Tu nen nge Christmas?

December thla kan han chuan kai a, Lal Isua piancham Christmas kan han hnaih meuh chuan kan bazar pawh a chep leh tawh hle mai. Chutih rual vekin veng
ṭhenkhatin kum danga an lo tih tawh ṭhin angin veng chhung chei hna an ṭan ve leh nghal zat bawk a. Kan khawlai leh kan in leh a velte pawh hmuh a nuam leh tawh hle mai. Aizawl khawpui phei chu hmuh a nuam lehzual a, veng tinin an veng chhung an chei pawh en tura fan tham a tling leh der tawh mai.

Kan Lal Isua piancham christ­mas a rawn thlen dawn hnaih meuh chuan zirna avang leh hna thawhna avanga hmun dang, khual khua leh ram danga chenga awmte pawn mahni khaw lam an pan sang sang a, tunah pawh zirlai tam zawk exam zo tawhte chuan mahni khaw lama an chhungte nen mai bakah, an kawppui an hmangaih leh duh em em an kalsan takte nen he hunpui lo thleng tur hi hlim leh lawm taka hman ngei tumin an khaw lam an pan hlawm a. He Lal Isua piancham hi rilru hrehawm tak leh nuam lo taka hman loh ngei tumin rilru lamahte pawh an inbuatsaih mek a ni.

Chutih mek laiin mi ṭhenkhatte erawh chuan an va awmna hmuna an ngaihzawngte chu rinawmna thu intiampui chungin lungleng tak leh khawhar taka mahni khuaa christmas leh kum thar hmang turin mittui nen an haw san ve thung a. Ṭhenkhat dang erawh chuan, an hmangaih ber leh duh berte lenna hmuna an kawppuite nena he hun kan hma maia lo thleng tawh tur hi an hman dun theih nan mahni inlum chhuahsanin an her liam ve vung vung thung a. Ṭhenkhat dangte erawh chuan he hun hlu tak mai hi hmun dang leh khaw danga cheng an chhungkhat lainate nena an hman dun theih nan an chhung leh khatte an chah khawm ve mek bawk a ni. Chutiang ang chuan tu tute nen emawa he hun christmas hi hmang dun turin kan inbuatsaih map map hlawm a, chhung tin leh mimal tinte kan buaitlangin, kan phur tlang tawh a ni ber mai. Thingtlang nu leh pa
ṭhenkhat phei chu tunah hian eng tin tak buai hlawm ang maw- an fate thawmhnaw thar leh thil thar leisakna tur ngaihtuah reng renga buai leh rilru hah pawh an awm leh ngei ang.

Tunah hian ṭhianzaho ṭhenkhat chuan christmas urlawk zan leh kum thar urlawk zana hun hman dan turte leh khawi hmunah nge ni ang a, eng sa nge kan siam ang, tih te an ngaihtuah lawk diam tawh ang a. Tu tute emaw chuan an bialnu bialpate nena he hun an hman dan tur leh an lawm dan tur an ruahman lawk vek tawh bawk ang. Chutianga tute emawin an ngaihzawngte nena christmas hun an hman dan tur an ruahman mek lai chuan, tute emaw chuan he hun hi kawppui, ngaihzawng han hmanpui tur leh han lawmpui tur an neih dawn loh avangin an rilru a phur lo viau ve mek thung ang a, he hun a lo thlen hma ngei hian ngaihzawng, kawppui hmanpui tur neih hman tumin tunah hian ṭan an lain an bei ve mek awm e. He hun kan Lal Isua piancham tak hi chu aw, a hluin a va han ropui tak em. Khawvel chhandamtu piancham a ni miaua tin ni!

Christmas hun hi mahni chauha han hman leh han lawm chu abikin nula tlangvalte hian kan hrehin kan huphurh em em a, kei ngei pawh hian ka huphurh! Ngaihzawngte tel lova he hun han hman hi kan chak mawlh lo. Kan duh ber leh hmangaih berte nena he hun hi han hman dun a, urlawk zan vela arsa han kan dun a, khawi lai hmun fianrialah emaw inkuah rial chunga duhthu han sam dun a, hmangaih biahthu han in hlan dun a, hmalam hun han thlir dun kan chak mai piah lamah, kawppuite nena zaikhawmna hmun han pan dunte kan chak bawk.

