Zu zawrh a hun tawh
Mizoramah zu khapna a lian viau a, state thenkhat chuan Zalen deuhin an zuar si a, sum tam tak an lalut a, Mizoramah zu in an tam si a, kan state sorkar sum kal ral hnem tawh zia hi ngaihtuah a ngai ta viau mai. Kohhran lamin Khap hi duh viau mah se Mizo mipuite hian kan zo lo. Chutih rualin kan sum kalral a tam ta lutuk deuh e .
Mizoramah zu zawrh lai kha chuan state ṭhenawm Assam-a Cahchar district kan ramri hnaih Lailapur ah khuan wineshop a awm a, a lun hle ṭhin. Mahse kan sawi ang khan Mizoramah zu zawrh anih chiah khan an tlachhe tawp tawp a, a tawpah phei chuan an khar leh ta a. Mahse Mizoramah khap a'n nih leh tak khan dawr an cheihnum a, an lun leh em em a ni.
Excise leh Police paw'n theihtawp chhuahin hma la mahse an dang zo lo tih a chiang reng. Engtiklai pawhin Aizawlah hian sapzu lei tur a awm reng.
Mizorama zu Kan zawrh lai kha chuan khawlaiah zurui buaina siam leh kal pai ṭuang ṭuang hmuh tur an vang hle. Chu mai bakah zu um ruak hmuh tur a awm meuh lo. Khata ṭang khan zu zawrh hi kan tlin ve tawh a ni.
Mizoramah ruihhlo a tam em em a, chutih rualin zu lah lei tur a awm reng bawk si. Mipui sum tam tak state pawna luang ral hi a uihawm tawpkhawk. Chhiah Mizoram sorkarah a lut miah bawk si lo. State pawna wineshop nei kan ti vannei mai mai a ni. Phaiah han zin ila wineshop kan hmuhin zu in ngai lem lo pawh an hawi hu hu chu anih si hi.
Zu chhuah it vanga zu zawrh rawt leh ka ni lem lo. Mipui sum kalral hnem lutuk hi a pawi ka ti ṭhin. Tunah pawh hian kan tharchhuah ve ngei grape aṭanga wine siama zawrhchhuah turin dan an duang mek a, hei pawh hi a ṭha ka ti khawp mai. A quality ṭha ngat se an hralh thei viau mahna.
Zu zawrh sawi rualin kan local zu te hi in tlak, khualzin pawhin an in duh tur khawpa thianghlima siam ni ngat se chu sum lakluhna ṭha tak tur a ni. Kan khualzinna hrang hrangah an local zu a ni kan lam fo ni. Rangvamual zu tenawm lutuk khualzin lo hlui chi a ni si lo.
Chuvangin ZPM sorkar hian huai takin zu Hi khuahkhirna ṭha tak nen zuar ngam hram teh se. Kan ṭhalaite drugs ah an thi tam lutuk dawn
- Lalkhirhvela