AMC vote thlak ka phûr loh chhan
Aizawl Municipal Council a nih lai aṭang tawha Municipal Corporation a nih thleng hian kan AMC kal dan dik lo hi ka vei tawh a, ZPM hian an thlak danglam thei dawn a nih chuan ka vote ang a, ZPM pawhin tun thlenga an la sawi chhuah si loh avangin a sawitu an awm loh chuan kei leh ka chhungte chuan AMC vote thlak lovin holiday kan lo enjoy mai ang e.
Chu ka thil vei em em mai chu AMC sum kan hman dan hi a ni. Contract petu ka mae kan inti a, VC hunlai ang mai khan Municipal Council a nih hnu hian pawisa awm hi thil lian tham (asset) dinna atan an hmang lova, contract te tham sem sawm na mai mai a ni kan AMC hi. AMC hi a inthlak kual nasa tawh a, kei chuan VC u awrh pawisa heh si, chhiah la hnem si, dan siam taima mipui harsatna thlen tu niin ka hmu. In sak man a sang em em a, architect leh geologist rawih a ngai tiin dan an siama in sakna permit hmu tur in rei zet min nghah tir leh lawi si a, AMC hian mipui hi harsatna min thlen a ni.
Urban Local Body Grant lo lut hi a tlem tawh lo, a zat chu ka hre ve phak lo. Mipui aṭangin Property Tax min khawn a, kan motor park naah Parking Fee tam zet an la leh bawk a, heng pawisa hmang hian Party mite Contract an in sem a, AMC Corporator hlawh tlem te te ni si an lian thur thur a, an contract hnu hma a chhe em em a, hetiang AMC thlan hi ka duh tawh lo.
Keini ang ak zathnih hnuai lam rawng lo lehnghal pawhin kan vei hi chu ram roreltu leh khawpui roreltu ni chin hi chuan vei tur ah ka ngai a, mahse tun thlengin "AMC-ah kan tlin chuan AMC Kalphung kan ennawn ang" ti ngam ka la hmu lo, ZPM hian MLA inthlan dawna Kalphung Thar an zawrh kha an la sawi rik pawh ka hre lo AMC atan hian.
ZPM hian sawiselna tur tam tak (kei pawhin ka hre nual) an nei chungin Mizoramah Change an siam ngam a, AMC ah hian an ngam dawn em? Advertisement chhuah lova hna an la lo ngam hi ZPM sorkar ka fakna a ni. Aikal an titawp ngam hi ka fakna a ni. Minister-in motor kawl duah duah (5-te an kawl ṭhin tun hma khan) an ti tawp pawh hi ka fakna a ni. Mipuiin Electric Bill kan ba miah lova Sorkar zawk in a lo ba ṭun ṭun ṭhin an tih tawp ngam avangin ZPM sorkar hi ka fak, ZPM chu ka ni hauh lo. MNF leh Congress inlal chhawk khan eng Change mah an siam ngam lova, eng danglamna mah kan hmu ngai lo.
ZPM hian AMC ah hian Change siam ngam turin au se, Kalphung Thar an tih hi AMC Parking Fee khawn dan ah lang se (paking fee khawn tu hming phena Corporator awm kuk hi tih bo ngam a ngai), ZPM hian AMC Contract hna thawh dan hi kan tidanglam ngam tiin puang se, ZPM hian Corporator a huhova mipui pawisaa zin duah duah kan titawp tawh ang ti ngam se, ZPM hian AMC hi siam ṭha ngam tiin au se ka vote ang. Tun thlengin Kalphung Thar an la aupui lova, AMC a ngai ang bawka kal tur vote chhuah ai chuan vote thlak loh la thlang zawk ang.
AMC tel lo pawhin Aizawl hi a kal thei, Property Tax contract tenaua hmang zo leh mai mai tur, Contract sem kual vak vak, Parking Fee lâk hmanga a ruka invulh, hlawh phu lova che lian Corporator vote tlin hi kan bat a ni tawh lo.
- HS Lala