Nu leh pate pawn an fate nen he kristmas hi hlim leh lawm taka hman an duh avangin zirna avang leh hna avanga hmun hla tak leh ram hla taka awm an fate leh an tute pawh pawisa tam tak sengin an chah haw hram hram zel a, chhungkaw kim lova he hun hman hi an duh mawlh lo. Chhungkaw kim taka he christmas tal hi chu hman an duh tlat. He hun thleng tur hian thla tam nghah a ngai miau a, chuvangin he kan Lal Isua piancham hi a hlu lo thei lo. Keini mihringte piancham mah a hlu a nia.

Chutiang ang chuan he hun kristmas hi tu pawh mai hian hlim taka lawm kan duh a, chutiang ang tur chuan ruahmannate pawh kan siam hlawm a ni. He christmas hi mahni chauha ngaihzawng, kawppui nei lova han hman liam atan chuan keini abikin ṭhalaite tan hi chuan he hun hlu hi a uiawm em a ni.

Kristmas lo thleng tawh tur hi i hmangaih ber leh duh ber nen fimkhur takin chen ang che u. In duh leh hmun fianrial lamah duhthu sam dun turin han in kuah phei lawp lawp mah ula a pawi lo reng reng. In inhmangaihzia leh in induhzia lantir nan khawilai hmunah emaw i kawppui nen khan in in hmangaihzia leh in induhzia, in inngaihzia lan tir nan duhthawh takin han in fawp deuh vang vang vang pawh lo ni ula a pawi lo ang. Mahse in thinlungah Isua lo lal ber se, he christmas hi kawppuite nena sex hman dun nan leh thil
ṭha lo tih nan erawh chuan hmang lo ta ula. Inngaihzawnnate pawh hi Pathian tel chung siin thianghlim takin hlim tak thoin a kalpui theih a ni tih hi hre ta ila a va ṭha dawn em! Inkhawm leh zaikhawm hunte thlahthlam miah si lova, tute nen emawa he hun hi hlim leh lawm taka kan hman dun hi kan Lal Isua duh dan ber pawh a ni ngei ang.

Nula tlangval tan chuan urlawk zan velahte chuan ṭhiante nen han intihhlim nana inkhawm hunserh tawp tawh hnua khawimaw laia arsa han hem hmin a, han zai ho rap rapte pawh hi a pawina leh a
ṭhatlohna a awm dawn chuang em ni? Mahse chhiatna thlentu zu leh ruihhlo, sex tel lo thung se. Heng tel lo pawh hian ṭhian zahoin a intihhlim theih lutuk tih hi ṭhalaite hian kan hriat a ṭha hle mai. Ṭhian zaho nena intihhlimna hmunah hian ruihhlo tel lo se a nuam zawk fo a nia. Ruihhlo a tel tawh hi chuan a rui buai tawk leh a nawi fal bik hi an lo awm lo thei lo a, a tirah hlimawm viauin lang mah se a rei hnu chuan boruak nuam lai leh hlimawm lai an tichhe zo vek fo ṭhin.

Mahse mihring kan inang vek lo a nia. Mite angin christmas-ah hian chhung leh khat mai bakah kawppui han hmanpui tur i nei lo a nih pawhin lungngai suh, hrehawm ti reng reng suh ang che. Piancham neitu, engkim tithei Lal Isua hmanpui tur ṭha tak i nei alawm. Ani chuan mal leh khawhar, hlim lo tak leh lungngai tak, natna mittui nena he hun i hman hi a phal ngai dawn si lova, a thlahthlamin a en san ve ngai dawn lo che a; amah i auh phawt chuan i kiangah, i bul hnaihah a awm reng dawn tih a chiang e.

Tu nen pawh christmas chu lo hmang dun pawh ni ila kan thinlung lamah Isua lo lal ber se, thil sual tih nan leh ruihhlo tih nan te, mahni kawppuite nena sex hman dun nan mai maite leh khawlai sum leh hun hlu zawng zawng khawh ral nan mai mai chuan he hun hi hmang lo ang u.

Piancham neitu Lal Isua nen Christmas hi hman dun ṭheuh tum ang u. A hmasa berah kan thinlung­ah Lal Isua dah lal ber ila, a dawt kan chhung leh khat, kan mi hma­ngaihte leh kan ṭhiante dah ta ila. Kan Lal Isua chu a lawm ngawt ang le.

- Nawlchunga Chinjah, Siaha