KRISMAS LEH A BEHBAWM (Negative Side)

Kum 2016 kum tawp chu kan lo thleng leh ta reng mai. Kan tana nau lo piang lawm turin tute pawh kan inbuatsaih mup mup a, tumai pawhin he hun hi hlim leh lawm taka hman kan duh a, chumi tur chuan kan theih tawpin hma pawh kan la ngei mai, mahni zawn theuhah kan phe buai a nih hi. Mahse Krismas kan hmuah dan erawh a inang lo tlang hle mai, tihian i han sawi chhin teh ang.

Krismas vs retheihna : He khawvelah hian hausakna leh retheihna hi a indo reng a, chu chuan tawpni a nei dawn lo. Retheihna lama tan hahthlak zia erawh kan hriatpui vek kher lo mai thei. He hunpui ‘Hlimna Hun’ tia kan sawi, tute pawh hlim se tia duhsakna kan inhlan ni leh hunah hian retheihnain a tuam mekte chuan rilru hah leh mittui tih tlak nan an hun an hmang ve thung a, thawmhnaw lum chu sawi loh mahni inah ngei pawh meilum nena tang kawp lo chuan sin lum tur mutbu an nei zo lo a, chumai a ni lo, chaw chhum tur pawh an nei mumal lo a sin, khawi atangin nge an fate thawmhnaw an leisak ang le.

An fate thil awt rual lek lek an ni a, mahse an tan Bazara hruai loh mai chu a him zawk a ni. Zan laia nu leh pa an muhil thei lo a, an fate tui taka muhil sek sek chu an thlir ngawih ngawih a, awh an nei tih an hria,pek an duh, an nei ngang si lo, Pa ber pawh pachang thei loin a mittui a luang thin. A ruka an tahna chu keini hian kan hmu thei em le? Chung mite chuan hlim taka he hun hi an thlen tak tak i ring reng em?

Nu berh ve takin a fa bazarah a hruai a, a fa chu a tap a, a nu chuan a kai lui dawr dawr a, bang turin a ti a, a hau a, rilru na takin a bang a, a nu pawh a hlim chuang lo, a fa khan awh a nei a, mahse an lei thei lo a ni. A neih zawng zawng chu an thawmhnaw lei nan a hmang ral tawh a, a nei tawh ngang lo a ni. Naupang mittui a luanga, nu ber erawh chhungrilah a mittui a haw nguah nguah si. A na a sin. Keini hian kan hmuthiam pha em le? Keini aia nei lo fein kan in hnuai an luah a, ‘In dam em, hlim takin hmang ang che u, Krismas Chibai le’ tiin kan chibai nuisang a, chutih lai chuan an fate thawmhnaw lei nan emaw pawh kan in luah man kan present thei lo. Krismas pualin hna free thut mai ila, nun a va nuam tlang dawn em!

Krismas vs mi hausa : A neinung deuhte erawh chuan an lei hnem thung a, an hmuh phak china a tha ber ber lawrkhawmin an inkhai bawr lek luk a, an inchhung chu sawi loh an in leh a vel thlengin a mawi a, a eng chuah chuah thung a, mi thilpek tur an thlang a, an thil pek tur pawh a a tha viau zel a, an rilrua an thilpek pek tur List-ah chuan an thian tha te, an chhung te leh tu tu emaw an lang zut zut a, chung zingah chuan leina tur nei ve lote hming erawh a list tel tlat lo. Duhsakna thilpek pawh hi min pe let ve thei lotute hnenah chuan kan pe vak ngai lo niin a lang. Hlim taka he hun hman tum a, bazar atanga kan inkhai bawr haw teuh lai leh kan chhungkua hlim taka kan nuih dar dar lai hian kan thenawm lawka harsatna avanga mittui tla mekte kan hmuhmaih tlat thin si.

Krismas vs sumdawngte : Sum dawngte tan he hunpui hi hlawkna hun vawr tawp a nih avangin sumdawngte chuan he hun hi an nghakhlel ngawih ngawih a, a hun a lo thlen chuan duh pawh an induh thawh na rawh e.

