A TAWPAH ISUA… (G-Z KHAWVEL)

Kumin 61st KTP General Conference 2026 Saituala neih pawh tluang takin a lo zo leh ta der mai. Data record-a ṭhalai sîngnga ai tam mahin an chhim thei te khan ṭhalai tam tak Pathian duhtu, thlarau lama tuihâl an lo la tamzia te hriat hian a lawmawm ngawih ngawih mai a ni. A kâr laka a hawklak leh nuam tawl zawnga khawvel taka lo chên te pawh awm tho mah se, a tam zawkin rilru leh tihtak zetin Pathian an au a, thlarau leh tisa lamah nasa taka piantharna an chang a ni tih a hriat.

Khawvelah hian ‘i han ti teh ang’ mahni duh danin leh hawina lam lamah, kan nuam tih zawng apiang ûmin, Pathian leh kohhran ngaihsak lêk lovin sapatal ve chiam chiam ṭhin mah ila’ng, a tawpah zawng Isua bawk kan mamawh leh ṭhin. Kan hlimna tur nia kan hriat kan ti a, nawmna nia kan hriat kan ûm a, a tawpah kan inpal tlu leh nge nge ṭhin a, mualphona bak min thlen lo a lo ni.

Kan ṭhiante, kan laichînte/ngaihzawngte lakah phatsan, hnâwl leh bum kan tâwk a, chûngte chuan rilru natna leh beidawnnaah te min hruai a. A châng leh ṭhalai ṭhenkhat kan tisa duhthlanna vanga kan thil tih te chuan chhûngte leh mi dang tuma hnêna sawi ngam rualloh pawi lian tak min khawihtir a. Vanduai palh phei chuan natna khirhkhân ber tawkin, mahni inchhirna leh pawi tihnain hun kan hmang ṭhin. Pathian laka inbun ruak tur pawhin kan thil lo tihsual tawhte leh kan lo awm khawloh tawhna zawng zawng avangte’n mahni inkiltawihna min neihtir ṭhin a. Amaherawhchu, Pathian chuan a fapa Lal Isua kal tlangin sual ngaihdam theih loh rêng a nei lo tih hi kan hriat a ṭha , eng ang pawhin lo daisual tawh ṭhin mah ila’ng.

G-z khawvelah hian thiamna leh finna a sâng tawh em em mai a, social media (khawvel tukverh) a chak a, internet kal tlangin reels, movies etc. tih vel nasa takin kan en a, western ho an ṭhalaite nun dan kan thlir nasa a, an incheinna, an rilru puthmang, an tawngkam hman dan etc. An nun dan a ṭha lam entawn tur tam tak awm zingah chûngte chu hmuh kânin a ṭha lo lam kan entawn nasa emaw tih mai theih tur a ni a, celebrity kan tih zaithiam, lem chang thiam, etc. te Pathian an hria tlohna, Pathian deusawhna lam rawngkaia an hla sak dan, ṭawng dan te nasa takin kan zir a, kan hriat loh kâr hian chûngte chu changkânna anga ngaihna, Pathian leh thlarau lama thutak rûnna chu ṭhing riaua ngaihna te chuan kan rilru leh ngaihtuahnaah bu a khuar nasa em em mai a ni. Chuvangin, sawi tâk ang khan he khawvelah hian mahni duh dan danin, nuam tihna lam lamah thlêkin han sapatâl ve chiam thin mah ila, Lal Isua tel lohna hmunah hlimna tluantling a awm ngai lo tih i hre thar reng ang u.

- Joel TT Laldinpuia, National Institute of Homeopathy, Kolkata