zinga a tam zawk chu member tam lem lo, chhungkua leh ṭhian ho bik awmna a ni a, ṭhenkhat erawh chu mi nawlpui awmna, hmelhriat aia hmelhriat loh awm tam zawkna group-te a ni.

Group lian vak lo, chhungkhat laináte awm khawmna leh ṭhian ho bik, huam chin bik nei group-te hi chu a ninawm lutuk ngai lo a, ni nawlpui group erawh a ninawm duh phian. Ning viau mah ila, ṭangkaina eng emaw a neih chang a awm avangin ka awm lui ve hram hram tho bawk a.

Ka awmna WhatsApp group, mi nawlpui awm khawmna ka tih ang chi-ah hian 'Mr. Forward-a' ka tih mai leh, 'Mr. Copy-Paste-a' ka tih mai hi an awm nual a, a nuihzatthlak angreng. Thuziak, thlalak leh video te hi an han forward nasa thei khawp a, tam tak chu ṭangkai lem lo te, ṭangkai hlawl lote a ni bawk a, a ninawm duh reuh fu a ni.

Mr. Forward-a ten group-ah thil an rawn forward pawp pawp a, Mr. Copy-Paste-a ten an rawn copy paste mial mial bawk a. An thil forward leh copy paste te chu a dik leh dik loh an ngaihtuah lem lo, an ti pawp pawp mai a ni ber. An thu thehdarh zinga tam tak chu thu dik lote a ni nawk a, awihawm loh tak tak pawh ni se, awihtu an lo awm ve zel tho a; mi tam tak rilru an tibuai ṭhin niin ka hria.

Mi ṭhenkhat chuan group an siam a, an group siam ni chiah lovah te pawh admin te an han ni a. An group siam leh enkawl deuh nia an ngaihte chu a reh lutuk loh nan ka vil e, an ti a. Thil an dah vak vak mai thin a ni. An thil dah tam zawk chu anmahni kutchhuak emaw, anmahni iráwm chhuak emaw a ni lo va, mi ziah sa, mi siam sa te a ni.

Thil awihawm loh lutuk, a dik lo ang tih rin sa theihte pawh an forward a, an copy paste zung zung mai hi chu a ṭha lo ka ti ṭhin a. Mi dang tibuaitu leh tichiaitu an ni tih hi ngaihtuah thleng se a duhawm khawp mai. Awihawm loh deuh ang chi te hi chu an thawn darh chhawn hmain internet lamah han finfiah hmasa thei se a ṭha khawp ang. WhatsApp pawh khawih thiam chuan Google an hmang thiam ngeiin a rinawm a, chung aṭang chuan an finfiah thei reng a ni.

Mi ṭhenkhat chuan an thil forward leh copy paste te chu a lo dik lo deuh a nih pawhin, a bul ṭantu an nih loh avang leh mi dang tih tawh an tihdarh chhawn a nih avangin thiam lohna nei lovah an inngai niin a lang. A bul ṭantu ni lo mah se, hmun dangah, mi tam tak awmnaah an thawn darh tho avangin thu dik lo thehdarhtu an ni tho tho va, mahni inthiam chawpna tur chi a ni lo, thu dik lo thehdarhtu an ni ve tawh tho tho.

Chuvangin, Mr. Forward-a te leh Mr. Copy-Paste-a te hi social media-a an thil thawn darh turah fimkhur se a ṭha khawp mai. A hrim hrimah, mi thil ziah sa te, mi graphic leh video siam sa te hi thawn darh chhawn zung zung hi a ṭul lem lo tihte hi ngaihtuah thleng ve rawh se.

- Zodinsanga