LAL ISUA I NI EM?

- Rinfela Zadeng

Chu mipa naupang chu cher in thawmhnaw nei lo hle mah se Pathian zarah a hrisel hle a. Hman kuma mi kawr lum pek kha a la ring char char a ni. A ṭhiante’n Krismas kawr thar an lei tur leh an duhzawng an sawi sap sap lai chuan a ngawi reng a.

Naupang kum 10 mi chauh nimah se an hausa lo tih chu a hrethiam ve tawh a. A thil thiam leh a thil tih ve chak tam tak chu mahni insitna avangin a tih loh phah fo a ni.

Kum khat chhunga thawmhnaw thar a neih ve theihna hun leh khawpuia bus a chuan ve theihna hun Krismas chu ni 5 chiahin a dang tawh tih a hria a. Kum tin tlangsam leh Japan hlo a lo par hun chuan Krismas a hnai tih hi Calendar en lo mah se a hre ve ziah a nih kha! A ṭhiante’n Krismas thawmhnaw an lei vek tawh thu leh bazar-ah thawmhnaw nalh tak tak a tamzia an sawi chu a hre ve reng a. A nu leh pa te hnenah an bazar ve hun tur a zawt ngam lo a, a nau te pathum pawhin thawmhnaw thar neih an duh ve ngei ang tih a hria.

Nitinin Krismas a lo hnai deuh deuh a, a nu leh pate hmel a en chuan Krismas thawmhnaw neih a beiseina chhete chu a thamral dawn tih a hria a, a pa hmel phei chu a en ngam lo. A pa chu nitin a inhlawhfa tih a hria a; a nau pakhat zawk hritlang damdawi a leisak lai pawh a hria. Zan a mutnaah a nu leh pain Krismas ruai
ṭhehna tur pawisa thawh tur an neih loh thu an sawi chu a hre reng a. A nuam tih ber Krismas ruai ṭheh ve lo tur anga a inngaihtuah chuan a mittui a tla fap fap a. Sunday Sikul a an zir a hriat reng angin Lal Isua hnenah Krismas thawmhnaw leh Krismas ruai ṭhehna tur pawisa dilin a ṭawngṭai a; ringhlel hauh loin zanah chuan tui takin a mu ta a.

A ṭhiante’n an Krismas thawmhnaw thar en tur chuan nitin zantin an lo sawm bat zat a; ‘I lei ve tawh em? Engtik nge in bazar dawn?’ tih chu a zawhna dawn zin ber a ni. Chhan dan a thiamlo a hrilh hai fo thin. Mahse a thinglung erawh chuan ‘ Lal Isua’n min pek hun hunah’ tiin a chhang mai ṭhin. An Krisma ruai
ṭhehna tur vawk lianpui mai chu an thlung run tawh a, naupangho chuan zing tin an kil a, an sa ei chak lai te an kawk liam liam a. A ni erawh chu Christmas thawhlawm an la thawh ve loh avang chuan a kawk ve ngam lo a, a sawi ve ngam lo.

Dec 23 a ni tawh a, naktuk zan chu urlawk zan a ni tawh a, naktuk chiah Krismas thawmhnaw leina hun a awm tawh tih a hria. Chhun lamah thing ṭang ro a put avangin a chau deuh a, tui takin a muhil a, chutih lai tak chuan an kawngka kik thawm chuan a ti harh a.

A pa in a va hawn chuan mi pakhat a lo lut a. A pa nena an inbiak dan vela aṭang chuan an ‘Pasitawr tezawk’ kha a ni tih a hria a. An Pasitawr tezawk chu kum thar ruai ṭheh zawh hnu aṭang a lo awm thar a ni tih a hria. A nuin a nau paw paha a thingpui lum an in zawh chuan an Pasitawr tezawk chuan Krismas prezent-ah tiin a pa chu lehkha sen hi a pe a, a pa chuan an hawng zawk a - pawisa a lo awm ṭeuh a. A pa chu a ṭawng thei lo, a nu pawh a ding ngawi reng a tih thosilen pawp hrup aṭang chuan a hmu vek a.

Khum aṭang chuan a va tho a. An Pasitawr tezawk-a bulah chuan a va ding a-

“ Ka pu, nangmah hi Lal Isua i ni em?”

“ Ni lo e. Ngatinge min zawh a?”

“ Isua hnenah Krismas thawmhnaw leh ruai
ṭhehna tur pawisa min pe rawh ka ti a, tunah min lo pe sia”

“ Lal Isua in pe turin min lo tir a...” (A sawi zawm thei lo a)

Naupangte chuan lawm avanga mittui tling piau chungin-

“Lal Isua hi a ṭha tiraw ka pu?”