THIL TE BER PAWH A VENG

Han hawi vel ila, lei leh van thengreng zau tak maia thil awm zawng zawngte hi, Siamtu Pathian themthiamzia leh rilzia tilangtu an ni chiang hle mai. "Pathian thil rel dan chu, A va mak em! Thil te ber pawh a veng, Van thil a rel kim e," tih loh rual chu a ni lo a ni. He khawvelah hian eng hi nge thil te ber ni ta ang le?, Thil te ber kan tih hi a inang lo hle mai thei a ni. Mizote hian mihringte zingah hian, mi neinung leh khawsa theite hi mi lian kan ti a, khawsak harsa leh rethei deuhte hi mi teah kan ngai mai niin a lang a, Taksa pumrua tet leh len lam ai mahin, an dinhmunah mi lian leh mi te kan teh deuh mai a ni awm e. Rannung zinga te ber te, thing leh mau, thlai zingahte pawh, te ber an awm ngei ang a, heng zinga te berte pawh hi, kan Pathian chuan an mamawh engkim mai a pe vek chu a ni si a. "Pathian thli rel dan chu, a va mak em!, Thil te ber pawh a veng. Van thil a rel kim e," tih hla phuahtu hian Pathian ropuizia a hre chiang hle a ni.

Tuk khat chu, taksa insawizawiin khawpui daifem deuhah kawngpui zawhin kein ka kal a, kawngpui ko pang ṭhenkhat laiah chuan Hmunphiah kung hi an lo awm nual mai a, heng hmunphiah kungte ṭona leilung lah hi lei ṭha pawh ni lem lo, Lung tolawn mai mai hi a ni hlawm a, Nimahsela, hmuhphiah kungte chu, bawr luihin an hung hlawm a, an vui te chu a buk ṭha em em hlawm mai a ni, Mi tumahin lei ṭhaa an enkawl pawh a nih hmel loh a, a diptu hlo dangte pawh vaikian saktu an awm lo hrim hrim ang, Nimahsela, Pathian enkawl liau liauin, vui thei turin an puitling a ni. Pathian chuan kopang lung khawkrawk takah pawh an mamawh enkim a pe a, Ransa leh rannung Thehlei leh sazu ei chhe theitu lakah a veng him tlat a, tun hi an theng a ni, tiin ka ngaihtuah nasa mai a.

Hmunphiah vui hi mihringte tan hian kan in chhung bawlhhlawh phiah fai nan a ṭangkai hle mai a, Chhung tin hian kan nei vek ngei ang, Hemi avanga Hmunphian hming pawh hi pu a ni reng a ni, In tinah awmin ṭangkai hle mah se, kan inchhunga thil awm zingah chuan thil hlu leh pawimawh berah chuan kan dah lem awm lo e, bawlhhlawh phiah faina a ni mai a, Thil thianghlima ngaih pawh a ni lem lo, kan chaw ei dawhkan leh khumte hmun thianghlim deuh phiah fai nan phei chuan kan hmang ngai lo a nih hi. Chhuat bawlhhlawh leh kawmkar phiahna a nih avang hian, hmunphiah kan ina awm hi thil tuihnai lo lama ngaih a ni zawk mah mah a ni. Kan chaw ei tur leh thil dang ei tur siam sa chungah hmunphiah hi vilik fo turah kan ngai lem lo a. Kan pi leh pute pawh khan hmunphiah hi Ui vuakna tawk lekah an ngai a, hmunphiaha an mihring pui an vuak chuan hmuhsitna tawpkhawkah an ngai reng a ni. Hetia kan in chhunga thil awm zinga thil te ber pawl ami ni si hi, Pathian chuan mihringte mamawh tih hriain Hmunphiah kung chu ṭha takin a enkawl chu a ni si a. Pathian thil rel dan chu a va mak em!, Thil te ber pawh a veng, tih hi a va dik tak em.

Kan pi leh pute hun lai kha chuan an thlawhhmaah Hmunphiah kung a tam chuan hlo hara ngaih a ni a, an ning ṭhin hle a ni, Hmunphiah kung hi hung lian deuh deuhin a awm ṭhin a, a hung chungah hian eng thlai mah a chin theih si lo a, Hmunphiah kung lah hi a chawr chak em em mai bawk si a, Chuvangin, kan pi leh pute tan kha chuan hlo anchhedawng tih tur a ni, Nimahsela, tunlai khawvelah hi zawng sum chang thlai a lo ni ta reng mai, Mi tam takin hmunphiah hmunte siamin sum lak luhna ṭha tak a lo ni ta reng mai si a. Pathian thil rel dan chu, A va mak em!. Thil te ber pawh a vang, Van thil a rel kim e.

- Hausanga Hauzel