KRAWSA ISUA

Isua kha AD 30 (Hemi kumah hian Kalhlên Kût hi Zirtawpniah a tla), April ni 7-ah krawsa khenbeh niin, tlai lam ni tlak hmain Josefa leh Nikodema te ṭhian dunin an phûm a (AD 33, April 3 pawm an awm bawk). Khêngbet tura thu petu, Pontia Pilata kha AD 26-36 inkara Judai ram awptu a ni a, a ní tak hi chiang taka sawi ngam harsa deuh mah se, a hun chhungin Isua hi khenbeh a ni tih erawh a chiang. Isua hming hi Hebrai ṭawng Yehôšû tih aṭanga lo kal niin, ‘Yahua’n a chhandam’ tih emaw, ‘Yahua chu chhandamna’ emaw tihna a ni. Vantirhkohin Josefa hnena Mari chungchang sawi a, “Fapa a hring ang a, a hmingah ISUA sa ang che; ani chuan a mite chu an sualte lak ata a chhandam dâwn si a,” a tih lai khan Isua hming awmzia dik tak kan hmu a, chhandamtu a ni.

Krawsa Isua khan a hming awmzia bakah tirh, hriakthih (Messia/Krista) a nih chhan dik tak a rawn tarlang a, a hlen chhuak bawk. Thuthlung Hluiah Zawlneite kâah puan lâwk a lo ni tawh a, amah pawhin a sawi fo. “Mahse, ani chuan kan bawhchhiatna avângin hliam a tuar a, kan sual avânga sawisak a ni; muanna kan neih theih nân hrem a tuar a, a vuak tuar chu kan tân damna tûr a lo ni,” tiin Isaia chuan krawsa Isua hnathawh kha min hriattir a. Isuaah chuan tlanna–kan sualte ngaihdamna famkim, chhandamna chu kan lo hmu ta a ni.

Krawsa Isua khan thil hrang hrang pasarih a sawi a, tawi te tein kan zir dawn a ni.

“Ka pa, anni hi ngaidam rawh, an thil tih hi an hre lo a nih hi,” tih hi krawsa Isua ṭawngkam hmasa ber a ni a, ṭawngṭaina a ni. Khawvela a rawngbawlna kha ṭawngṭainaa bul ṭanin (Lk. 3:21), ṭawngṭaina bawkin a khâr a, Isua nun kha ṭawngṭaina a ni. A hun tawp thlengin ngaihdam min dilsak a nih kha. Ṭawngṭaina thlen phâk loh a awm lo va, rawngbawlna hlu tak a ni. Bawhchhiatna avanga thiam chantir ngai kan nih anga kan mamawh, ngaihdamna kan hmu a, tihdam kan lo ni ta! Ngaihdamna hi damna niin keimahni avanga nâ, Pathian ngei pawh a lo dam ve ta bawk. Isua hi kan zavai tana damna famkim–ngaihdamna a nih angin inngaidam tawn a, kan kianga mite’n chhandamna an lo chan ve theihna tur atana beidawng lo leh tawpsan ngai lo tur kan ni.

“Tih tak meuhvin ka hrilh a che, vawiinah hian ka hnenah Paradis-ah i awm ve ang,” tiin a kianga mi sual an khenbeh chu ngaihdam, chhandam a nih thu Isua’n a hrilh a. Amah ngei chu chhandamtu ber a nihzia kan hmu. Inchhîra simna tak tak nena Pathian lam hawi a, rin tlat hlâwkzia kan hria a. Thiltih vang ni lo, rinna avanga khawngaihnaa chhandamna kan hmu a ni. Tlai a awm lo va, tun hun erawh hi chu a ṭha ber reng fo vang.

“Hmeichhia, en teh, i fapa kha! ...En teh, i nu kha!” tih Isua ṭawngkam hian Pathian thinlung, hmangaihna min zirtir a, kan laichìnte leh kan kianga mite hmangaih hi Kristian zirtirna a ni reng. Kraws bulah khan Isua nu, Mari leh zirtir Johana te an ding a, a nu venghima ina hruai haw turin an intir a ni. Rinna hi hmangaihna leh mawhphurhnaah te a lang chhuak ṭhin. Hmangaih Johana hi Isua kohhran thar aiawh a ni. Kohhran hmasa chu a thi tawh a, Mari hian kohhran hluia a ṭha lai Thuthlung Thar kohhrana lak luh a entir thung. Thil hlui kalsan a, a thar pawm leh nun thar inzirtirna kan ti thei bawk ang.