Hunpui rei lote a ni tih an hria a, tute pawhin an sum an hmanralna hun a ni tih an hriat miau avangin anni sumdawngte chuan an ngam ang tawka sangin thil man an chhiar a, thawmhnaw thar an la a, an stock sa pawh an phochhuak leh bawk a, in hralh loh hlau reng rengin an phe buai a ni. Chutih lai erawh chuan mi rethei thenkhat chuan an neih zawng zawng an rawn sengral ve thung a, hlawk an duh miau avangin miretheite neih zawng zawnga lei thei turin an thawmhnaw man an hniam thei si lo.

An pawisa bag-a a awm zawng zawng an chhiar pawhin an lei thei ngang lo a, anni lah chuan midangin an la rawn lei tho an rin miau avangin lei rih lo mah se pawi an ti lo. A dawrtu-te hmel en ran chungin chungin biak that peih leh biak that peih loh neite an awm an ti.

In duhthawhna a nat em avangin an hnuaia thawkte pawh an hah a, zingah an kal a, tlai taka an haw a, mawng pawh hung hman mang loin an phe buai a, Krismas thilpek tia hlawh han punsak zeuh te, thawmhnaw tha tak han hum hawtirte an hreh riau zel an tia, chumai a ni lo an hlawh tlemte pawh pek harsa ti ta tlat te an awm an ti, aw... han pe mai se nuam ti takin an sawi bang thei awm si lo. Pi fel Pu fel an va ni nasa dawn em!

Zan a lo ni a, inah an haw a, zanriah pawh kil hman loin ‘Niminah nge vawiinah lo lut tam zawk’ tiin pawisa na chhiar a,chutih lai chuan neih zawng zawnga rawn lei mi retheite chuan an thawmhnaw lei chu an lo zar pharh ve mek bawk. An thil lei chu a tha lutuk lo tih an hria, a rawng pawh a tla ngei ang, mahse an phak tawk a ni

Krismas vs ṭhalaite : Ṭhalai ṭhenkhat, sum thawk chhuak inti ve te chuan an thil lei lakah chuan an nu leh pate lo sawi ve pawh rem ti loin ‘ka pawisaa ka lei’ an ti zat zat a, a nu leh pain an chawm sei len vang te, in luah man an pek vang te, In an lo neih vang te, lehkha an lo zirtir vang te, hna an lo hmuhsak avangte a ni tih an hai tlat thung.

Ṭhenkhat lahin an nu leh pate rilru hahna tur ngaihtuah miah lo leh eiral vek ila a pawi lo ti niawm takin an mawina chuah an ngaihtuah a, an awh apiang an ngen a, an leisak loh lahin an la ti tau zui.

Nu leh pate hmuh phak loh a free taka hun hman chu Hlimna emaw an ti a, chu chu Krismas hman dan turte zinga tel veah an ngai hmiah mai. Ruihtheihthil tih chhin te, engtin emaw taka awmte chu a hunpui riauin an hria a, chutianga awm tur chuan an nu leh pa leh chhungte chu bum tumin an phe buai reng a, an nu leh pa lahin chutianga hun an hman chu an tan a him lo tih an hriat avangin an phal lo a, anni lah chuan an tan a tha tur a ni tih hai derin an nu leh pate chu strict tiin an ngei ngawih ngawih thung si. I in chei zuar a, i kalna tur i sawi chian loh khan i nu leh pa rilru kha a a hlim tawh lo tih hre rawh. He hunpuiah ngat phei hi chuaninngaihtuahna a nasat em avangin motor-a i tlanchhuah te khan an lo tawngtai mawlh mawlh thin asin.

Krismas leh nu leh pa : He hunpui hi nu leh pa tam tak chuan tah leh rumna a ni a, mirethei tan ngat phei chuan a ni leh zual. Hausa tan pawh fate ngaihtuah a na hlei hlei thung. An faten urlawk zan engtin nge an hman dawn le? Khawiah nge an awm anga khawiah nge an hman ang, eng ang takin khawsa ang maw? Engmah an hre si lo, hriat pawh a chak kher kher dawn em ni? Hre thei dawn ta se emaw hmu thei dawn tase an ngam meuh ang maw?

