Chapchàr Kût 'banner' bawk

Nikuma Chapchàr Kût thupui kha 'Zo nun ze mawi–Hawihhâwmna' tih a ni a, Lammual chhunga official gallery-a banner târ (main banner) bakah, kawngpui aṭanga Lammual luhna kawngka (gate) chunga banner tàrah 'Zonun ze mawi–Hawihhâwmna' tia ziah a ni. Kût souvenir 'Nghilhloh Bu' ah erawh chuan a dik takin, 'Zo nun ze mawi–Hawihhâwmna' tia ziah a ni thung.

Kumin 2026-a Chapchàr Kût thupui chu 'Zo nun ze mawi–Inremna' tih a ni. Tunah hian Lammual luhna luhka (gate) chungah banner tàr leh a ni tawh a, mahse, Mizo ṭawng ziah dan dik lo bawkin an ziak leh ta! Zodin Square-a luhkaah chuan 'Zonun ze mawi' tia ziah a ni a, Ritz Hotel bula luhkaah chuan 'Zonun zemawi' tia ziah a ni thung. Luhka pahniha an ziah dan pawh a inang lo tihna a nih chu–pakhatah 'ze mawi' tih niin, pakhatah 'zemawi' tih a ni.

Mizo ṭawng ziah dan dikah chuan, 'Zo' leh 'nun' tih hi ziah zawm loh tur a ni a, 'Zo nun ze mawi' tia ziah tur a ni. 'Zo' tih hi 'Mizo' tihna tluk a ni a, mi tu tute emaw chuan 'Mizo' tih aiah 'Zo' tih an hmang ṭhin. 'Zo nun ze mawi' tih chu 'Mizo nun ze mawi' tihna tluk a ni. 'Zo' leh 'nun' ziah zawm a, 'Zonun' tia ziah a nih hian dik hmêl fúin kan hria a ni mai thei; mahse, 'Zo' aiah hian 'Mizo' tih han hmang chiah teh, a dik lohzia chu a chiang mai. 'Mizonun ze mawi'–a dik thei lo.

'Zo' hi hnam (hming) sawina a ni a, 'Zo nun' kan tih chuan 'Zo (hnam) nun' kan sawina a ni. 'Zo' aiah hian hnam dang hming–'Bengali' emaw, 'Spanish' emaw han dah ta ila. 'Bengalinun ze mawi', 'Spanishnun ze mawi', a dik lohzia a chiang kêk kâwk viau! 'Bengali nun ze mawi', 'Spanish nun ze mawi' tiin a dik thlap. Zo, Bengali, Spanish, etc. hi hnam hming vek a ni a, 'Zo' a nih tâk avanga 'nun' nen ziah zawm bik chhan tur a awm lo. Tin, Mizo ṭawngah 'Zonun' tih hi a hranpain thumal pakhat angin a awm lo hrim hrim bawk a; mimal hmingah erawh chuan a tam mai.

'Ze' hi 'zia' (mizia) modified form a ni a, noun a ni; 'mawi' hi noun (ze/zia) sawifiahtu adjective a ni thung. Noun leh adjective hi ziah zawm tur a ni lo. Chuvangin, 'zemawi' ni loin, 'ze mawi' tia ziah tur a ni. Zodin Square luhkaah 'ze mawi' an tih laiin, Ritz Hotel bul luhkaah 'zemawi' tih a ni a; kumina banner rau rau pawh a inang lo; a zialo tak zet a ni.

Chapchàr Kût puala Lammual luhka chunga banner tàrte hi ṭawng ziah dan dik loa ziah a nih avangin, a dik taka ziakin thlâk hrâm ni se a ṭha hle ang. Siamṭhat nan hun a la tam tâwk bawk e.

Mizo ṭawngah hian sawrkar leh sawrkar hotu te, officer-te hi an fimkhur a ṭul tak zet. Sawrkar lehkha chhuak, Mizo ṭawnga ziah rêng rêngah punctuation dik lo a tam lutuk ṭhinte hi a zia lo hle; heti lutuk tur hi chu a ni lo.

Sawrkar hian ṭawng dik a ngai pawimawh tur a ni a, ṭawng dik a humhalh tur a ni a, mipuiin ṭawng dik an hriat theih nan ṭan a la tur a ni. Sawrkar tih hian sawrkar hnathawkte a kawk tel a, banner siamtute pawh sawrkar hnathawkte an ni mai thei. An fimkhur tak zet a ngai; Mizo ṭawng dik loa an ziah zel chuan ṭhangthar zawkte'n Mizo ṭawng dik an hre lo tulh tulh dawn tihna a ni.

Calling Art and Culture Department & Central YMA.

- Kezo