THE BIBLE SAYS SO! PIANGTHAR LEH PIANGTHAR LOTE THAWHLEHNA

Thawhlehna thuah hian taksa thawhlehna leh thlarau thawhlehna hi Bible hian min hrilh a. Thlarau thawhlehna chu piantharna, chatuan nunna kan channa hi a ni. Chu chatuan nunna chu sual sima Lal Isua rinnaa neih a ni tih Bible chuan min hrilh (Eph 2:8,9).

Piangthar lote erawh chu, "Boruaka thuneihna lal, tuna awih lo fate (piangthar lote) chhunga thawktu’ a tih ang hian Setana nena inzâwmin an la awm ta reng a (Eph 2:2). Boruaka thuneihna lal tih hi Setana sawina a ni. Piangthar lova a thih chuan chatuan meidilah paih a ni ang; thu leh a awm tawh miah lo vang!

Piangtharte erawh chu an thih khan an thlarau chu Krista hnenah hruai an ni a, vanah Krista hnenah an awm ta. Kolossa kohhrante hnenah khan Tirhkoh Paula chuan Kolossa ringtute chu, “In thi tawh a, in nunna chu Pathianah chuan Krista hnenah thuhrûkin a awm si a," a tih kha (Kol 3:3). Piangthar lo thi tate chu mitthi khuaah na tak tuarin mei alh zînga hrehawm ti êm êma an awm lai khan (Luka 16:19-24) mi piangthar thite chu Paradis-ah Lal Isua hnenah nuam leh thlamuang takin vanram nawmzia an chên ṭan ta a ni.

Heng thu hi Bible-in a sawi chiang em em mai. Kohhran hotu ṭhenkhatte hian piangthar ngeia kan rinte pawh thlân khur chhunga Lal Isua lo kal lehna, thawhlehna nghaka lo awm reng turin an chham hnanin an vui liam fo mai ṭhin! Piangthar thite chu vânah Krista hnenah an kal ta hmiah a, an taksa erawh chu thlânah kan phûm mai a ni zawk tih hre chiang ila a ṭûl hle.

Thlarau lam thawhlehna chu duh tawk ila, taksa thawh lehna i lo sawi teh ang. Thuthlung tharah hian taksa thawh lehna hmun li-ah kan hmu a. Piangtharte taksaa an thawh lehna ṭum thum leh piangthar lote meidil tuar tura thawh lehna pakhat kan hmu.

1) Lal Isua’n thihna ata a thawh leh khan hmânlai lehzual leh OT huna mi thianghlim thi tawhte kha taksa puin a kai tho (Math 27:52,53).

2) Mi thianghlim lâwr hunah khan ringtu thi tawhte thlarau a hnêna awmte chu (I Thess 4:14) a rawn hruai thla ang a, a kai tho hmasa ang tih a nih kha (v.16). He hun hi khawvela hun lo thleng tur ropui ber pakhat a ni a, chu hun chu tûnah hian kan nghak mek a nih hi. He hunah hian piangthar thi tawh leh la dam zawng zawngte kan tel vek ang a, kan tam hlein a rinawm. Nang i tel ve dawn em?

3) Evi leh Adama hun aṭanga Lal Isua an khenbeh thlenga mi thianghlimte taksaa kaihthawh an nihna leh ‘rapture’ huna mi thianghlim thi tawh (piangthar) taksa ngeia kaihthawhna (leh piangthar la dam zawng zawngte kaihthawhna) kan hmuh hnuah “Martarte thawhlehna fiah takin kan hmu leh ta,” (Thup 20:4). Hemi huna martar tho lehte hi an tam ang chu! Daniela hapta 70-na chhung, kan Lalpa’n hrehawm nasa tak lo awm hun (Matt 24:21,22; Thupuan bung 6 aṭanga bung 18 inkara martar ‘tuma chhiar sên loh’ tia martar tam thu Johana’n a sawite kha an ni dawn a ni.

4) Mitthi tho leh tur, a tam ber pawh an ni ang, Lal Isua hova kum 1,000 roreltute’n kum 1,000 ro an rel zawha mitthi tho leh tur an la awm kha (Thup 20:5). He kum sang rorel hun hi a zawh hunah, tihian a inziah kha, "Mitthi dangte erawh chu kum sangkhat a vei hma loh chuan an la nung rih lo va," tih a nih hi.

Kohhran thurin ṭhenkhata piangthar leh piangthar lo a ruala kaihthawh ni vek tura sawi hi he lai Bible châng hian a paihthla dêr a ni. Mithi kaihthawh tawh kum sang lalrama kum sang chhung rorel tawhte leh kum 1,000 hnua lo tho ve chauhte an awm hi! Hetiang khawpa chianga Bible-in a sawi hi chu i zah ang u, i pawm ang u. Hemi huna thote hi piangthar lo, Evi leh Adama hun aṭanga piangthar lo awm khawm an ni a; tui lêta thi te, Sodom leh Gomora mei leh kâta kâng hlum te, khawvel indo zawng zawnga piangthar lova thite an ni.

Rorelnaah koh an ni. "I chhandamtu atana Pathianin a pêk che Lal Isua kha i ring em?” tiin an chhâl reng reng lo. An thiltih sual ang zela rorelsak an ni tawp mai. ‘I ring em?’ tia zawhna a awm lo, thiltih ang zela hrem an ni ta tawp mai. He rorelnaah hian piangthar an tel vena chhan tur a awm mawlh lo. Kan sawi tâk taksa thawh lehna pathumah khan piangtharte chu an kim vek tawh. Nunna Bua chuang lo ho an chhuahchhalh dante kha chhiar chiang teh, vanram kal leh kal lohna thu chu Apostol zawng zawng leh Lal Isua khan rinna a ni an tih vek kha. He laia kaihthawh hote hi chu Petera sawi ang a, "Nimahsela, vante leh lei awmte hi chumi thu avang vek chuan Pathian ngaihsak lo mite rorel leh boral ni atan dahin hâl tura khêk a ni," tia Bible sawi hote an ni (II Pet 3:7).

Pathian ngaihsak lo mite (piangthar lote) rorelsak leh boral ni hi kan Pathian thu-ah hian a bikin sawi a lo nih chiah hi. Bible chuan taksaa thawh lehna chi li min hrilh a; chi khatna aṭanga thumna hi piangtharte thawhlehna a ni a, chi lina erawh chu Pathian hre loho rorelsak tura an thawlehna a ni. Inzâwt ta ila, rapture-ah khan i tel ang em? I tel loh vaih chuan Lal Isua chanchin i hre vek tawh si a, rapture hnuah chuan i piangthar thei dawn tawh lo, Pathianin kawng a khâr tawh (II Thess 2:9-12).

- F. Lal Thanzuala, 9436141242