THE BIBLE SAYS SO!

Pathianin Israel fate tan kum 490 A pe tih kan hria a. Dan 9:24-ah a inziah kha. Gabriel-a chuan Juda tawngkamin hapta 70 a ti a. Hapta khatah ni sarih a awm a. Chutiang chuan Daniela hapta 1-ah chuan kum 7 zel a awm a. Chutiang chuan hapta 70-ah chuan kum 490 a awm a nih chu. Daniela hian an ram leh an khawpui chu an sual avanga mi hnam bawiha an awm reng mai chu a vei em em mai a. Pathian hnenah an sualte ngaidama dinthar leh turin nasa takin a ṭawngtai a. Pathian chuan a ṭawngtaina chhangin, Israelte chu rala bo lovin din chhuahtir leh A tiam ta a. Hun bi chhiara hapta 70 chu kum 490 a ni. Persia lalin Jerusalem tung dinga sa ṭha leh tûra thupek a chhuah atanga hapta 70 hi chhiar ṭan tur a ni (Dan 9:25). Hapta 7 sawi a ni a, hapta dang 62 sawi lan a ni leh a. Tichuan hapta 69 chu a zo ta. Hapta 69 (hapta 7 leh hapta 62 belh) a tawp hnu khan Hriakthiha (Krista) chu tihhlum a nih tur thu ziak a ni leh a (Dan 9:26). Khata hapta 62 tawpna kha Judate kum chhiar dana chhiar chuan keinin Palm Sunday tia kan lo lawm Nî, Lal Isua thih kar inṭantirhna (Sunday) a ni. Hemi hma hian Lal Isua khan Israel hote hnên atanga Pathian Lalram chhuhsak thu A chhâkchhuah kha i la hre reng em? (Math 21:43). A la pawimawh dawn a nia! Tirhkoh Paula pawhin Pathian chhandamna thu hi Jentailte hnenah thawn a nih tâk thu a sawichhuak bawk (Tirh 28:28). Hei hi AD 62 pawh a ni thei ang (circa). Heng Bible bung leh chang pahnihte hi Daniela Hapta 70-na hrefiah thiam turin an pawimawh hle a ni.

Kan hriat tur chu hei hi a ni ta : AD 33 (circa) daihah Daniela hapta 62-na hi a tawp tawh a, tunah kum sanghnih aia tam a liam leh tawh si a. Daniela hapta 70-na kan la thleng lo i ti leh si a, min ti ngei ang! Hei hi hetianga tih nachang i hriat chuan i vârpawh dawn ṭêp tihna a ni.

Kan naupan lai chuan kan ṭhian pakhat hian a pa kum chu a hmaa a aia upa thin putar pakhat kum aiin a kum a tam tawh zawk a ti tlat mai a. A chhan a sawi chu Patâwnga kum a châwl tawh alâwm a ti! Chutiang chuan Pathian pawhin keimahni avangin Daniela hapta pawh hi a chawlhtir a, A lo kal lehna lo thlen hma kum 7-a lo thleng turin A sawn ta daih zu nia!

Pathian chu a haw chawpa hna thawk a ni lo va, hun bi nei thlapa thawk thîn a ni. "Hun chu a lo thleng ta a, Pathian (lal) ram pawh a lo hnai ta" tiin thuhril A ṭan ta a nih kha (Marka 1:15). "Ka Pa a hun a thleng ta, i Fapa chawimawi rawh" tiin A tawngtai bawk kha (Johana 17:1),"a hun bi a lo kim khan fa nihna kan neih theih nan" tih kan hmu bawk. Pathian chuan A chatuan remruatnaah Daniela hapta 62-na pelh hnua, hapta 70 ni bawk si lo hun zau leh lianpui, A chatuan remruatnaah Hriakthiha thihna leh thawhlehna avanga mihringte chhandam theihna thu hril darhna hun, hmasang zawlnei zawng zawng hnêna Pathian pawhin A hrilh phal loh, hmuh an chak si an hmuh theih si loh, Pathian Mega Program, khawvel hun lo thleng tawh zawng zawnga hun ropui ber, Pathian hmangaihna puanna hun A siam a ni. Chuvang chuan Patâwnga kum a châwl ta ang khan Daniela hapta kal lai chu, A chatuan remruatna program tibuai lo turin, anmahni A mi ve thote ngei chu mutthlukna thlarau A chantir sauh sauh a (Rom 11:8; II Kor 3:14,15; Math 13:10-17). Pathian hmangaihna avanga mihring tupawh sual sima Amah ringtu apiang A chhandam chhoh zelna hun A hawng ta rih a ni.

A tihtirh lama kan tihrik ang khân mahni Messia hnara khengbettute kut ata chu Pathianin A chhandamna thu chu (Judate kut) ata A chhuhsak ta a, rah chhuah tur Jentail hnam hnênah pek kan ni ta (Math 21:43). He hun hi tihian a kal chho zel ang a, Rapture hmangin Pathianin A'n titawp ang a, Sakawlh hro hrâng chhe tak, inti Pathian chawp, chetna hun Thessalonika mite Paulan a hrilh leh Thupuana kan chhiar ang hun chu kan la thleng ang (II Thess 2:1-8; Thup 6-18).

Kohhran (mi piangtharte) lâk chhoh an nih khan "Daniela hapta 70-na, Pathianin a File A pending reng chu, Lal Isuan A sawi angin (Math 24:15) File chu A hawng tawh ang a, Dan 9:27 pawh a takin a lo thleng tawh ang. Khawvel chu Sakawlhin a hrual ang a, a mi huat berte chu Israel-te an ni ang. Mahni Messia haia khengbet khawpa hnam bo kha, mahse Abrahama atanga A aihnah phahpuite an nih ve tlat avangin, khawvel mihring zawng zawng zînga ata A thlan tawhte hi Pathianin A paihthla hlen dâwn lo. A angchhungah A la lut leh dawn, amaherawh chu an sual simin Amah an ring tur a ni ve ang chu! (Rom 11:25-27). An sual an sima A lam an hawi theih nan Daniela hapta 70-naa hrehawm rapthlak em êmte hi Pathianin A paltlang tir dawn a ni.

- Upa F. Lal Thanzuala, 9436141242