RUAH SUR CHU KA VA LAWM EM!
December 31, 2025 chhun lamah khan khua a la thiang ṭhain khaw thlir pawh a thui thei viau a, boruak pawh a thiang ṭha em em. Halpuah hâl lo turin ṭan kan la a, a sâwt hlei lo a. A ṭhenin min nuihzat a, min diriam a, min chêksawlh bawk.
Kum thar tir aṭang khan boruak a paw ta chûk a, khua a thiang hleithei ta lo a; khaw thlir a tawi tulh tulh a, ni a liam zel a, lo hâlin a chhunzawm a. Tun hma kum 4/5 liam ta aiin lo hâl an pung leh ta a ni ngei ang, meikhû leh boruak bawlhhlawhin min bawhtu a pik zual tlat. Khawvelah pawh a bawlhhlawh nasa pawlah kan lang pha ta hial a. Delhi-ah pawh halpuah an hâl tih ṭan chhantute khan Delhi anga boruak bawlhhlawh paw chûk khu kan awt a ni chêk ang chu maw!
A takin kan tem ta ngei a, nuam kan ti chiah em le? Hritlang leh thâwkna lam fel lo kan insawisel sup sup a nih hi. Chanchinbumi pakhatin min kawmnaah, “Ruah sûr nghah tawp a ni mai, a bak beisei tur kan nei lo,” tiin boruak bawlhhlawh vai kiang thei kan neih loh thuin ka lo chhang a. Kum tluanin ruah sur lo ta se, kum tawp lamah chuan Delhi khawpui chu kan hnaih ve khawp ang.
'Ruah sur hlan ka va nghakhlel em' tih chu ka chhungte bula ka thunawn chu a ni deuh reng ta mai a; a sûr pawhin sûr tlâwrh tlâwrh se ka ti ngawih ngawih a ni.
March 11, 2026 zanah chuan ruah sur tia han sawi theih tur chu a rawn sur ta, ka va han lawm tak em! Rin lâwk ang ngeiin rial a keng tel bawk. Ka duh ang chuan a sur tam lo nâ a, eng emaw chen chu boruak a thian phah turah beisei ila.
Kan ram boruak hi kan tibawlhhlawh nasa a, ruah a sur loh rei khan mita hmuh theih khawpin a bawlhhlawh tih kan fiah uar uar mai. Kan vannei a, ruah kan dawng ṭha ṭhin, chu chuan min chhan leh hlauh ṭhin a ni. Khaw khen kum phei chu thleng se kan pik rei ve fu ang.
Kumina lo hâl pung leh ta tlat hi ngaihtuah ṭhat fê a ngai e. Lo hâl hum hum lo zawng hmalakna hi mi thiamte’n an ngaihtuah chhuah a, sawrkarin policy fel tak neih a ṭul ngawt mai.
Kan hriselna atana ṭangkai eih lo halpuah leh thil hâl mai mai hi sawi mawi reng chi a ni lo.
Eng pawh ni se, hmangaihtu Pathian hnenah ruah a rawn sûrtir avang hian i lawm ngawih ngawih phawt mai ang u.
- C. Lalduhawma