Assembly House-ah lawmthu sawi an váng

6th Session of the 9th Mizoram Legislative Assembly hi 10.03.2026 chauh lo pawh kha ngaihthlak nilèn hi hna takah kan nei lo thei lo. Kan ram rorel khawl pawimawh ber thu leh hla hian ngaihven a hlawh zual sauh sauh bawka a hlawh zual zel ang.

LAWMTHU

House chhungah hian puithu kan tum ta lutuk nge ni, "Lawmthu ka sawi a ni" tih mai tura ngaihah te hian an sawi mai ngai ta lo a, "Lawmthu ka sawi duh a..." an han ti ta duah a. Lawmthu sawi an duh thu sawi lo hian lawmthu sawi mai hi a harsa lo asin!

TARLANG

'Tarlang' tih ṭawngkam pawh hi kan uar thar ta riau mai a, a enga ber nge sawi kan tum ni ta ang le? A sapṭawngin ni se 'display' tih te hian a hnaih deuh ber ang, 'express' emaw, 'reveal' emaw chu Mizo ṭawngin 'sawi chhuak leh lantîr' tihna te a ni a, 'lailang leh puangzar' te a ni.

I 'tarlang' tawh lo ang u; "Hei hi House-ah hian ka 'sawi chhuak', ka 'puangzar' a ni," te pawh a tih theih.

DUH A

He ṭawngkam hi puithu riaua kan hriat vanga kan hmang a nih pawhin sim daih chi a ni ang. "House kaltlangin lawmthu/hriattir ka sawi duh a..." kan tihin lawmthu kan la sawi lo, kan la hriattir lo bawk "House kaltlangin lawmthu ka sawi e, ka sawi a ni. House kaltlangin ka hriattir a ni," tih mai khan a dik reng.

RANSA

Kan ramsa neihte pawh House-ah ran han tih te, ransa han ti tâwk te an awm a; Mizo ṭawng kan uluk zual a ngai hle mai. 'Flora’ leh ‘fauna' sawi duh si, 'fauna' zawk awmze hre si lo pakhat pawh a awm a, ngaihthlak a hahthlak hle mai. Kan hriat chian loh chu sawi loh ngam mai pawh a ṭha ang. Khatiang thil tlanglawn lutuk sawifiah thei si lova sawi kha chu a dik lo, a sawitu berin a awmzia a hriat loh kha chu thil zahthlak a ni ve tlat.

'TOPIC' LAMA LUT LO

East Tuipui bialtu MLA hi eng nge a ngaihtuahnaah awm tih hi zawhna lian tak a ni. Minute 12 emaw âwrh hun an nei a, department hrang hrang sawi tur a tam a, hun an nei tlém viau! Heti chung hian House chhung hi political platform emaw a ti tlat ni tur a ni, a hun hmasa lam sorkar dinglai sawiselnain a ṭan chiam ṭhin bawk. A hunte hlawk zawkin hmang tawh se, ngaihthlak a châkawm zawk ang.

FCAA A NINAWM

A hun laiin FCAA kha House member-te khan an hre chiang lo ni berin a lang ta zawk e. A sawi hun tawh lovah an sawi leh chhén mai a, a ngaithlatu mipui hmaah an inpuan mai mai a ang tawh zawk. House-ah eng emaw eptu duh loh zawng sawi hlek se, an inau bengchheng chiam a, Speaker pawhin khauh zawkin a kaihhruai phah ta a ni.

Heti chunga FCAA pass dawna an duh loh thu ri chhuak khawpa sawi lo, duh loh avanga House chhuahsan pawh ni lo kha chuan sawi tawh lo se a dik zawk ang. Tuna taka sawi hun pawh ni tawh lova sawi kha a dik tawh lo.

- Zoa Tlau, Buannel Cabin