Health care scheme leh ration card

MUHCS-a inziah luh tum ve avanga kumpui linglet lo buai ve tawh ka nih avangin eng emaw ka'n sawi ve mai mai ang e. India sawrkar laipuiin ration lak dan leh sem dan vel a tih danglam avangin, nikum 2025 March thla vel aṭang khan ration card siam leh siam ṭhat, update vel hi a harsa ta em em a. An khawl hman lai chu India ram pumah an hmang fumfe hlei thei ta lo a ni. Eng emaw tihfuh ni chuan thil eng emaw update theih chang chu awm ve bawk ṭhin mah se, hming ziah dan tih danglam erawh chu tun thleng, he thu ziah lai, March 2026 thla tir thleng hi chuan a la tih theih loh a ni.

Tunlai khawvel changkang leh thil tih dan danglam chho zelah hian, chhan hrang hrang avangin mihring hming ziah dan pawh tih danglam a lo ngai fo ta si a. Mahse, chutianga document hrang hranga kan tih danglam tawh hnu pawh chu family ration card lamah chuan a lo tih danglam ve theih ṭhin ta si lo va, a buaithlak duh khawp mai.

Mizoram Universal Health Care Scheme, MUHCS hian ration card hi chhungkaw member proof document atan a hman avang leh, ration card-a kan hming chuan dan ang ang chu MUHCS chhawr theitu tur an nih thu chu an sawi dan a ni bawk si a. Keini chhungkua pawh hian kawng hrang hrangin ration card update ngai kan nei ve nual a. Mahse, kan duhthusama kan update theih loh avangin nikum 2025 khan kan inziak lut ve thei ta lo a ni. Thil ṭhenkhat chu tunah chuan update thei tawh mah ila, kan nau pakhat hming hmalama a hnam hming lamtawi chu, a hming hnunglamah a lampuma kan dah tak avangin document hrang hrang, Baptismal certificate, Birth certificate, Aadhaar card leh school document thlenga kan tih danglam tawh chu ration card lamah kan la ti danglam thei leh chuang si lo va. Kei, thil reng reng hi fel leh dik thlapa tih duh mi leh, thil dik thlap mang lo chu hlauthawng hma mi ka lo nih bawk si avangin, kumin, 2026 pawh hian inziak lut leh lo mai ang u, ka lo ti leh hman tawh a. Tin, tunlai internet leh digital khawvelah hi chuan thil pakhat lek diklo pawh hi avaia buai thei niin ka lo ring ve bawk si a.

Engpawh nise, Health Care Society hotu lamte hi kan dawr ve chhin hrim hrim phawt teh ang, ka ti a. CEO leh Dy. CEO chu an ṭul em avang leh, Assembly session lai lo ni bawk nen, ka hmu hlei thei ta lo va. Mahse, an PA te chuan ka zawhna eng emaw zat chu min chhang thei tho va. Coordinator ka hmu a, Public Informatic Officer pahnih a hran ve vein ka hmu bawk a ni. Keima problem vang ngawr ngawra hmu pawh ka ni chiah lo va, thil reng reng hi hriat fiah chian ka duh ṭhin bakah, mipui nawlpui tana hriat tur ṭul leh mipui nawlpuiin kan hriat ve loh thil eng emaw awm theite ka zawt a ni. Kei hi mi chekngel leh ti kher kher, thil hriat kilkelh duh mi ka lo ni si a, zawhna pawh ka ngah hle a ni. Anni lahin fiah tak leh chipchiar takin min hrilh thei zel bawk a, ka lawm hle a ni.

Sawkar hnathawk lai zingah tunah chuan kheuhbeuh bik harsatna siam an awm tawh loh thu min hrilh chuan min ti lawm lehzual a ni. Pensioner-te erawh an buaithlak deuh thu min hrilh a. Hei hi chu ka lo hriat ruk tawh deuh sa kha a ni a. A hmaa pensioner ṭhenkhat ka lo titipui nual tawhte ṭawngkam aṭangin, hahthlak deuh eng emaw zat chu an awm ngei niin ka lo hre tawh a ni.