Nu leh pa thenkhat chu an phal lo chung an faten lirthei an lakluihsak a, engtingnge a awm anng, damin a lo haw leh ang em tiin rilru hah takin an indawm kun a, zan a lo rei a, khumah mu ve mah sela an fate zan reiah pawh an lo la haw miau loh avangin an muhil thei tlat lo. An rilru a va hah em! Chutiang fapa/ fanu chu i ni em le?

An inkhawm a, an fate biakinah an hmu lo, inah an haw a, an hmu chuang lo, lenkhawmnaah an kal em ni, mahse an hmu chuang si lo, an phone a, an la si lo, a thian hnai vai an bia a, anni pawhin a awmna an hre bawk si lo, chutiang hunah chuan eng rilru nge an put ang le? Number hriat loh atang phone call lo kal tase an tha a khur mai lo ang maw? An fate chanchin hriat an duh, mahse eng chanchin nge lo thleng dawn an hre silo. Chutiang nu leh pa chuan an fate avangin he hunpui hi hlim takin an hmang ve dawn em ni?

Krismas leh natna veite: Natna khuma mu mekte leh an chhungte tan hei hi hlimna hunah chhiar a har deuh mai thei. Anni ve thung erawh chuan thawmhnaw thar an ngaihtuah lo a, pawisa neih teuha bazar pawh an ngaihtuah hek lo, an ngaihtuah ber leh an duhthusam ber chu he hun hi dam taka hman a ni tawp mai, a aia chak leh thlan tur dang reng reng an nei lo thung. Mahse an tan erawh chu chu beiseina mai a ni a, tho pawh an tho kang thei lo a, a then te phei chu ni khua pawh hre loin eng hunah nge a kal dawn tiin a chhungten thaw dep dep chungin an thlir a sin. An tan he hun hi a hlimawm ve thei meuh ang maw? Dam tlang taka he hun hi hman an chak ve a sin

Krismas leh lusun fate : Pa berin a boralsan tawh a, hun pui lo thlen dawn ve leh nu berin a boralsan leh a, an unau mai a awmin belh tur an hre lo, an lungngai a, an rum a, an mittui a luang a, chhungkuaa hman te kha an rel ve a, mahse a thamral ta.

Krismas dawna Lusun tam zia kha i hria em? A thenin nu leh pa an chan a, a thenin an fate, a thenin an u leh nau, an chhung te, hunpui lo thlneg tur hi an urlawk ve tehlul nen ti raw. Hlim taka an fate an chhiah nui ar arna khumah an tap a, hlim taka an nu leh paten an chnepuina in ngeiah chuan fate an tap bawk a sin. Thihna hi a nunrawng mah mah i ti ve em? Hun pui lo thlen dawna lusun te chauh hi an na lo asin, he hunah hi chuan theihnghilh tawh a an ngaihte pawh an lo thar a, awm tawh lote sulhnu an chhuikir a, engkim kha tun lawk ang mai hian an hria a, Chhungkim dar ang len lai kha ngai zualin, tapin luaithli an nul leh zawng anih hi.

Engmahin a hnem thei loa, engmahin a tidam zo hek lo, thenrual thate an lo chuangkai a, cham rei thei an nih miau loh avangin an haw a lo hun a, khawharna nen bawk a hun hman a lo tul leh thin. Hnemna tawngkam an hriatte chuan a ti lungngai zual a, a ni ‘A then thinlai na pawh hi dam rawh se’ tih te hian an mittui a ko chhuak tam zawk a sin.

Duh aiin a lo sei ta mah mah e, duh tawk dawn teh ang, tichuan hei hi ka zawt a che. A eng Category ah ber khian nge i awm ve le? Ti hian lo in tiam ve phawt mai “Engti kawng pawhin ka chhungte rilru tina tur chuan he hun hi ka hmang dawn lo” tiin. Natna vei, an chhungte leh Lusun faten an mamawh che

- Hmingtea