MNF SORKAR KUM 1 ENLETNA

MNF sorkar pawh kum 1 a tling ve ta reng mai. Inthlan boruak chiri tak a zova, buai nuai lova sorkar thar kan nei thei kha a lawmawm kan tih vek a rinawm. MNF party-in sorkarna nghet tak an siam thei kha an lawmpuiawm mai ni lovin Mizoram tan a ṭha a ni. 

Mizote hi a tam ber Kristian kan nih avangin a tam ber rinna zirtirna chu, dan nen a inkalh loh chuan, kan sorkarah pawh a lang tura beisei a ni. Hei hi India ram dan pawhin a remtih thlap a ni. Amaherawhchu, Rev Dr. F. Hrangkhuma chuan ‘intih Kristian lutuk’ a hlauh­awm thu a lo sawi a. Sorkar thar lawmluh program ‘oath taking ceremony’ neiha langsar ber chu Kristian taka thiltih tih kha a ni awm e. 

‘Oath of office’ kha Mizo ṭawnga neih/ lak a ni bawk a, Danin a remtih avangin a ṭha hle. Mahse, India constitution siamtuten a sawi dan tur uluk taka an lo duan, Schedule 3-a an lo dah hi kan zir chian chuan Pathian awm ringte leh Pathian awm ring lotena chhia an chham theihna tura duhthlan tur siam a ni a. Hei hi ka hriat sual loh chuan sakhaw tihbik nei lo India ramin sorkar thila ‘official’-a Pathian hming lamna tura ‘provision’ a siam awmchhun a ni. Pathian awm ring tan chuan helaia Pathian hming lam hi hmaih chi a ni lova, danin a phal thlap avang hian hman ngei ngei tur a ni ang. 

‘Oath of office’ Mizo ṭawnga letlingtu khan mak deuh maiin Pathian kan ring a ni tih ‘official’-a kan lantir theihna lai kha a hmaih vek a. MNF MLA chhia chham zawng zawng khan Pathian lam lovin ‘solemnly affirm’ tih tlukpuia lehlin ṭawngkam em pawh hmang lovin RSS Hindu pachal hmaah khan an intiam ve tawp a ni! Kan rinna hi kan zahpui tur a ni lova, a ṭulnaah leh a remnaah chuan sorkar hotute hian huai takin an dinpui ṭhin tur a ni. A remlohnaah te pawh a ṭul chang a awm thei ang. ‘Oath taking ceremony’-a "I do swear in the name of God" tih lai a tel lo kha Kristian rual MLA te chhechhamah chuan a Kristian lo hle a ni. 

MNF kan sawisel a, kan ‘Pathian Nung’ ringtu Chief Minister hlui pawh khan a sawi fo Pathian lam rik a remna lai ber ‘oath of office’ ah kha ama duhthu ngeiin a hmaih bawk a ni. Pastor Hrangkhuma'n in­thlan zawh vela, "Pu Zoram­thanga leh MLA hote, khaw­ngaihin sawrkar form-naah hi chuan intih Kristian lutuk pawh a ṭul lo ve. Lo cancel mai ula. In nunah leh hnathawhah lantir zawk rawh u," a tih kha ngaihtuah let leh hian lo sawi awm tak niin a lang. Nuna lantir chu sawi loh, ṭawngka pawhin kan Hnam Party hotute khan an lantir zo lo a ni a. CAB/ CAA chungchangah pawh NDA/ NEDA aṭanga inhnuhdawh intiamten an thu an sut a, a tawp thlenga ṭan ral raih intiam leh martar pawh huama inchhalin "he he" ti chungten Kristiante hnawk min ti em emtute political party sorkar chu an Hindutva hmalakna dan siamnaah lawm takin a vote pui lawi si a ni! 

Kan bul ṭanna hi a dik a pawimawh a, a dik loh fo chuan nget lian tak keima­hniah a awm tihna a ni thei a ni. MNF sorkar hi mipui thlantlin ni mah se, an dinna hi eng ber nge tih hriat a har hle. Anmahni siam buaina lian tak takah a kum 1-na chhung pawh hian an inhambuai ṭan ringawt a ni. 

- Matana Pachuau