MNF politics tui nû bawk

Dt. 5.03.2026 khan Dr. Vanlalthlana demand Assembly House-ah sawiho a ni a, pass a ni. Hemi nî tak hian tun hma politics khelh dan ṭha lo leh nû tak bawk her lumin Vanapa Hall kawtah MNF an inhâwr khawm a, Education Minister chhuanawm leh zirna siamṭha mêktu Dr. Vanlalthlana chu bâng turin an lo nawr ve leh ngawt a nih kha!

Chhan mumal a awm lo

MNF-te’n Dr. Vanlalthlana bâng tura an tih khan chhan mumal tak han hlin nalh tur an nei lo. Dâwta an puhna leh an MLA pakhat rinawm lohna leh dikna (integrity) tlâkchhamna vanga Assembly House thu, mipuia puanzar loh tur dan kalha press mite hmaa dik lo taka a lo puanzar vang mai a ni. A puangzartu DDK pawhin ngaihdam an dil kha.

Politics tui nû hmangtute hian sawi zui tur an hre lo. Minister hnathawh hi mipuiin an fak a, zirna lamah a hniam lam leh Higher & Technical Education Department chang telin, a sâng lamah hmasawnna a takin a thleng mek tih tlâng hriat a ni bawk. Hetianga mipui fak rawn taka hi Assembly budget session neih laia a demand sawi nî taka pawn lama lo beih chiam hi MNF-te’n an chîng ve hrim hrim. Awmzia a awm lohzia hretu chu anmahni bawk an ni ang.

Chief Minister beihna

March ni 12, 2026 khan MNF Gen. Hqrs. lam mi 30 bawr vel an ṭhukhawm a, a kar leh 16.03.2026-a Chief Minister demand sawi huna CM beih dan tur an rel leh ta! Ruling beih dan tur rêl reng rengin kumin budget session chu MNF hi an lo buai a ni ber mai.

CM Pu Lalduhoma dâwt sawi bu siama hàl an tum a, MNYF chu a bu siam kawnga hma lo la turin an ti a. Ka hriat sual loh chuan, tlawmngai pawl lian leh kohhrante pawhin hetiang thil hâl politics hi an ngaimawh thu an lo tiri fo tawh a ni.

'Dâwt sawi bu' han tih dawn chuan kum 15 lai CM lo ni tawh, a unaute pawisa cheng nuai 909 pawh a account-a lo kawl thei ngat dâwt sawi hi hâl dawn ta ila, ni tin hâl tur a awm ang. Chakai farm, Switzerland of the East, MIP, cheng nuai 3, BAFFACOS, thingpui sihna khawl 'chiat' tia sik zo duak thei, mau hrim hrima dâwt sawi tam lutuk mai te, airport cute ber, kawng chhâwng, unaute pawisa nuai 909 kawl, Aii Pûk, leiverh... a tam lutuk mah mah a ni e.

Tlipna

MNF sorkar apiangin corruption avanga buaina lian tak hi a thleng ziah, ti ila kan sawi uar lo ang. Mipui nâwlpuiin social media thlenga an au chhuahpui chu MNF hunah chuan eirûkna leh uchuak taka chhungte leh mahni hnaivai induhsakna a ni. Hengte hi thlir ila, hnam party inti ngam chi niin an lang tawh lo a, anmahni pawhin hei hi an hauh (claim) ngam tawh hek lo!

An term hnuhnung ber pawh kha eng dang vang ni lovin, eirûkna thawm tam lutuk vanga tla niin an sawi fo a nia.

~ Zoa Tlau, Buannel Cabin