MALSAWMNA

Kum a tawp hnai a, mi fel tak tak, he hun thleng zo ve lo tam tak an awm laia keini in kan han hmang thei mai hi kan vannei hle mai. Malsawmna chungchang sawi ka tum a ni. Malsawmna hi khawi aṭanga lo kal nge kan tih chuan Pathian hnen aṭang kan ti thei ang. 

Hetih lai hian fiamthu nge tak tak Setana malsawmna te pawh hi awm ve awmin sawi a ni ve ṭhin bawk. Ka sawi tum chu Pathian hnen aṭanga lo kal mal­sawmna a ni. Enga ti nge malsawmna kan dawn ve theih loh, malsawm tlaka nun pawimawhzia te sawi kan tum a ni. 

Nitin hnaah - Dawr kai ka ni a, zing aṭangin tlai thim thlengin dawr ka hawng ṭhin. Ka hman ral leh lak luh zat te pawh ka chhinchhiah fel thlap ṭhin. Mahse, kum chanve hnuah chuan ka hloh chu a tam ta hle mai, eng nge a awmzia ni ang? Chutiang bawkin zirlai ka ni a, ka zir ve nasa ṭhin a, mahse, pass mark ngawr ngawr bak ka hmu ngai lo, engtin nge ni zel dawn le? 

Ani taka kan thawk rim ve em em, mahse, kan hlawhtling hlei thei tlat lo. Hetih lai hian han in bihchiang ve ta ila, thawk rim kan intih ve em em te kha tute emaw chuan han hre ta sela an nuih a za deuh mai lo ang maw aw? 

Tam kan tih te hi a inang lo ṭhin viau a, thawk nasa kan tih te pawh hi a lo inang lo ve thei bawk. Vanduai hrim hrim hi chu awm ve bawk a ni a, thawhrimna reng rengah chuan hlawhtlinna a awm tih kan hre ṭheuh ang. 

Hriselna lamah - Zuk leh hmuam ti lo mi ka ni a, thianghlimna kawngah pawh kut fai tak zelin thil ka ei ṭhin. Mithiamtena tih leh tih loh tur an sawi ang ang te pawh theihpatawpin ka zawm ve ṭhin. Mahse, natna ṭha lo takin mi man lat mai. Ringtu ka ni a, nitin Pathian hnenah hriselna ka dil ṭhin. Mahse, hriselna chungchanga zawm turte chu ka ngaihsak teh chiam lo. 

Engtin nge ni ang aw, ka zawm peih chuan si loh chuan, eng kan ang chuang lo ngei ang. Pathian tih atana dah ngawt mai chu a dik thei lovang. Awle, kan insum theihna te, thiang­hlimna te pawh a ṭha e, mahse, hlawhtlinna tak tak neitu hmaah kan tlawm zan em, kan tih ve theih te kan hmatheh lutuk a ni lo maw? Ruahmanna chu mihring lam chan a ni a, a hlawhtlinna tak tak neitu erawh Pathian a ni si. 

Rawngbawlnaah - Tualchhung mite thusawi dawn chuan inkhawm kan tam teh chiam ngai lo, mahse, mikhual thusawi dawn erawh chuan kan buk deuh hluai ṭhin. Enga tinge ni ang le, sermon dawn thar kan nei ngai lo nge, kan thatchhia a, a ṭhing kan her lum leh ringawt mai ṭhin. Thawhlawmte ṭha takin ka thawh ve ṭhin a, mahse, ka hlawk pui mang tlat lo - ka pa chhe telh telh mai. Thawhlawm thawh tam leh tlemah hian Pathian tehna aṭang chuan a la bang aṭangin a teh ṭhin tih kan hria ang. Eng pawh nise, kan rawngbawlnate a nung lo, eng vang nge ni ang? Bible-te hi kan chhiar tlem lutuk a ni lo maw? 

Pathian hian direct-in min rawn tih sak ringawt dawn lo. Hetih lai hian Pathian hian theih loh a nei lo tih hi hre tel tho bawk ila. Chuvang chuan kan nitin nun uluk ila, kan nun tal a hlim ngei ang. Krismas hlim taka hmang turin duhsakna ka hlan a che u. 

- Lalchhandama Colney