AMC inthlanah eng nge kan zawrh ang?
A candidate tur lam hi chu a ngaituahtu tura ruat ten an rawn ti fel mai turah ngai ila, tu pawh lo ding ta se engtin nge kan campaign ang tih lam hi lo thlir thuak thuak teh ang.
A manifesto lam pawh hi party hotuten an duang vek tawh zawk em ka hre chuang lo va, mimal ṭhahnemngaihnain, sawi zau vak lovin point 4/5 vel han sawi ve hrim hrim teh ila.
# A hmasa berah chuan MNF kum 10 lai AMC ah an sawrkar tawh a, an manifesto ah, "kan ti ang" an tih, tun thlenga an la tih hlawtlin theih loh ho hi thlur hmasa ila a fuh awm e.
# Aizawl mipui tan Thlanmual inṭawm siam an tum pawh an tihlawhtling thei lo. Aizawl veng hrang hrangten hla tak takah Thlanmual an nei hlawm. Thlanmual hmun nei tawh mang lo vengten tun aṭanga an inṭawm tur common cemetery siam a ṭul.
# MNF sawrkarin a chinfel hleihtheih loh Thingtlang Sumo leh Maxi Cab dinna leh chhuahna hmun ṭha siam ni se, tun thlengin Zarkawt leh Dawrpui phei zingkar traffic ti jam khawpin mumal lo takin kan la kalpui reng.
# Khawpui mirethei (urban poor) hamṭhatna lam ngaihtuah tam ni se. Thingtlangah chuan hnathawk thei tan Lo tal a la neih theih. Khawpuiah chuan ram a toin a vang hle. Mirethei tan banphak a ni lo. State dang te pawhin an lo kalpui ṭhin, Urban Horticulture Development Scheme siam ni se, Roof top garden te leh sawrkar hmun/ram ruakah Community garden te mirethei huan lo ram nei lo te tan thlai an chinna tur a daihzai zawngin greenhouse te siam ni se.
# Khawpui in luah man bithliah. Sawi zui vak a chakawm hle. Aizawl khawpuiah hian zirchiannaah chuan Mizoram mihring 100 ah 31.82 percent vel kan cheng. A pung zel maithei. Tenancy Act mumal tak neiha in luah man control leh dan leh hrai tha tak neih hi a ṭul viau.
# Solid Waste Management, hei hi chu kalpui reng a ni nain, MNF sawrkar kalpui dan hi chu duhthu a sam lo em em a, hei aia ṭha leh environment tana hlauhawm loh zawka kalpui theih a nih a beiseiawm.
# Rel lo luh vangin khualzin an pung nasa em em, Tourist hipna (attraction) lam ngaituah tam ila, chu chuan revenue ṭha tak min pe thei ang, Skywalk ṭha leh nalh, rinawm si Laipuitlang pang emaw, khawimaw lai remchangah siam ni se. Tunah Aizawla mimal pakhat, Pu Laltea MLA te Skywalk ringawt pawh hi a lun em em a, Tourist an kal nasa hle.
# Aizawl Chhim lam veng tan chawhmeh bazar changtlung ngaihtuah. Tunah hi chuan Tennis court leh a chehvel bakah Sikulpuikawn aṭanga Mission veng, Thakthing, etc. Inrinniah chuan kal hleihtheih loh khawpin traffic a jam ziah a ni ber.
# Hmasawnna hnathawhna tur Local council te hnenah tun sawrkar pek ṭhin aia tam sum pek ṭhin ni se.
MNF khawpui sawrkar kalpui dan aia nasaa ṭha, step leh footpath cheiṭhat mai lo deuh, VVIP te lo kal dawna mi vawk in zar hliah rikngawt te, In sa thar turte tan tun aia ranga hma laksak thei tur te leh Aizawl khawpuia chengte tan phurrit, chhiahkhawntu ni ngawt lova, mipuite chhawr ṭangkai tur Khawpui sawrkar thar din ngei i tum ang u.
- Hruaia Kawlni