Kan thu sawi zawng zawng erawh chu heta sawilan vek a ṭul kher lo ang a. Ka hlauhthawn lai ber, hming ziah dan tih danglam chungchang kha chu, an ration card-a an chhungkaw member ngei a ni tih hriat theih tho, hming leh hnam hming ziah dan tlema danglam deuhte kha chu, Mizo leh Mizo inkar, Mizo chhungkaw dik tak angah chuan kan pawm, (approved) mai zel, an tih tak avang leh, a pawm theitu, approval authority chu anmahni an nih thu min hrilh hnu chuan, phur takin, khaw nge, chuti chu ka han inziak lut ve ang e, tiin, MUHCS inziah luhna in chung lam, MUHCS chhawntute awmna lam chu ka han pan ta a. Mahse, an call center hote computer lamah chuan, nikum 2025 October thla leh, kumin 2026 January thlaa thil ṭhenkhat ka update leh hming ka ziah belh hote chu MUHCS khawl lamah chuan a lo la in-update ve reng reng lo tih chu ka zuk hmu leh ta. Anni'n, heta inziak dan ang chiah chiah hi a hmang theitu turte an ni, an ti bawk si. Ka buai zo leh ta.Tin, Supply department lamin ration card an update chu an khawl lama a in-update ve nghal mai ngai loh thu min hrilh bawk avang chuan, inziak lut lo bawk chuan Supply department office lam chu ka pan ding leh ta nghal vang vang a.

Supply deparment Additional Director chuan ṭha takin mi lo dawngsawng a. " Ration card siamna khawl ṭha thei lo avanga mipui harsatna tawh hi kan hre reng a, pawi kan ti em em a ni. Central lam hotute pawh kan be pawp reng a, tun, 2026 March thla hi min lo ngaichang leh hram rawh u, an la ti a" a lo ti a. Tin, MUHCS lama a in-update ve nghal mai ngai lo chungchang ka sawi chu, a khawihtute a phone nghal a. Anni khan update nghal zel hi a buaithlak bakah, pawisa chawite a ngai a, an rawn ti niawm tak khan ka lo hre pha ve deuh va. JD chuan, " Ka pawisa-in kan ti mai dawn em ni? ' te kha a ti ta hial a. Sawrkar hnathawkte rilru pawh chu a lo va changkang ta em em ve maw le, tiin, mipui tana a inpekna chu ropui ka ti hle a, an hotupa Supply Minister a chhun mang e, ka lo ti rilru hial a ni. Sawrkar ṭha hnuaiah chuan mipui leh sawrkar hnathawkte rilru pawh hi a lo ṭha ve mai zel a, sawrkar ṭha hnuaiah chuan mipui tam zawk leh sawrkar hnathawkte rilru pawh hi a lo hrisel ve mai zel a lo nih hi, tih bawk chu ka rilrua thil lo awm leh ta chu a ni.

Nikum 2025 lama ka thu ziah pakhat, ration card siam tura mi tam takin hmun hran hran aṭanga DCSO office kan pan thlawn zin zia leh, pan thlawn buai ngai lo tura a thawktute phone number ka dil chu, DCSO office pahnih, Aizawl East leh West office-a thawkten min pek phal loh thu chanchinbua ka ziah chu a lo hmuh thu leh, an staff-te a hauh thu leh, "Ka phone number hlir lo pe tawh rawh u," a tih thu min hrilhte chuan min ti lawm hle a ni. Update nghal chungchang bawk kha kan sawi leh a, April thla lama update thei tur ang deuh khan an sawi nia ka hriat avangin, ' April ni 1 aṭanga hman theih turin tunah mipui an inziak lut mek a, tuna update nghal a ngai ang' ka ti a. Tichuan, a tuk, Febuary ni 27-a MUCHS office lama ka zuk en leh chuan, Supply office ka kal ni, nimin Febuary ni 26 ni la la chuan an lo update ta thlap a ni tih chu ka zuk hmu ta a. Tunah chuan keini chhungkua pawh MUHCS 2.0 hnuaiah kan inziak lut ve ta thlap e.

Hetia ka zawh kual vel hnu lawk hian LPS Vision lam chuan chiang zawk leh chipchiar zawka an rawn zawh kual leh tak tho avangin mipui chuan thil tam tak kan lo hre fiah tawh ngei ang.

