Mipuin CAB an sawisel a, MNF-in an sawfiah!

Citizenship Ammendment Bill chungchanga Facebook leh Whstsapp lama thil thleng hi ka awmna group ṭhenkhata mi chiah ka rawn thur chhuak dawn a, CAB hi Mizo mipui zawng zawngin a dan a ṭhat loh vangin kan sawisel kha a ni a. Mizote political party-in min bual ât hnehzia tilang chiangtu chu MNF MP Pu C Lalrosanga'n Mizo mipui hmaa a intiamna bawhchhiaa CAB a support tak thut hnu khan Facebook lamah MNF party lam rimnam nia hriatte chuan CAB ṭhatna leh Mzoram tana a hlauhawm lohna an rawn sawi ve char char a. 

Ka khaikhawm thiam dan chu, "Mipuiin CAB an sawisel a, MNF-in an sawifiah," tih hi a ni. Mipui sawiselna hi MNF lamin chhan an tum a, party leh party inhnialna a nih laia an ṭan a ṭhat theih nen tun ṭum chu hnial rual lohin CAB ṭantu leh sawifiah tumtu lam ṭanna a phet tlat. Political party hian Mizote min tibuai hle tih a lang chiang tel kan ti thei bawk awm e. Chut chuan facebook leh Whatsapp lama inhnialna leh thu post ṭhenkhat ngaihnawm ka tih deuh deuhte ka thur chhuak ang a, an hming (identity) chu anmahni ka dil thlap loh avangin ka ziak lang lo ang. 

FB status pakhat chu, "Eng kan ta nge kan ruling party te hian BJP emaw an intih tak tlat le. BJP policy sawisel hlek lah hian an rawn pawr nghal em em a," a ti a, CAB chu BJP policy ni si, a sawiseltu apiang MNF-in an lo chhang ve zel tih a sawina a ni. Kohhran Upa pakhat chuan, "CAB 19 vs. SYNOD 19: Kan fanu hi TISS (Mumbai) campus-a CAB dodalna an huaihawtah a phusa pawlah a lo zu ṭang ve a. 'Eng tin nge kan MP khan a support theih? Ka ṭhiante lakah insawifiah a ngai', a rawn ti a. 

Ka chhang thei lo va. Kan Synod khan a duh lo a ni lo’m ni? Inkhawmpuiah thu pass a awm em? A duh loh lantirna thuziak te in tar a ni lo’m ni?, a rawn ti leh a. Hei chu ka chhang thei a.Synod Inkhawmpui minutes General No. 62 leh banner thlalak ṭhenkhat ka thawn ta a," tih a FB a update bawk.He Kohhran Upa thu post hi mi putling tak takin an comment a, an comment pathum chauh han tarlang ila. Mizo pa langsar tak chuan, "Kan In a la kan kai ve loh avanga kut kuangkuah a, nui chunga lo thlir ngawt chu..... kan nui rei dawn lo mang e," a ti. Pakhat ve thung chuan, "Pawi tak a ni. Mizoram a huam ve loh mai avanga thlawp mai kha a ngaihtuah tawi thlak hle a ni. A nghawng erawh a pawi viau dawn," a ti a, comment dang lehah chuan, "A zahthlak tawpkhawk a ni. Aizawl a lo luh hunah kan MP chu a rawn lut ru zal zal a nih loh vek chuan puan dum nen hnung lam chhawnin lo hmuak ula a ṭha ang," tiin Zoram pawn aṭangin a rawn comment. 

