Written by
Lalrindika (RDA)
Insawithiam lovin ngawih chuh a hun
Citizenship Ammendment Bill (CAB) chu India Parliamnet in hnihah an pass ta a, Mizoram mipuite leh khawvel hmun hrang hranga Mizote min barakhaih turin kan MP Pu C Lalrosanga chuan kan rin loh lamah a phar ta thut mai a. Kan MP leh amah thutlukna siam tirtu MNF party huatin mipuiin an haw dawn ta mai si a, social media lamah phei chuan ṭawngkam chhe tinreng hmangin an bei tawh a ni. Hemi karah hian Pu Rosanga lam ṭangte leh MNF lam tang chuan fing taka thil awm dan lo thlira lo ngawih hi a fin tlak lai tak a ni ang.
Kan insawifiah kur ngiai nguai tawh chuan thil fiah lo a awm tihna a ni ṭhin. Chuvangin, tuna Mizo ṭhalai leh mipui an thinur la hi chuan amah Pu Rosanga pawh, MNF pawh, MNF lam ṭang hrim hrim pawhin thiam takin ngawh la chuh se, boruak a ziaawm deuh hunah an duhzawngte pawh rawn sawi ve ta se buai lo zawngin thil a kal theih a beiseiawm. Tunlai takah hi chuan mipui an neutral em em tawh a, poltical party-a inziak lut chu a tlem zawk an ni a, a subject leh a issue a zirin thutlukna an siam niin a lang ve. Chuvangin, ruling hian ruling an nih chhuanga an ṭawng zung zung chuan nakin lawkah an buai phah ka hlauh pui ve khawp mai.
Whatsapp a ni emaw, Facebook lam a ni emaw tunah hi chuan kan MP thutlukna zawm ang zawnga an rawn sawi tawh dek dek chuan inthuruak ni awm takin an bei let zel a, mahse chutihlaia CAB ṭhatna sawi tur awm miah lo
ṭan zawnga party ruh chilh ṭawngkam leh thuziak hmuh tur awm hian mipui thinrim a cho chhuak zawk palh ang tih a hlauhawm. Assam lama mipui thinur dante leh an chet duh dante hi kan rama thleng ve lo turin kan duh ang a, chuvangin kan ramah CAB vanga keimahni leh kemahni kan buai lohna turin ruling lam hi lo ngawi thiam se a ṭha ang.
A chhan chu CAB hian "Min huam ta lo," tih loh chu a ṭhatna sawi tur a awm lem lo. Dan ṭha lo tak a nih vangin hman ni lawkah kan MP ngei pawhin a tawp thlenga a do tur thu Mizoram hriatah a lo sawi tawh a, a video pawh a la awm. Dan ṭha lo chuan min huam ve tak loh avangin kan lawm a nih pawhin dan ṭha lo a nihna a la bo lo. CAB lam ṭan zawnga thu sawite leh insawi thiam lam hi chu nakinah ni se, tlemin lo ngawi hram hram se a ṭha a ni. Party pakhat worker-ten an lo thlawp ve a nih pawhin Mizo mipuiin CAB an thlawp lo tih a chian em hi.
- Lalrindika (RDA)