He ka thu ziah hi chanchinbua a lo chhuah hun meuh chuan ration card siamna khawl pawh a lo tha vek tawh mai thei a, tin, MUHCS inziah luh hun pawh a lo tawp tawh mai thei bawk. Mahse, thil eng emaw sawi duh ka neih chu- MUHCS-a kan inziah luh lai taka an khawla kan hming inziah dan ang chiah zelin Damdawi ina kan inziah luh hunah pawh kan hming ziak lut ṭhin ila, buaina a awm lo deuh ang, ka ti deuh a ni. Tin, Central lam danah chuan ration card hi eng document dang atan mah hman phal loh, buhfai lakna tur atan liau liau chauh a ni chung hian, (Supply dept. JD min hrilh dan phei chuan, he thu hi hawrawp dum lian ngatin a inziak, a ti nghe nghe a ni) Mahse, chhungkaw member proof nan, hmanlai Mizoram buai lai aṭang tawha sipai ho lo hman ṭhin tawh a nih avangin, tunah pawh kan la hman zel avang hian, tu pawhin ration card-a kan hming ziah dan hi fimkhur a ngai hle a ni. Tin, supply department lamin an update apiang hi MUHCS lamah update ve nghal zel ni bawk se. Hming ziah dan tlema tih danglam deuh pawh kan hrethiam mai zel an tih avang erawh chuan, dawt chiang taka thil dik lo tih tum chi chu a ni chuang lo a nia aw. An lo hre dawn tho va, mualphona mai a ni ang.

Thil pakhat- MUHCS hmang tur chuan empaneled hospital leh sawrkar hospitala luh a ngai an ti si a. Mahse maw, a nihna takah chuan, tun dinhmunah chuan kan sawrkar hospitalte hi manganna tak takah chuan an la pan tlak loh a ni ber e. Kawng engkimah private hospital thate nen chuan an la inthlau lutuk a ni. Civil hospital chu an nihna ang ang leh an thiamna leh an theihna ang angte, an khawl leh hmanraw neih ang angte, an mi thiam neih ang angte pawh hi, zan lamah chuan hman theih loh leh chhawr theih loh an ni tlat zel thin si te hi a lungchhiatthlak lam deuh chu a ni e. Zan lamah chuan a junior deuh niawm tlemte an awm a, zan lama an khawl leh hmanraw hman theih awm chhun enkawl tur pawhin, technician junior deuh leh inzir chawp niawm takte, chu pawh tlem te chauh an la duty thin te hi a la beidawnthlak lam chu a ni e.

Kei pawh, hetiang MUHCS thil vel ka buaipui lai tak, 2026 Febuary ni 27 zan khan emergency-in Aizawl Civil hospital kan pan a, ka pum vawi khat xray turin darkar khat dawn, vawi enge maw zat an ti nawn a ni. Chumi hnu zan rei lamah ultrasound ti turin private lamah, a titu tur doctor phone chawpin min tir leh ta a. Mahni alo maha nat tawh nak alaiin hreawm duh tak a ni. Chutah engmah vak tih ngaihna hre hek lo, in duh leh naktuk lamah surgeon doctor hmu ve hrim hrim ula, tih chu kan inthlahna a ni ta a ni. A na a zual zel si a, zanlai dawnah Ebenezer hospital kan pan leh ta a. Anni'n a zan la lain engkim investigation an ti nghal a, a tukah ka pum chu a vawhnih nan min zai ta a ni. Ebenezer hospital kha pan ta lo ila ka thi pawh a ni mai thei a ni.

Hmana min zai hmasak tum pawhin hetiang deuh chiah hi a lo ni tawh bawk a. Ka pum na lutuk, din pawh ding thei tawh mang lo chu Aizawl civil hospital kan pan a. OPD clinic-ah mi dang ang thoin rei tawk nghah hnuah min en ta chauh a. Khum an neih loh thu min hrilh bakah, na chhawkna min chawh a, a nat viau chuan lo kal leh mai tura min tiin min hawtir ta a. Nilenga a nat lutuk zel avangin tlai thim hlimah casuaty-ah kan han kal leh a, tihngaihna vak awm hek lo, Durtlang pan mai tura min lo tih angin kan pan ta a. A tukah ka pum chu an zai ta a. Ka kawchhungah ka rilphir chu a lo puakkeh hman a ni. Rilphir puak hi an thi thin an ti khan ka lo hre thin a, mahse, kei chu ka thi lo a nih kha.

Aw le, kan sawrkar tha tak hian private hospital changtlung leh thate hi inremna siampui thei hram se ka ti hle mai. A rate thuah pawh private hospital-te lungawi theihna ang chu sawrkar pawh hian pawm mai se, chu chu tumahin lo sawi buaiin lo itsik lo bawk ila tih hi ka ngenna a ni e. Natna leh nunna thua kan han mangan tak tak hi chuan damdawi in tha kan pan lo thei thin si lova.

Tunhma deuhva ka rawtna pakhat, private hospitala in-admit-te chu vawikhat an luh zela an senso zatve chiah zel sawrkarin a tum thei ang, tih kha a awlsamin kan lungawi tlang thei tawh mai lo maw?

- K. Hmingthankaia