THE BIBLE SAYS SO!

Pathianin a kawma a hlimpui atan mihring a siam a. Chu an hlim tlan theihna tur chu Pathian thu awihna a ni. Pathian hian eng vangin nge a thuawih hi a phût kan tih chuan - mihring tana ṭha ber chu a thu awih hi a nih avang a ni a. Eng vangin nge a thu awih loh hi Pathian hian a ngaihtheih loh em em kan tih chuan, thuawih lohna hi Setana aṭanga mihringa lo lut a nih avang a ni.

He thuawih lohna hi mihringa sual bul ber, sual chhungmu tak chu a ni. Kan Lalpa'n chhandamna thuhril a rawn ṭana a thu hmasa ber leh a sarmon hmasa ber pawh kha sim rawh u tih a nih kha. Hei hi Setana thu awiha a hnam pum deuh mai BC 586 aṭanga Setana thu awiha an Lalpa Pathian thu an awih lohna kha SIM (repent) turin a hrilh a ni. Chutianga Setana, an thinlung lalṭhutthlenga a ṭhu chu nam thlak a, Lal Isua thuttir tur a ni.

Setana'n an nuna lalna a chan tâk avângin Pathian nen inkawm hlim thei an ni tawh lo. Hnawhchhuah an ni ta. Eng vângin nge Pathian hian a thu awih lohna hi a huat em em? kan tih chuan thuawih lohna hi Setana nun, mihring thinlunga a dah, a hrin a nih vang a ni (Johana 8:44). Chuvangin kan Lal Isua pawh khan mihring nuna Pathian lalna (Kingdom of God) awmtîr kha thupui berah a rawn nei a nih kha.

Nova hunah khan anni chhungkua tih loh chu Pathian lalna mihring reng reng an awm lo (Gen 6:5). Nova thlahte lo pung chhote pawh khan Pathian tluka awm Evi te ang khân van tawng, Pathian lalṭhutphah tawng dawt khawpa sanga in sâng sak an tum mup mup mai a nih kha (Gen 11:1-10). Thil ṭha lo an tum tih hriain Pathianin a tidarh leh ta.

Evi leh Adama te fêl (fail) hnuah, Nova hun lai mite an fêl hnuah, Babel insâng sak tumtute fêl hnuah, Pathianin mimal pakhat Abrahama a han thlang leh ta nawlh mai le! Khawvel mihringte Pathian thu awih duh lohna thinlung an pianpui avanga chatuan chhiatna an tawng tur laka chhandamna siamtu tur lo pianna tur a ni ta (Gen 12:3). Abrahama aṭangin Isaka, Jacob-a, Juda, Davida, Lal Isua.

Pa fel tak Abrahama thlahte chuan Pathian kut an tuar zing hle mai. Pathian mi thlan ngat Davida leh a thlahten Israelte ro chu an rel a. Mahse, an hlawhchham let der leh mai. An lalna chu Nebukanezaran BC 586 khan a tihtawpsak a. Israelte lal vêna nîkhua chu kâwl a liam a, Jentailte nî an tih ṭhin, Thupuan thleng zawka kan hmuh (Thup 11:2) chu a lo inher chhuak ta hial a.

Tichuan Babulon, Persia, Grik, Rom, Israelten Lal an neih ve lawk, Maccabia hun lai kum hmuam dâ chhung lek an lal ve, Romin a nam thlu leh mai. Tichuan Abrahama thlahte pawh an fêl leh ta.

Kan Lal Isua hun lai te kha Rom Kaisara hnuaiah a nih kha an awm. Daniela dil anga an hnam leh an Jerusalem khawpui siam thar leh nan chawlhkar kum 69 an hmang ral tawh a. Kan Lal Isua an Messian Zion fanute lal chu mipui hnena a inlar dan tur a lo hrilh lawk (Zak 9:9) pawh hapta 62-na ral hnu ni sarih ni hmasa ber, keinin Palm Sunday kan lo tihsak tak (mai mai) nî khan a thleng daih tawh a.

Daniela bung 9:26 thleng khan Israelte chu hming neiin an awm (existed) ve. Hriak thiha (Lal Isua) thihna te, Jerusalem AD 70-a tihchhiat tur thu te, Judaten an tuar nasat dan turte a inziak a. Chu'ngte chu thil thleng tawh te an ni.

Daniela 9:27 na hi hapta 70-na a ni ta. Hei erawh hi chu thil lo la thleng tur a ni a. Hemi thu sawifiah tura kan tlawh chhan ber tur chu kan Lalpa âwka Math 24:15 thute an ni ang. Kan fiah ka duh avangin sawi hnu sawi nawn ka ngah a. I tâwp leh rih phawt ang aw! Pathianin rem a ti êm ang a, Vanglaini neitute pawhin min dawh hram hram ang a. Beiseinain kan sawi zawh hun chu a thleng ve mai ang.

- Upa F. Lal Thanzuala, 9436141242