USA A INBUATSAIH

FBI chuan US President atana Joe Biden lakluh a nih hmain buaina nasa tak an hmachhawn thei nia an hriat avangin fimkhur tura hriattirna an chhuah. 

FBI chuan Biden lakluh a nih hma hian US khawpui hmun hrang hrangah Donald Trump-a ṭan rumruttu, silai keng mi za rual fein lung­awilohna lantir an tum mek avangin buaina lian tak an hmachhawn thei niin an hria. 

FBI thudawn danin US state 50-a an khawpui ber ṭheuhah heng silai keng rual hian ralthuam nen lungawilohna lantir phawtin chumi hnu chuan President atana Biden an lakluhna tur Washington DC pankhawm a, lungawilohna pui tham tak lantir an tum a ni. 

Hetih mek lai hian Biden chuan Capitol pawna rin­awm­na thu tiam a, amah lakluhna hun pawn lama hman hlauhna a nei lo tih sawiin President lakluhna inkhawm In chhunga buatsaih ṭul tihna a neih loh thu a sawi. January 6 mai khan US rorelna in pui Capitol hi Trump-a ṭantuten luhchilhin buaina nasa tak a chhuak a, mi 5 in nunna chan phah mah se US President thar Biden leh Vice President thar Kamala Harris te lakluhna inkhawm hi a building pawnah tih danphung pangngai angin neih tura ruahman a ni. 

Security official-te chuan January 6-a President atana Biden an nemngheh nia thil thleng ang kha thlen nawntir an tum lo hle. Department of Homeland Security acting chairman Chad Wolf chuan US Secret Service te chu President lakluhna atana inbuatsaihna an kalpuina kawngah ṭum danga an tih ṭhin aia ni 6 a hmaa special operation nei turin a hriattir tawh tih a sawi. Venhimna hna thawk turin National Guard 15,000 an ruahman a ni a, mak deuh maiin Thawhṭanni tlai lam khan Department of Homeland Security acting chairman Chad Wolf hi a nihna aṭangin a bang! Wolf hi tunhnaia Trump-a cabinet secretary aṭanga banna thehlut 3 zinga pakhat a ni. Wolf-a hma hian Trump-a cabinet secretary Betsy DeVos leh Elaine Chao te pawh lo bang tawhin an ban chhan ber hi Capitol building beih a nih vang niin an sawi. Wolf phei hi chuan a ban hma lawkin a pu Trump-a chu US Capitol building beihnaa meizang hlaptu tiin na takin a lo sawisel tawh nghe nghe. 

Trump-a ṭantute leh far-right online networks-ah te chuan an ruahmanna hi a ni nen lam tarlan a ni tawh. An ruahman dan chuan January 17 hian US khawpui lian hrang hrangah lungawihlohna lantir phawt tur niin hetah hian ralthuam nena lungawilohna lantir a tel. Khawpui hrang hranga lungawilohna an lantir hnu hian President atana Biden an lakluh ni takah, Washington DC pan khawm­in an lakluhna hmun­ah engemaw tak tih an tum a, an tihtur ber erawh chiang taka tarlan a ni lo. Tunhnaia boruak a rawn len zual leh chhan pakhat chu Democrats lamin Trump paihthlak tuma hma an lak mek vang a ni. ABC News-in FBI Bulletin thuchhuah an tarlan chhawn danin Trump-a ṭantute chuan hun tlemte chauh President office luah tawh tur an hotupa paihthlak a nih vaih chuan tual chhung leh sawrkar laipui rorelna in kawtah na taka an chet tur thu an tarlang’ tih an sawi.

Reuters news agency tarlan danin - federal law enforcement official-te thupek angin US khawpui hrang hrangah FBI an inzarpharh tawh a. January 16-20 chhung hian ngawrh lehzuala buaina chhuak thei tur thlithlaiin Washington DC bikah chuan President lakluh hma ni 3 chhungin an bei ngawrh zual ang. President Trump chuan Thawhṭanni khan January ni 24 thleng atan state of emergency a puang a, a thil puan avang hian Depart­ment of Homeland Secu­rity chuan thuneihna nei sang zualin thil ṭha lo leh hlauhawm lo thleng tur lakah an duh ang thalin venhimna hna an thawk thei dawn a ni. 

Department of Homeland Security chuan an ruahman lawk aia ni 6 a hmain National Special Security Event operations an neih ṭan thu an sawi a, kar kal ta Nilaini aṭang khan he operation hi an ