THE BIBLE SAYS SO! LAL ISUA'N ISRAELTE LAL A NI TIH A PUANG!

Hmasanga Lalpa Pathian zawlnei pakhat Zakaria an tih chuan Israel-te Messian, mipuite hnena a inpuan hun tur sawiin "Aw Zion fanu, nasa takin hlim la; aw Jerusalem fanu au chhuak rawh! Ngai rawh i Lal i hnênah a lo kal e; mi fel a ni a, hnehtu a ni; inngaitlawm takin sabengtung chungah a chuang a, sabengtungno chung ngeiah," tiin a lo puang a (Zak 9:9).

He thu ngei hi la chhuakin Matthaia leh Johana chuan an Chanchin Ṭha ziakah hian an sawi lang a (Math 21:4,5; Johana 12:14-16). Marka leh Luka pawhin zawlnei awka tia sawi lang lem lovin sabengtung chunga a chuan thu an sawi ve tho va (Marka 11; Luka 19). Marka hian Sâm thu la chhuakin "Lalpa hminga lo kal chu" a ti a. Hei hi Messia sawina a ni tho va; kan BSI Bible-in "Ram lo thleng tur" a tih hi Davida thlaha lo piang tur Messia Lalram (kum 1,000 lalram) sawina a ni (Marka 11:9,10). Israel mipuite hian an tana lalram lo la thleng tûr (II Sam 7:16; Jer 30:8,9; Luka 1:32,33) kha Lal Isua rawn thlentîr tura beiseiin auhlaah an hmang bawk. He hun pawimawh tak, Israel mipuite rilru inhawn nî ngei hian zawlnei Zakaria khan Israel-te lal chu sabengtungno chunga chuangin an Messia ngei a nihzia mipui vantlang hmaah a puang dawn a ni a lo ti a ni.

He Lal Isua inpuan hun hi Israel-te history tur Gabriel-a’n Daniela hnêna a lo sawi, Daniela Hapta 7+62-na ral hnu, mahse, hapta 70-na thlen hma sia lo thleng a ni. He ni hi hapta 69-na ralna ni a nih chiah chu. Pathian remruat dana Lal Isua’n mipui vangtlang hmaa Israel-te messia a nihzia a puanna chu a ni. Daniela Hapta (Israelte history) hi Persia lalin BC 445 (circa)-a Jerusalem leh Israel mipuite indin thar lehna tur thupek a chhuah a. Chumi hun atanga chhiar chhoh zelin, Juda-te kum chhiar anga ni 30 zel thla khata chhiara kum khat thla 360 zela kan chhiar chuan, hapta 7+62 chu kum 483 a ni a. Kha kum 483 ral nî tak kha Lal Isua’n Israel-te messia a ni tih a puanna nî tura Pathianin zawlnei Zakaria kâa a lo sawi lawk chu a ni. He ni pawimawhna chu, mihring tisa taksa hmanga Pathian lalram (chhandamna) thu puanna tur hun hmawr a lo ni ta. A bak kha chu khawvel tana a nun pe tura taksa leh thlarauva inbuatsaihna hun, krawsa a nun hlan tura rilru leh thlarauva inpeihna hun a ni. A hnu Zirtawpni chuan kan tan a nunna a pe ta.

He nî hi chutiang taka pawimawh leh ropui a nih chu kan hrethiam tlang phak lovin a va lang êm! Palm Sunday kan ti mai em ni? Lalropuia tih tur kha Lalrova ti ta mai ila, a hming ropuina a lang lo a ni. Palm Sunday ti mai lo hian ka hotute hian thu inhmeh tak phuah chhuah tur an hre ngei ang! Kan Lalpa khan mi nazawngin Messia a nih an puan an sawi kual mai mai kha a uelkam lo. Rawngbawl paha Messia a nihzia a sawi zauh zauh bak kha chu pa Pathian ruat hun dik takah amah ngeiin fiah leh chiang taka puan a duh. He Messia a nih a puanna nî hi Palm Sunday, Tumkau Pathian Nî lo tihsak mai hi chu a dik deuh lo a ni! Lal Isua’n Israel-te Messia a nih a puanna nî a ni si a!

Kan thu pahnihna atan chuan, Pathian chuan kan Lalpa Isua hi mihringte hremhmun laka chhan chhuaktu mai atan ni lovin, an chunga lal ni turin a ruat a ni. Hei hi chian a pawimawh em em a ni. Lalpa Isua hi chhandamtu a ni ringawt lo, lal nihna a tel tlat. Chhandamtu Isua ni ringawt mai lovin lal leh chhandamtu alâwm a nih! Bible pawhin, "Amah ngei kha Pathianin lalah leh chhandamtua awm atan a dinglamah a chawimawi ta,” a tih a nih kha (Tirh 5:31). Lal a nih a puanna hi keimahni min hmachhawn ngeiin a puangah i inngai ang u. Lal Isua hi i lal atan i neih loh chuan, i la piangthar rih lo a ni e, inngaihtuah nawn leh teh aw!

Kan CM hming hi Lalduhoma a ni. Lal ringawt ni lovin, duh mai ni lovin, oma (awma) pawh ni mai lovin, Lalduhawma alâwm a nih. Chutiang bawk chuan kan Lal Isua hi lal leh chhandamtu alâwm a nih! Kan tun lai khawvela evangelical theologian, Pathian thu lama khawvela hming lang tham Rev. John RW Stott-a chuan Isua hian i lal a nih avanga chhandam thei che a ni," a ti. Hei hi Bible sawi dan a ni.

Kan Lalpa duh tak chuan i lal nia chhandam che a duh e! I nuna lo luha chatuan nunna pêk che a duh e! Khawvel zawng zawng lal a nih hun hi a lo thleng thuai dawn e! Tunah I lal lo ni rawh se. Amen!

- Upa F. Lal Thanzuala, 9436141242