ṬUAHPUI LEH VAU AN VUL LEH TA

Ṭhal va-ek-char laiin, eng emaw tiin ramhnuaiah kal la, romei zam pawchek mai kar a, Farṭuah leh vaube vul chuk i hmu ngei ang a, a par zu tlana sava chi hrang hrang hlim em em hram chuah chuahte pawh chu i hre ngei ang le. Kan rama pangpar chi hrang hrangte zingah hian, farṭuah leh vaube hi, pi leh pute aṭanga thawnthu kan neih Thangsira leh Thangzaiate unau chanchin lunglen thlak tak nen a inzawm avang nge ni, Mizote rilruah hian thuk tak maiin hmun a luah a, ṭuahpui leh vau an vul leh ta, han tih ringawt pawh hian lunglen zunin min zem nghal chiai chiai mai a ni.

Thli fim thaw heuh heuh dawngin thing buk hnuaiah ṭhutna remin han ṭhu vang vang teh le, Chu, i hria em? I benga ri hriatna ni loin, i hnara rim hraina khan, "Herhse, khiang leh ngiau par rimin a rawn thawi deuh zauh zauh che chu, han hawi kual la, i awmna kiang velah khan, heng pangparte hi an parzu tlan nungcha hlim zia chu i hmu ngei ang. Ral leh lam maia chul ramte leh kham chhengchhia ṭhang leh phulin a bawh chukna hmunte pawh, chung phul leh ṭhang khawro em em te sawn he kan ram mawina hi an tinep chuang lo a sin, sawng kham chhengchhe tak mai chhawrdawhah te sawn, mawi em emin farṭuah leh vaube an vul chuk mai a, ṭhang ro eng ṭhat mai, meiin a kan awl em em mai turte pawh an va timawi si em. He ṭuahpui leh vau vul hian, kan rama kham chhengchhia mai maite pawh an va chei mawi tak em. Kan tlang ram par vulna, ṭhal khua eng riai romei karah, tih hlate hi a va dik tak em, ṭhian duh tak, he ṭuahpui leh vau vul chuk mai hian, engtin emaw tak chuan i lung a leng ve lo maw?. "Ka rawn fang leh hmana kan ṭuanna tlang, ṭuahpui leh vau an vul leh ta", i ti chuai ve raih raih mai dawn em ni? Lo ti ta pawh ni la, ka dem hauh lo che a nia. I lo ti lo a nih pawhin, he ṭhal boruak nuam tak mai, ṭuahpui leh vau vul chukna ramah hian nun hlui eng emaw tak chu i ngai ve ngeiin ka ring a ni.

He kan Mizoram nuam takah hian, fur leh ṭhal te, nipui leh thlasikte a awm a, heng hun hrang hrangah hian eng hun hian nge i lung ti leng ve ber le?. Kan hla phuah thiam tam takte hi chuan he ṭhal boruak hian an lungleng hle ni tur a ni. Romani pawhin, "Ṭhal awiin leltepa'n lenbuang a nghak, ṭhal tui ang kan nghah chu, kumsul vei leh lunglen, Dai lem ang maw, thinlai a zing riai e, khuareiah, Nunhlui ngaih leh hnutiang aw, nang ngaih lunglen a nem thei lo". A lo ti thlawt a sin. Rokunga pawhin, "Khu ṭhal lenkawl ni chhuk eng rii riai, ṭuahpui par leh vau, phunchawng par, Chungtiang len thiam kawlngo thla khawng ri, Lei rawngbawl kum siam an lo ni", a ti vawng vawng mai bawk a. Chuvangin, nang, chhiartu duh tak, He ṭhal boruaka ṭuahpui leh vau vul chuk hian i thinlungah eng emaw kawng talin lunglennain a zem ve che em?

Mizo lengzem hla phuahtu pakhat pawhin, Ngaihno bei leh lungkuai tak maiin "Ka rawn fang leh hmana kan ṭuanna tlang, ṭuahpui leh vau an vul leh ta, Kan sul i hnu khuarei an chang zo ta, Hring leh thar, hnah nemten lo bawm," tiin a lung no thei ang berin a chham chhuak a. Nula leh tlangval inhmel duhte tan chauh lo pawh, khua a lo ṭhal a, romei zam pawchuk kara ṭuahpui leh vau lo vul chuk mai ṭhin hi chuan, Mihring puitling chin tawhte tan hi chuan, he kan zo tlang ramah hi chuan, eng ti hawi zawng pawhin lunglen a kai tho hrim hrim zawng a nih hi.

- Hausanga Hauzel