Mizo Dan siamṭhat leh thunàwi dang

Ni 24.02.2026 khan Mizo inneih leh rokhawm dan siamṭhatna tur Bill pass a ni a. Law Minister ni bawk, kan Chief Minister zahawm tak chuan a rawn sawi hawng (present) a, a rawn sawi dan ṭawngkam hman avang khan Mizo mipuite kan phu deuh luih niin a lang.

The Mizo Marriage, Divorce and Inheritance of Property Act, 2014 chu kum 2014 Mizoram Gazette-ah 16.02.2015 khan tih chhuah a ni a, he dan hi ka hman lai mek a ni. A famkim lohna leh a ṭhat lohna lai tam tak sawi tur awm mah se la, dan mumal ‘codified law’ kan neih hma hunte nena tehkhin chuan ṭha kan tiin, kan zavaiin kan hmang ṭangkai hle a ni tih chu phat rual a ni lo.

Tuna 2026 Amendment (siamṭhat)-a kan buaina lian ber pakhat, Mizo mipui min han tinghing deuh lawih nia lang ta ber chu, he dan Section 2 lai hi niin a lang. Section 2 hi a ziak ang ang leh Mizo ṭawnga leh hian tihian han dah dawn ta ila.

“Section 2 (The Mizo Marriage, Divorce and Inheritance of Property Act, 2014) – “This Act applies to any person who belongs to any Mizo tribe. It also applies to marriages where male members of the parties belongs to any Mizo tribe” tih a ni a. Chumi awmzia chu, “Inneih, inṭhen leh rokhawma dan hi Mizo (tribe)-te tan a ni ang a, inneih chungchangah a mipa Mizo (tribe) a nih chuan hman a ni bawk ang,” tih a ni.

Dam siamṭhat (Amendment 2026)-ah chuan, “This Act applies to all marriages where both the parties belong to Mizo tribe or where the male member to the marriage belongs to any Mizo tribe” tih a ni a. Chumi awmzia chu, “He dan hian Mizo leh Mizo inneihna reng reng chu a huam ang a, inneih pawlhah erawh chuan a mipa zawk Mizo (tribe) a nihin hman a ni ang” tihna a ni.

Dan hman mek leh dan siamṭhat hi uluk takin han en kawp ila. A danglam hluai lo a, tuna mi tam zawkte min tiphu zawktu hi kum 2014 danah hian a awm sa vek tawh a ni. Chumi awmzia chu, Mizo nu leh pa kara piang chu Mizo a ni reng dawn a; hnam dang pasal a neih avangin Mizo nihna (identity) a hloh ta a ni tih inziak a awm hran lo. Tin, ka identity hi chuti ngawtin tumahin min laksak ngawt thei lo!

Mizote ‘patriarchal society’ kan nihna angin, hmanlai aṭangin pa te hnam kan chhawm a. Pasal ka neih avang kha ka hnam a bo lo a, ka ‘identity’ ka hloh lo a, ka fate leh ka thlah kal zel te erawh chuan ka hnam an chhawm tawh lo a, ka pasal hnam an chhawm tawh thung. Sailo ka ni lo a, ka ni ngai lo a, thla 9 ka pum chhùnga ka pai, ka rîla rah palite erawh Sailo an ni ta thung ang hian!

Chuti a nih si chuan, danin Mizo a tihte hi tute nge ni ta ang? Section 3 (m), The Mizo Marriage, Divorce and Inheritance of Property Act, 2014-ah chuan, “Mizo means and applies to individuals who are Mizo by birth, by adoption of minor child and persons who have been accepted as Mizo by the Society and Community at large,” tih a ni a. Dan siamṭhat (Amendment 2026)-ah erawh chuan, “Mizo means any individual who are Mizos by birth or whose father belongs to any Mizo tribe and includes a legally adopted child,” tih a ni.

Chumia lo danglam ta chu, 2014 Act-ah, “Society leh community-in Mizo anga kan lo pawm,” tih lai khi, dan siamṭhatah chuan a paih ta a. Mizo nu leh pa kara piang leh, a pa Mizo a nih chuan Mizo a ni tiin a rawn sawi a; tin, dan ang taka Mizo nu leh pain an ‘legally adopted’ te Mizoa pawm an ni bawk.

Inneihna (marriage) chungchangah phei chuan he kan Mizo dan bakah hian, Court-a inneih tia kan sawi mai, Special Marriage Act, 1954 hnuaia inneihna hi hman theih reng a ni. Tin, Mizo ni lo, hnam dang nupui pasala nei te, a bikin Mizo hmeichhia hnam dang neite phei chuan he dan hnuaiah hian an inziak lut deuh vek zawk a ni.

Hetih lai hian, India rama rorelna sang ber Supreme Court chuan ‘seilenna hmun’ hi a dah lal hle a. Mizo khawtlanga seilian chu Mizo a la ni reng ang a, amaherawhchu, hnam dang community-a seilian a nih erawh chuan, an fate chuan Mizo (tribe) nihna an hloh thung ang tih a ni (Arjun Kumar v. Union of India & Ors. on 14th Feb 2006; Rameshbhai Dabhai Naika v. State of Gujarat & Ors. on 18th Jan 2012). Hemi chungchangah pawh he Court sang ber thutlùkna hi chhiar phawt hma chuan mâwlmang taka puak chhuah phawng phawng loh a fuh awm e!

Kan Mizo inneihna, inṭhenna leh rokhawm dan hman lai leh a siamṭhat te hi Mizo hmeichhiate tan chuan lawm em em tur a ni; chutihrual erawh chuan, rilru han thlepna tur erawh a la tam. Siamṭhat rau rau chuan hei ai hian han ṭha lehzual se la tih a awl khawp mai! Sawi pawh kan sawi tam ve tawh narawh e! Tun ṭumah erawh kha lam kha ka sawi lan tum ber a ni lo. Tuna kan buai deuh hluaina, Mizo hmeichhia tam tak kan han alh deuh phatna leh, Mizo mipa tam takte’n intithei taka kut kan lo ben hluah hluahna ber point erawh kha chu a dan bu-ah tak hian fiah taka ziak a awm hran lo e tih a ni.

Mizo hmeichhia, hnam dang pasal neite hi an inti-Mizo em em mai a. An fate Mizo ṭawng thiamtirin, chhuang takin Mizo mipuite hmuh theih turin an rawn pho chhuak a. Tu khaw hriat hlawh lo tur Mizote nun zia, kan ṭawng leh kan nunphung te khawvel hmuhin an pho chhuak te hi tam takin an sawisel ṭhin nâ a, a van ṭha em! Mizo hmeichhiate hi kan hnamah kan chiang em em a, kan duhthusam (kan dream)-ah chuan Mizo mipa ngei pasal a neih hi a nih deuh vek ka ring!

Chutihlai kara ‘hnam phatsantu’ tia ṭawngkam chhe tinrènga kan han chêksawlh ṭhin hi chu an lainatawm ka lo ti ṭhin! Mizoram chhùnga keini Mizo hmeichhiate aia zu leh ruihhlo thlang zawk, Mizo hmeichhia áwm némte’n thlamuanna leh thlavâng hauhtu kan mamawh ngawih ngawih lai a, dîm baksak loa kut thlak bur bur ṭhin te! Mizoram chhunga ruihhlo hluar lutuk mai te, Mizo mipa, ruihhlo kaihhnawiha an thi nasa lutuk mai te, jail tin maia Mizo mipa an phu suau suau mai te, kan jail neih len ber Central Jail mipa lam awmna a tâwt em em reng mai ringawt te hi khel tham asin!

- Julie Lalrinzami