“Ka Pathian, ka Pathian, engah nge mi kalsan?” tih hian Isua’n mihring anga kan tana a tawrhna râpthlâk tak te, sualna zawng zawng a phurh zawh tâk vek avanga Pathian lak ata hrang ta daih ang hiala a awm thu te min hriattir a. Mihring takin a tuar ve a, keimahni min tuarsak a ni. He laia Isua ṭawngkam hi Sam 22-naa mi kha a ni a, Estheri pawh khan a mite tuar tur kha a vei a, ni thum chaw a ngei lai khan a ni khatnaah, “Ka Pathian,” tiin a au va. A ni hnihnaah pawh, “Ka Pathian,” tiin a au leh a, a ni thumnaah chuan, “Engah nge mi kalsan?” a ti ta a. A tawpa ring taka, “Ka Pathian, ka Pathianin a kalsan,” a tih veleh khan Pathianin a chhang a ni. Hetiang hi a hun lai khawvela mite hriatthiam leh pawm dan a nih angin Isua au pawh kha mangan vang lam ni lovin, hlawhtling au angah ngaih a ni. He dam chhung atan mai ni lo, chatuan thlenga hlawhtling tura a kawng zawh leh tuar kha a namailo hle a, Pathian pawh awm ta lo ang hialin a lantir ve thei a ni zawk.

“Ka tui a hal e,” tia Isua dilna khan keimahni ang mihring a ni tih a tarlang a, Sam 69:21-na thu thlen famkimna a ni. Krawsa Isua khan mihring takin a tuar zo ve vek a, chuvangin kan nat tinrêng hi min hriatpui thei a, eng dinhmun aṭang pawha belh tlak a ni. A dang ro tihreh nan leh eng emaw a sawi leh theihna atan tui a mamawh a ni ang an ti bawk.

“A kin ta,” tih hi tirh a nih chhan zawng zawng a hlen chhuah tâk vek thu Isua’n a puan chhuahna a ni a, engkim hnehin a awm ta tihna a ni. “A lu a kûn a,” tih nena kal kawp a ni a, mahse, hei tak hi chu Johana chauhin a sawi thung. A hna zo fel vekin thlamuang leh hahdam takin a châwl ta tihna a ni. Chhandamna hna chu kan tan thawh zawh a lo ni ta!

“Ka Pa, i kutah ka thlarau ka kawltir e,” tih hian kan sawi tawh angin, harsatna leh manganna, hrehawm tinrêng karah pawh Pathian ṭanpuina hmuh thar leh zel ṭhin avanga thlamuang tak leh ngaihngam, lungawi taka chawlhna, Pathian hnena inhlan zawh vek theihna a entir a. Isua chu manganna tâwp lovin tlâkbuak ve mah se la, a rinna a derthâwng ve lo va, chatuan atan vawi khat chauh muhil ve turin Pa kutah a inpe pumhlûm ta a ni.

Kan thupui, ‘Krawsa Isua’ tih ang hian vawiina ringtute hi krawsa mi kan ni ve tur a ni. Krawsa Isua zirtirna leh hnathawh zawh tâkte hi uluk takin ṭawngṭaina nen zir nawn fo ila. Kristianna ṭha zawk, ringtu nun duhawm leh rah chhuak lehzual kan hmu thei ang. Kraws pû, Isua tihtheih tlem turzia kha, a taksaa che thei awmchhun a ke pawhin pan lam a nei a. Kraws-ah phei chuan Pathian duh záwng chauh lo chu eng dang mah tih theih a ni lo. Kraws thu hi thilsiam zawng zawngte tan Chanchin Ṭha a ni a, vawiina ringtu, kohhranhote nun hi a ni tur a ni.

- H. Lalroluahpuia