Mizo hnamin harhtharna leh siamtharna kan mamawh

Synod Hospital, Dur­tlang report-ah kumin January ni 1 aṭanga De­cember ni 7, 2019 thlenga data an neihah damdawi ina mitthi zawng zawng mi 268 an ni a. HIV kaihhnawih (HIV related deaths), zu kaihhnawih (alcohol related deaths) leh cancer dinhmun hetiang hi a ni -1. HIV - 66 (24.62%) 2. Alcohol - 42 (15.67%) 3. Cancer - 17 (6.34%) Synod Hospital chuan, "Kan hriat atana pawimawh chu - sorkarin cancer enkawlna changtlung tak a neih avangin kan hnen rawn thleng hi an tam lo a nih hmel a. HIV erawh Kohhran leh mi tlawmngaite thawhlawm tlingkhawm aṭanga enkawl - hospice ṭha tak 'Grace Home' kan nei tih kha ngaihdan kan siam thiam theih nan kan rilruah awm tel ta bawk se," tiin a sawi bawk. 

Mizoram mihring tam lam ṭhanna rate hi kum 2001 leh 2011 inkarah 22.78% a ni a, tun kum sawm chhung 2011 leh 2021 inkar (decade) ah phei chuan 23.48% ni turah beisei a ni. Hetih lai hian Mizo kan pung chak lo tiin Kohhran leh khawtlangah inthlah pung chak turin kan inzirtir mek lai a ni a, hetiang taka national decadal growth (Kum sawm chhunga India ṭhanna) rate 17.6% ai pawha kan ṭhan chak chhan hi hnam dangin min chim nasat vang a tih loh theih loh. 

Tunlai hian Hindu party BJP kaihhruai NDA sawrkarin kan ram leh hnam, kan sakhua min chimralna tur atana hmanraw hlauhawm tak CAB chu Mizoram chauh pawh ni loin Northeast state hoin kan duhlohna na taka kan lantir hnu pawhin Parliament-ah an kal tlangpui ta tho. CAB hian 6th Schedule leh ILP hmanna area min exempt tih avang hian ngaih ṭhat ngawt chi lohna chhan tam tak an sawi tawh a. Ka sawi ve duh chu India ram leh khwavelah Mizoramah chiah hian Chakma ho hian mahni ram, autonomous district council an neihna hmun awmchhun a nih avang leh Mizoram tribe list-ah an awm mai pawh ni lovin no. 1 an la ni leh nghal a, ILP-te hi an mamawh ve dawn reng reng lo. 

Chuvangin India ram an rawn luh theihna hmun Assam leh Bengal aṭangin a tawpah chuan Mizoram hi an rawn fuankhawm lehna tur tho a nih a rinawm a. CAB hi Mizoram tan hian Chakmaho chung­changah chuan Northeast state zingah kan tan a la hlauhawm ber tho tho. 

Tin, Mizoram Mainte­nance of Household Registers Bill, 2019 hman a ni ang a, emaw NRC-te avangin Mizorama awm sa Chakma-te chu kan hre hrang thei anga chutiangin an zalen lovang, kan ti a ni mai thei, amaherawhchu India ram constitution 6th Schedule 12B. (b) & (c) hi enin heng dan hmanga invenna tur te khian CAB hi an siamna chhan ber ngaih­tuahin CADC-ah hman a ni ve kher ang em, tih hi 100% in a guarantee lo. 

Kan hun tawn mek en hian Mizo hnam hi hun derthawng takah kan ding mek a ni. Buaina tam tak tunah hian kan hmachhawn mek zingah mahni insum theih loh avanga natna min thlentu AIDS, zu leh cancer avanga boral kan pung tual tual a, kan tana hlauh­awm tura kan ngaih ngai loh ṭhin hnam dangte chimral hlauhawmin kan awm mek a ni. Mizote hian a hnam angin harhtharna leh siamtharlehna kan mamawh tawh tak zet a ni. 

- Lalhruaitluanga Bawitlung