MIZO DAN PASS THAR HI!
Mizo inneihna leh ro khawmna dan pass tharah hmeichhe chan a chhia niin a lang a, a bikin Mizo hmeichhiate an lung hnur deuh a ni mai thei, sawi leh sel a tam hle.
The Mizo Marriage and Property Inheritance (Amendment) Bill, 2026 Feb. 25, 2026 Assembly-a pass tak chuan social media lamah sawi zui a hlawh hle. Dan siamthat hian Mizo leh Mizo inkara inneihna a pawm bakah, Mizo mipain hmeichhe (hnam dang) nupuia a neihna chiah Mizo inneihnaah a pawm a. Mizo hmeichhia leh hnam dang inneihna a pawm lo thung. An fate pawhin tribal nihna an 'claim' thei tawh dawn lo.
Mizo hmeichhia hnam dang pasal nei chuan ro khawm chungchangah pawh chan tur an nei tawh dawn lo. Mipa hnam dang nei inkara piang fate erawhin Mizo dan angin ro an la khawm vek thei thung dawn a ni. He dan veka Mizo tih sawifiahnaah Mizo leh Mizo nu leh pa inkara piang tu pawh Mizovah a pawm a, Mizo hmeichhia hnam dang neite chu an Mizona a bo tih he danah hian a inziak lo thung.
Engpawhnise, hemi chungchangah hian ngaihdan a inang lo hlawm tih social media hrang hrang aṭangin a chiang. Ṭawngkam feikibâra inkhawh tawn zuai zuaite pawh hmuh tur a awm; a bikin ṭhalai nula/tlangval inepin an inkâp tawn nasa hle.
Mizo mipui leh mipa tam zawk hian Mizo hmeichhia hnam dang pasal chungchangah an neihte azirin thliar hranna kan nei ṭhin niin a lang. Vaiho pasala nei leh sap leh sap rawngkai (foreigner) pasala neite kan en dan a danglam hle niin a hriat theih. Sap rawngkaiho an nih avanga ngaimawh lem si lo, vai an neih avanga kan ngaimawhleh êm êm si hi thilmak tak leh awmze nei lo a ni. Kan thîkthu chhiat dan a inang reng tur a ni.
Mizo hmeichhia aiin Mizo mipain hnam dang an nei tlem zawk. Hetihlai hian, Mizo hmeichhiain hnam dang an neih châk zawkna chhan chu hnam dang mipate'n hmeichhia an ngaihven zawk a, hmeichhiain duh duhin a thunun thei zawk bawk. Ei leh bar zawn kawngah Mizo mipa aiin hnam dang an rintlak zawk tlangpui.
Mizo mipa ruihhlo bawiha tang leh zelthel, hnathawk lova ni tin ruih tum ringawt, mahni nupuite kuthlaka tihduhdah ching lah an tam hle a, hmeichhehovin neih tlakah an ngai lo. Sipai intlar changa target chin pawh tlan chhuak thei lo khawpa ruihhlo chihhrang hrangin a bawh buai lah an pung tual tual bawk nen. Hmeichhe tan chuan he dan thar hi hleih neihnaah a ngaih theih ve tlat.
Eng ang pawhin dan ṭha nei mah ila, Abrahama policy anga fa/chi thlah lamah ṭan kan lak duh chuan si loh chuan Mizote hi kan tlem tial tial ang a, kan la ralthum ngei dawn niin a lang. Synod-in pian pun, fa neih tam policy a kalpui aṭang khan chi thlah pun kan peih tak tak lohzia chu a lang chiang hle. Zan tin nupuite pawl chu duh ṭheuh siin fa neih tam erawh kan hlau leh êm êm vek si niin a lang. Onana'n a u chi thlahsak duh si lova pãwl nawmna ringawt duha a u nupui a pawl zawha a chi leiah a titla daih ṭhin anga khawsa mek nupa tuak tam tak zan tin khumlaizawla tãl ṭhinte hian Abrahama policy (pian pun policy) hi a takin nunpui se, rei vak lovah Mizote hian kan ram hi kan luah khat ve thuai ang a, inngur tawn rengin kan awm lo mai ang.
-Dr. C. Lalrampana