Session
Hmun tinah Assembly Session an ngaithla emaw tih mai tur a ni a. Lengpui ram IAF hnena hralh chungchang, CBI chhui tura Party zawng zawngin an duh, chhuitir tura thehluh tawh, sorkarin remtihna a pek tawh pawh, 'Chak taka chhui turin...' tih thu-hla kan ram roreltu tura kan thlan mi 40 zetin darkar li vel lai inhnial funga an han hmang ta hi a hun ren loh thlak ka ti. An hlawh leh anmahni enkawlna senso nen, an allowance nen, hei aia thu ṭul leh hmasawnpui tur dang a tam nen, hetia hun khawhral nana an han hmang hi chu aw... a va Indian Parliament kalphung tak em!
Chai loh theih lohva pu luttu thlengin ka mit a timim. An thu inchuh lai tak kha a tê tham ngawih ngawih – 'rang takin hma la rawh se' tih leh 'chak takin bawhzui rawh se' tih deuh chiah a ni. (Rang takin hma la rawh se tih hian engti mah a la ti lo a kawk thei a, chak takin bawhzui rawh se tih hian eng emaw tih tawh sa bawhzui zel a kawk a – chu zawng chu an inchuh chu a ni ta) Hetiang thu lah hi tuin emaw a zawm loh chuan a zawm lo ngei a ni tih te, a zawm pawhin a zawm ngei a ni tih te finfiah a har tawh avangin awmze ropui tak a nei ngai tawp si lo.
Ṭhenkhat thusawi lah kha awmze nei lutuk lo, 'sawi ve hrim hrim' tih ang vel a ni. Mahse, khawiah pawh hian 'pha lo list' hi awm ve zel a lo nih hi. Tam tak kha chu a ngaihnawm a, tam tak kha chu thu awmze nei lo a ni a. A pumpui thuin pa taima takin ni tin darkar 8 thawk char charin lo vat ta se, lo tin hnih hmun a vat zo hman zan ang a, mi pakhatin tu pension case emaw chingfel turin ni tin darkar riat hna thawk se, pensioner panga vel case a chingfel hman ang a, tu emaw zin chhuak ta se khawvel a hel chhuak hman ang a, Mizoram chhungah hnathawk enin feh chhuak se Minister pakhatin khaw sawm a tlawh hman ang.
Chutiang tih theihna hun chu khiti khian thu te tak te inchuh nan kan ram hruaitute hian an hmang zo ta vek a nih khi.
Mahse ṭhenkhat chuan kha thu khan awmze ril zawk a lo nei a. Tu dik lohna emaw ching chhuak se, chumi avang chuan tu emaw hming hliau se, chu hminghliauna avang chuan Party hruaitu nihna inthlak theihna kawng inhawng se an ti – tiin an sawi!
- PL Liandinga