PAHOSS - MNF sawrkar laia mi hausa ṭanpuina scheme awmze nei lo
Parking House Support Scheme(PAHOSS) hi CM kal chhuak ta Pu Zoramthanga ngaituah chhuah leh a hming pawh hi ama sak ngei a nih a rinawm a. Ani Pu Rama hi thil thiam deuh mai pakhat a nei a. Thil lam tawi hawrawp tir hrang hrang lak khawm a thumal pakhat anga sawi mai chi, a sap ṭawnga "Acronym" an tih hi a thiam em em mai a. Entirnan: NASA, NATO kan tih ang chi hi. Mizoramah hian chutiang chi lar deuh deuh a phuah nual. MINECO tih te a fanu hming te pawh chutiang deuh chu a sa nghe nghe. Talent ṭha tak a ni.
PAHOSS pawh hi February ni 6, 2019 khan amah ngeiin a hawnga. Aizawl traffic jam nasa tih ziaawmna tur atana siam, sawrkar flagship programmes pawimawh tak UD&PA hnuaia pawisa pek leh duan a ni.
A Scheme hlawtling lo takah hian cheng nuai sangkhat leh za vel bawr a kal ral a ni ber. Aizawl mi hausa deuh ṭanpuina a ni ber e kan tih chhan chu, AMC area-ah lirthei dahna tur inhmun nei nih a ngai a. A tlem berah lirthei te chi Light Medium Vehicle (LMV) 5 tal dah theihna neih a ngai a. Aizawl khawpui area, lirthei kal theihna chutiang in hmun nei chu PAHOSS scheme bul tan hun 2019-ah pawh hian a lo berah cheng nuai 40/50 man a nih ngei hmel a. Chutiang in hmun ṭha mamawh vanga hralh thut pawh nise nuai 50 tel nei thei mai chin tan lo chuan dil theih a nih loh vang a ni. A scheme ah hian pawisa inpek dan hi rulh leh ngai lo (grant-in-aid) ala ni zui a. Ṭanpuina a ni ber mai.
A hunlai khan UD&PA chhut danin Aizawl khawpui area-ah hian kawngpui km 429 vel tlan kual theihna kan nei. Sawrkarna chelhtu ber in ṭha tura an ngaih angin scheme hi kalpui niin sum pek dan hi 40:30:30 niin a bul ṭan nan 40% sum an pe chhuak nghal a. Lirthei (LMV) 5 tal a tlem berah dah theina nei chin tan a dil theih a. Lirthei pakhat emaw two wheeler 6 dahna tur hi nuai khat hu ang zelin an chhutsak a. A dah theih tam lamah bituk a awm loh vangin a sa lian thei deuh chuan nuai 100 chuang fe te an dawng thei a nih chu.
A scheme hi a mawlmangin, a dawngtu lam tan chuan a ṭha khawp a. Lirthei zing dar 7 aṭanga zan dar 7 thleng dah man chu AMC parking rate angin an khawn ang a. Mahse, insakna petu sawrkarah pawh theh luh a ngai chuang lo. Zan dar 7 hnu, lirthei riah duh phei chu aneitu te hian an duh zat zat rate an chhiar thei.
He scheme hnuaia thuneitu ber atan hian committee pahnih an siam a. Parking House committee-ah CM chairman niin, member-ah kha tih lai Dy.CM leh UD&PA changtu Minister Pu Tawna, Pu C. Lalmuanpuia MLA, Pu Liansuama ex MLA te bakah Chief Secretary leh Secretary UD&PA, Finance, DGP leh Mayor AMC te kha member an ni. Hemi hnuaiah hian Executive comittee of PAHOSS kha awm leh in CS chairman na hnuaiah
Pu K. Lalthawmmawia, R. Lalhnuna, IGP, Chief Engineer(Building)PWD, Transport director, UD&PA Director, SP Traffic tih vel kha a thlangtu tur committee an awm leh a.
He PAHOSS scheme ah hian kum 10 tal parking atan an siam tur a ni tih a awm a. Mahse, a ṭhat loh bakah he scheme hi awmzia a awm loh em avangin sawrkar thar in a kalpui zui duh ta lova.
He scheme chungchangah hian Gauhati High Court ah PIL Sua moto case lutin, Court-in a ngaituah chho dawn a, tun January ni 26 khan High court Judge Justice Michael Zothankhuma leh Justice Pranjal Das te ṭhutna division bench chuan order tichhuakin, he scheme hnuaia ṭanpuina dawng list te, sum pek chhuah zat te, ṭanpuina sum dawngte in sak hman chhunzawm dan te affidavit chawlhkar thum chhunga theh lut turin UD&PA chu a hriattir.
Ṭhenkhat sawi danin Aizawl dai, lirthei jam awm lohna hmunah te pawh sawrkar kal ta duhsak zawngte chu ṭanpuina pek an ni a. A thlang tur thuneitute tarlan zingah pawh khian sawrkar hnathawk he scheme-in a kaihnawih bak, kha tih lai ruling party mi leh sa mimal member-ah pawh dah an ni nual tih a hriat theih. December ni 15, 2021 khan PAHOSS scheme a parking House sak zawh 11 chu kha tih lai CM, Dy CM leh AMC Mayor te chuan an hawng nghe nghe. Sawrkar tan erawh hlawkna hmuh tur a awm ta chuang lo.
~ Hruaia Kawlni