Rel station-a bazar ni siam a ṭha em?

Mizoram Pradesh Congress Committee-in Sairang rel station-a bazar nî siam tum hi tih loh ni rawh se, tia March 2, 2026-a an thuchhuah kha uluk takin ka lo chhiar a. An tih chhan hi Febuary 23, 2026-a Chief Minister-in Assembly session-ah, “Sairang rel station-ah bazar ni siam tum a ni,” tih a sawi vang kha a ni. Congress party chuan “Kan duh lo” an ti tawl ringawt a. An sawi zel danin, “Bazar ni siam a nih chuan vai sumdawnna nî kan siam dawn tihna a ni a. Mizoram pawisa luan ralna nî a ni bawk ang. Mizo chawhmeh lei turin vai an lokal khawm dawn lo va, chawhmeh leh bungrua, thawmhnaw zawrh tur an rawn keng lut ṭeuh dawn a. Sumdawnna min chim ralna tur kawng pakhat a ni thei bawk,” an ti a ni. “Sorkar hian ngaihtuah nawn se, Sairang rel station-a bazar nî siam hi ti lul suh se,” an ti bawk.

Eptu party-te hian hian thil rêng rêng hi uluk taka ngaihtuah chiang hmasa lo hian PR, PHO, circular, pamphlet, etc hi an chhuah leh chiam zel ṭhin niin a lang. Eng party pawh sawrkar se, ram mipuite tan ṭha tura hmalakna tawh phawt chu lawm taka pawmpui a, nawr chak sauh zawk awm tak, thil ho tê tê hi an buaipui chiam ṭhin. An thil chin ṭha lo tak hi sim vat hlawm se kan ram a changkang zawt zawt mai ang.

Rel kawng hi Congress sawrkar laia CM Pu Hawla policy ni khan a lang a, a hmalakna avangin tunah, tlai khawhnuah ZPM ministry-ah a hlawhtling thei hram a. Mipui kan lawm tlan tehlul nen, rel station-a bazar ni siam lo duh loh leh tlat mai hi chu ‘Khuang lova chai ang’ chauh a ni dawn. Inlak bingna thlarau sual hi eptu party-te hian paih bo vat se a ṭha ngawt ang. Rel station kan neih ve chhuna bazar ni siam lo dodal tlat hi zawng a changkang lo tak zet niin a lang.

Sawrkar hian Sairang rel station-ah hian bazar ni hi a rang thei ang berin felfai tak leh mumal takin siam ngei se, mahni tualchhung chawhmeh thlai leh thei ilo to uchuak lutuk, Kristian nun dan tur ni âwm lo khawpa mirethei min rawk mekna hi a ziaawm ang. Phai lam thawmhnaw, dawr bungrua to uchuak lutuka MRP thai chhiaa huaisen tak taka an zawrh mekte luahlân ṭhak ṭhak khawp turin bungrua chaw lut tam bawk ila, mirethei tan a hlu lehzual ngei ang. PM Modi-a sawrkarna hnuaia Delhi aṭanga development fund tangka kum tin kan dawn ṭhin hi vai pawisa vek a ni a, Mizoram pawisa a awm hran chuang lo. Vai pawisa kan dawn hi a ṭhen vaiho bawkin an dawng let leh dawn tihna a ni mai a, bazar ni siam loh phah nana chhuanlam atan chuan a nêp lutuk mah mah a ni law’m ni? Hnam dang eng emaw zah rawn phur luttu rel kan nei tawh a, a behbawm lo hlauh leh lawi hi chu a finthlak teh chiam loh hmel.

Sumdawnna hi chimralnaa kan ngai fo dawn a nih chuan tumah sumdawng tawh lo mai ila, chaw nghei bak eng nge hmabak kan neih ang? Chîmral kan kan hlau tak zet a nih chun inthlah pung chak turin a takin ṭan la ngam ila; family planning bànsan duh chuang lova chimral hlauh leh si hian awmzia a nei lo. Mizote hi tamin, kan ram zîmtê hi tâwt khawpin luah khat thei ila, chimral hlau rêng rênga thâwk dêp dêp kan chin hi a bo vek mai dawn a ni.

Rel station-a hlawk taka bazar nia sum tuak chhuak turte nei ṭeuh ila, vaiho nen kan thil neih inang lo tak tak, ṭha tak takte hi inthleng tawn zut zut ṭhin ila, eizawnna ṭha zawk kan insiamsak zawk dawn a ni.

-Dr. C. Lalrampana