Ramthar-ah football ramthar!
Aizawl khawpui per Durtlang-ah khian veng pakhat a awm a, a hming chu Ramthar Veng a ni. Leitan Branch YMA hnuaia awm chu veng YMA hruaitute chuan Milk Producer Ramthar Football League 2016 buatsaihin December 17 khan final khelh a ni a, chu hun hmanpui tur chuan sawmna ka hmuh ve hlauh avangin inelna neihna hmun Durtlang Mel-5 khelmual lam chu phur takin ka pan a, ka thil hmuh leh hriatte avangin ka kal lam aiin ka haw lam chu ka phur lehzual sauh a! Vanglaini chanchinbuah hial kan ziah a lo ṭul ta a nih hi.
Bulṭanna
Ramthar Veng YMA te hian zu leh ruihhlo dang laka an veng ṭhalaite an him theih dan turte, an vengin 'kan ta' tia chhuang taka an koh theih tur 'professional footballer' pakhat tal engtikniah emaw tal an neih ve theih dan an ngaihtuah a, Ramthar Football League chu chhanna ṭha ber nia hriain organising committee te in ruatin hma an la ta a ni.
League organising committee chuan team paruk tel turin ruahmanna an siam a, an veng chu hmun liah ṭhenin team an din a, hei bakah hian YMA team leh an veng rawlthar football lama hmabak eng tak nei nia an hriatte chu 'Junior team' an tihah chuan an telh a, an veng chhunga player thiam bik pariat chu sum hmanga lei theih turin an chhawp chhuak a, player manto ber hi Rs. 4000 man a ni! November aṭang khan team paruk inelna league chu an ṭan ta a ni.
Ṭhalai tan
Ramthar Veng hian an veng chhunga naupang talent nei ṭhate chu enkawltu mumal awm loa an thamral mai an phal lo a, 'Junior team' an din bakah team tinah kum 15 hnuailam player pathum tal an tel tur a ni, tiin dan an siam a, Under 15 player pathumte hi starting eleven-ah an tel ngei ngei tur a ni bawk. Puitling kaihhruaina hnuaia naupang an khelh hian hmasawnna tam tak an chhar chhuah an beisei a, nakin kum lo awm zel tura 'professional footballer' chher chhuah an tumna kha an theihnghilh lo.
Ruihhlo get out!
Ṭhalaite zu leh ruihhlo laka an him an duh miau a, tournament chhunga players zingah zu rui emaw, a rim nam emaw, ruihhlo dang khawih an hmuh chuan an khelhna club point hmuh sa aṭangin point hnih an paih sak zel a, Ramthar League buatsaihtute chuan tournament chhung hian an khawtlangah tlangval zu rui a leng emaw kam nam emaw an hmuh phak chinah chuan an awm loh thu an sawi!
Hei mai a la ni lo cheu, naupang, under 15 huang aṭanga khel leh junior team-a inlante pawh an meizial zu ru lai an man chuan an team-in point an lo hmuh tawh sa aṭangin point hnih an paih sak zel a, veng chhung rawlthar zingah khawlaia meizial zu hmuh tur an awm lo a, a 'ruk a' meizial zu naupang zingah an awm lo. Team tinin champion ngei an duh a, player leh coaching staff zawng zawng an ṭanrual avangin team tlakhniam phahna nih an duh lo.
Fakin awm rawh se
Veng pum huap inelna buatsaih turin sum a ngai a, sum awm tur chuan mi inphal an ngai. Durtlang khawtlanga bawng vulha eizawng 'Milk Producer Association' ten pakhatna lawmman tumin sum engemaw zat an theh chhuak a, mimal ṭhanhnem ngai engemaw zatin sum an thawh bawk.
Heng mi inpete avang hian
ṭhalaiten intihhlimna ṭha tak an neih phah a, zu leh ruihhloah engemaw zat an fihlim phah a, naupangten an talent an tih pun zelna turin hun leh hmun
ṭha tak an neih phah a, chung zawng zawng intawkkhawm chuan khawtlang hrisel tak a hring mai a ni.
Min zirtu ni rawh u
Vengtinin khawtlang nuam tak neih kan duh a, kan ṭhalaite zu leh ruihhlo laka fihlim turin kan duh a, naupang ten nun dik zir se kan duh ṭheuh. He kan thil duh hmu tur hian a chhanna kan zawng rei ta mah mah a ni mai lo maw? Kan in vua a, a thip pawh a reh fel hmain an meng sen leh mai a, sum tam tak sengin gospel camping kan buatsaih a, kan 'hallelui' chil per pawh a hul hmain 'kal ṭha' hleithei loin kan inhmu leh a, 'infiamna' hi khawtlang hruaitute hian kan zawhna chhanna atan kan hmang ve thei tawh mai lawm ni?
Durtlang Ramthar chauh lo pawh hi he kalphung hmanga khawtlang tana ke lo pen tawh veng dang pawh kan awm mai thei, lo ṭang zel ula, lo bei zel ula, ṭhalaite talent hai chhuah saktu ni nghal bawk siin khelmual chhunga inelna hmangin khawtlang nuam tak i din ang u hmiang!
- John Zothansanga