ASSAM RIFILES CHHUAHSAN HMUNHMA HMANNA TURAH LALSAVUNGA SAILO HMING LANG VE NGEI SE
Kum 1820 vela Aizawl dintu Sailo lal Lalsavunga kha Sailo lal ropui Vanhnuailiana leh tlawm ve lo lalnu Ropuiliani te pa a ni a. Hlimena awmhmun a khuar hnuin Aizawl a rawn din leh ta kha a ni tih kan hre awm e.
Hlimenah chuan park ṭha leh changtlung tak mai ‘Lalsavunga Park’ din a ni a, tlawhtu pawh a ngahin, Mizoram mipuite mai bakah ram chhung hmun hrang hrang leh ram pawn aṭangtea khualzinte tlawh tur hmunhma kan neih ṭhat zinga pakhat a ni awm e.
Vanglaini chanchinbu dt. 10.03.2026 chhuakah chuan ‘Assam Rifles chhuahsan hmunhma hman dan tur’ Assembly session-a GAD changtu Chief Minister Pu Lalduhawman House a hrilh thu kan lo hmu a. Sawrkarin ngaihtuahna ṭha tak senga he hmun hlu tak hman a nih dan tur Advisory Committee on Assam Rifles Land a din hi a lawmawm tak meuh meuh a ni.
He ram hman dan tur atana rawtna a siamte han thlir vang vang hian a ngaihṭhatthlakin ṭhangthar zel te tan a hlu dawn tih hi a hriat theih nghal awm e. Electric Substation hi 33kV GIS Substation ni turah lo ngai ta ila, siam puitlin a nih hunah chuan Aizawl khawpui tan hian a va han ṭangkai dawn tak em. Ṭhalaitena kan mamawh em em Mini Park awm turte hian thaw a tivengin, state dangte neih ang kan nei ve tur hian rilru a tiphur em em mai a ni. Multi-Level Parking leh a dang dang te hi puitling thuai thuai se a va duhawm tehlul em.
Tichuan, Heritage Court emaw, Electric Substation emaw te hi he Aizawl khawpui ropui tak lo dintu Sailo Lal ropui Lalsavunga hmingchawi ngei hian dah ni thei se a va han lawmawm dawn em. A lawmawm dawn mai ni loin a inhmeh ngawih ngawih dawn a ni. A khaw dintu hming ngei mai, khawpui laili taka a han awm tur leh a hming la hre lo te pawhin an hriat phah theih zelna tur a ni dawn a, a va han ṭha dawn tak em.
Mini park hi chu Hlimenah Lalsavunga park a awm tawh avangin a remchang lem lo ang a, Multi-level parking chunga Vanapa Hall a awm dawn avangin Lalsavunga hming lo dah chu a remchang chiah loin a hriat deuh a. Chuvangin Heritage Court emaw Electric Substation, a khawi emaw zawk zawk hi chu a inhmeh dawnin a lang. LALSAVUNGA 33KV GIS SUBSTATION emaw LALSAVUNGA HERITAGE COURT emaw han ti vah mai ila, ṭhangthar zelte leh khualzin lo awm zel turten kan khawpui lo dintu hming hi an hre thei zel dawn zu nia.
- Hrangchhuana Sailo, MB: 9436352280 / 8837095663, Email: hsailo_pg@yahoo.com