MHIP-in an dodal chhan eng nge?

MHIP General Headquarters chuan tun hnai khan press release an siam a, Assembly House-ah February 23, 2026-a pass tâk, The Mizo Marriage and Inheritance of Property (Amendment) Bill, 2026 chu an pawm lo a, ennawn an duh thu an puang a ni.

MHIP hian The Mizo Marriage and Inheritance of Property (Amendment) Bill, 2026 chu Mizo hmeichhiate tan him lo leh a ṭha tawk lovah an ngai tih an ziak a. "Mizo Customary Law Commitee-ah MHIP kan tel a. 2026 Bill-ah erawh hi chuan râwn emaw, hrilh ve kan nih loh avangin kan pawm lo a. MHIP chuan Mizo hmeichhiate tana dan ṭha ber tur leh, siamṭhat ngaite kan zir chiang mek a. Chuvangin, he Bill pass tawh hi sût a, ennawn a, siamṭhat leh ngei ni se, tiin, The Ninth Mizoram Legislative Assembly hi kan ngen tak meuh a ni," an ti.

He MHIP press release ka hmuha ka rilrua rawn lut nghal chu, an hruaitute, office bearer-te hi MNF party mi leh sa an ni hlawm a, chuvang chuan ZPM kaihhruai sawrkar hi MHIP hmanga tihbuai a, issue siam an tum hrim hrim em maw ni chu aw, ka ti a ni.

Kei chuan The Mizo Marriage and Inheritance of Property (Amendment) Bill, 2026 hi a ṭha tâwk rihah ka ngai a, mipa leh hmeichhe tan a ṭha tawk rih viau mai. Chutih rualin, Mizo mipui, a bikin hmeichhiate duhthusam ang diak diak erawh a ni lo vang tih ka pawm.

Thil hrang hrangah hian kan duh ang diak diakin thil a kal thei ngai lo tih hi kan hriata kan pawm ve a ngai. Kohhran kal danah te, YMA kal danah te hian mi zawng zawng duhthusam ang taka kal theih a ni lo. MHIP Gen. Hqrs. ngat phei chu duhthusam an ni lo lehzual a, duhthusam chu sawi loh, sawisel tur a tam zawk mah em maw ni chu tih tur a ni.

Mizo hnam dan, inneih leh rokhawm dan chungchangah pawh hian Mizo mipui zawng zawng duhthusam a awm thei lo vang. Mizo hmeichhia zawng zawng duhthusam angin a kal thei bik lo vang. MHIP emaw, Mizo hmeichhiate emaw duhthusam angin kal ta se, mipate tan a lo ṭha lo leh viau thei tho tlat.

MHIP Gen. Hqrs.-in The Mizo Marriage and Inheritance of Property (Amendment) Bill, 2026 an duh loh thu an puan hian, an duh loh lai chu an tarlang tel lo va, a khawi lai tak chu nge an duh loh chu kan hre lo. "Bill-ah erawh hi chuan râwn emaw, hrilh ve kan nih loh avangin kan pawm lo," an ti a; a ṭhat leh ṭhat loh vang ai mahin, râwn leh hrilh an nih loh vanga dodal mai mai an ni zawk lo maw?

Ka sawi tawh angin, tuna MHIP OB-te hi an inthlan lai khan MNF line-up an ni a. An President hi MNF âwntu niin an sawi a, an Vice President hi MNF MLA Dr. R. Lalthangliana nupui a ni a, an General Secretary hi MNF mi leh sa dik tak, MNF Gen. Hqrs.-a nihna pawimawh tak nei leh 2021 AMC inthlanah pawh MNF candidate a ni. Mi dang chu sawi tawh lo mai ang. Heng aṭang ringawt pawh hian ZPM kaihhruai sawrkar hmalakna hi dodal an tum ve hrim hrim em ni chu aw, ka ti. Lo ngaihtuah ve teh.

- Zoramchhana