Ṭawngkam thiam tak mi pakhat chuan, "Hneh dawn lo tih pawh chiang ila, kan lamah chuan ka pet goal kher lovang," tiin a status-ah a ziak a, ṭawngkamte hi kan thiam hlawm ka ti khawp mai! He post hi an comment naah, "A dam chhungin game khel thei tawh lo tura hrem hmak mai tur," tih leh, "Kan chak dawn chuang lo tih avanga mahni lama pet goal chu ka teammate ah ka duh leh ngai tawh lo ang," tih te hi an comment ṭhenkhat zinga mi a ni. Hetiang lam chi tehkhin thu angreng tichiang tak pakhat a awm bawk a, chu chu, - "Mahni anpui inneih phalna danin Mizoram min huam tel loh avangin ka support e, a ṭha ka ti e" tih leh, "CAB-in Mizoram min huam tel loh avangin ṭha ka ti a, ka support e," tih te hi thinlung hmun khat aṭanga lo ri chhuak, cousin niawm tak an ni," tih hi a ni. 

FB status pakhat ve leh thung chu, "Pu C. Roa hi a puangtu-pa mai a ni a.. MLA Election laia NEDA Convener rawn ken Nghakuai leh Changpat kha Thirkhaidiat..," a ti. Hei hian ngaihtuah a ti thui ta a, NDA Convener hi Himanta Biswa Sarma a ni a, ani hi tuna CAB tih velah pawh Northeast lama Amit Shah-a thurualpui pa ber kha a ni. Comment pawh a hlawh khawp mai a, "I va sawi thiam tak em. A fiah vek mai. Tawtawrawt chu a hamtu ham ang angin a ri chhuak a ni," a rawn ti khauh mai. 

CAB hlauhawm loh thu niawm tak kan mithiam pakhatin a ziah chu Whatsapp lamah an rawn thehdarh a. Facebook-ah ka hmu leh bawka chumi an comment na thu chu, "Zofate rilru nat em em lai hi chuan MNF ruhkawl hian kohhran leh NGO duh loh CAB support vanga sawimawi tumin aw lo chhuah rih lo lawk ngam teh u," tih a ni a, hei hian tun hnai biruak chu a khaikhawm ṭha ta deuh berin ka hria.

Pakhat chuan thil awm dan thlir zau deuhvin MP ringawt dem lova a awmna party lam thutluk na a nh thu a rawn sawi chhuak ve leh ta thung a, "CAB 2019 Mizoram Lok Sabha MP in a support chungchangah hian Pu C. Lalrosanga mimal thutlukna ni loin MNF duh dan a thlawp a ni. Chu vang chuan CAB Lok Sabha-a Pu C. Lalrosanga'n 'ka thlawp e' a tih hi Pu Zoramthanga duh dan ngei a ni e. BJP duh dan zela MNF hi kal chho tur a nihzia a chiang hle. 

MNF Party hian CAB an do tak tak a nih chuan, a support zawng leh a duh lama vote thlak MNF Party Official candidate a thlan tlin Pu C Lalrosanga hi an hnawt chhuak ngei tur niin a lang. A chhan chu Party duh loh zawngin a khawsa tihna a ni. Mahse chutiang engmah a awm si lo, an ngawi liam vel mai mai a nih chuan Pu Zoramthanga kaihhruai MNF Party hian CAB hi a support-in a vote - tihna a ni," a rawn ti ve leh bawk. 

Hei hian comment zui a hlawh khawp mai a, "Tunah Mizoram a huam lo pawh a ni thei. Bangladesh aṭanga Chakma lo lut hian Tripura-ah Indian citizen a dil a, a hmuh chuan an ram pan tur chu khawvela an ram neih chhun Chakma ADC chiah hi a ni. Bangladesh aṭanga lo pem pawh ti mah ila Indian citizen a nih tawh miau chuan hnawhchhuah pawh tum eng ang mah ila a theih tawh loh. CAB hi Mizoram tan a himna hi a chhe viau a nia," tin ngaihtuahna ti thui thei takin a rawn comment zui bawk a ni. 

Kan political party-te hian 'Face­booker' tihte neiin politics group-ah hian an inhnial lui luih tih hi mipui nawlpui chuan kan hre lo maithei. An ṭawngkama 'Facebooker' hi an lo nei a, an party lam ṭanin an post vak vak tir ṭhin a nih chu mawle! 

- K Lalthanzama