Mi rinawm

Mi chi hrang hrang kan ni a, felna lai, fel lohna lai nei theuh kan ni. Tunlai khawvel changkang tawh takah hian chumi chu a fel hle mai, emaw, ṭha tak tak a ni han tih bik tur hi kan awm chuang ang em aw. Kohhran upa eiruk ching kan hria a, hetih lai hian mifel tak, zuk leh hmuam takngial pawh ti lo, mahse, en liam ve mai mai ang chi an lo awm ve leh bawk. Mi rinawm han tih tur hian rawngbawlnaa fel leh ṭha viau si, ni tin hna lama rintlak teh chiam loh, tih hreh nei tlem riau hi a awm ve theih. Kawppuite laka rinawm lo mah se, khawtlang, kohhran hna lama ṭha leh rintlak a awm ve theih bawk. WhatsApp, Facebook lamah thu post taima viau mah se, belhchian dawl hauh bik si lote pawh a awm ve theih.

An hlutzia

Ṭum khat chu phone instalment man hi cheng sangli/sangnga dawn laiin ka lo chhut sual a, mahse, a leitupa chuan rin loh deuh maiin min rawn hrilh ta hlauh mai a. Pawisa tam tak chàn ngei ngei tur kha a rinawmna, dâwt sawi duh loh zarah ka chán ta lo a nih chu. Ṭum khat leh pawh, Chakma pa, a hna a khaihlak niin ka hria, pawisa min pek tur a nei ta lo, mahse, bîkbo, tlan bo a tum chuang miah lo, min pek ngei kha a tum tlata. A hnu deuhah chuan a rilrua a rinawm tlatna khan mi hneh ta hle mai a, tichuan, kan inngaidam ta a. A lawm ve aniang, a hnu lamah chuan a chipui fel tak takte’n min rawn dawr ve ṭak ṭak a. Covid hri len hma deuh kha niin ka hria, ATM booth-ah pawisa lak chhuah a tum a, mahse, a beidawng ṭhak a. A dawt leha a lokal chuan pawisa a rawn chhar ta ṭeuh mai a, mahse, neih ruk daih a tum miah lo, a hma chiaha pawisa lak chhuah lo tumtu chu a zawng ta ngat ngat a, an inpe let leh ta niin ka hria. Mi rinawmte hi an hlu a, an pawimawh hle; mite thlamuanna an ni.

Mi rinawm lo

Kum sawm chuang lai chu a ni tawh ang; kan veng pa pakhat chuan a nupui a ṭhen a. A ṭhen chhan ni awm deuha an sawi chu, annu kha a fehnaah a hmai lungin a delh a, a hmel a tichhe vek. Hmangaihna a dai ta tlat mai; nu rilru chu a va hrehawm dawn em, ka lo ti ve mai mai. Nu, naupai, HIV laka fihlim lo an awm nual thin, kawppuite laka rinawm loh a va pawi thin tak em.

Sawi ta daih ila, Ukraine ram chu Europe ramte zinga rethei pawl a ni a, tunah khuan Russia-in awp tumin a bei mek a ni. Ralthuam tha leh manto tak takin an pui chur chur hlawm a, an khawngaihthlak hle. Hetihlaia kan thil lo hriat ve leh zauh thin chu, heng an ṭanpuinate hi an official ṭhenkhatte khuan an lo eiru ṭhen ṭhin, an tih chu. Indo buaia an buai lai pawn an lo che duh tlat mai, a rapthlak hle. Keini zingah pawh hian kan awm ve fo thin a nih hi.

Engtin nge ni ang

Mi rinawm ni thei tur hian engtin nge kan tih ang? A bul chu thil te tham te aṭangin a ni. Mi, cheng sawma a rinawm loh chuan cheng zaah pawh a rinawm thei lo vang. Chutiang bawkin thil ho tea kan ngaihah dawt kan sawi vel mai mai chuan nakinah pawi zawk a thleng thei dawn a ni. Bible-a kan hmuh, tlemte chunga i rinawm avangin tam tak chungah ka dah ang che, tih kha kan hriat reng a pawimawh hle. Dâwt sawi, thu dik mang lo sawite pawh hi chin dawklak a awm vein ka hria; huaisen takin mahni tawrhna tur pawh ni se, han sawi rawt mai ila, kan fihlim hma duh zawk. Dawt sawi loh, thu dik chauh sawi zel hi chin ṭhanah neih tum ta ila, kan tan pawh a ṭhain a hahdam thlak zawk ngei ang.Kan rinawm theih nan chuan Bible chhiar uar ila, ṭawngṭaite pawh uar ila, tichuan,kawng dik chu kan zawh thei ngei ang.

Chanchin tharah mi rinawmte chanchin kan hre ṭhinin ka ring, a ropuiin kan rilru a hneh hle ṭhin. Heng chanchinte hi keini tan chuan tih ve theih rual lohah kan ngai mai thei; nia, mi bik deuhte tih awm chite pawh a ang ṭhin hle. Mahse, rinawm hi mi tinte’n kan ti thei vek a ni. Office hnathawk chuan hunbi a vawn dik a, thamna leh eiruknaa a fihlim chuan mi rinawm a ni mai lawm ni; hei bak bak a awm chuang lo. Kohhran leh khawtlang angah pawh mite tiphurtu, tichaktu ka nih theih chuan a va ṭha awm ve. Ka eizawnnaah taima tak leh fel taka ka thawh theih chuan mi rinawm chu ka ni ve der mai. Engpawh ti ila, rinawm hi a ṭulin a pawimawh hle; vanram, kan beisei em em pawh hi thih thlenga rinawm taka Isua zuitute tana tih a ni. Aw le, rinawm zel thei turin duhsakna ka hlan a che.

- Lalchhandama Colney,

Ph – 9862982321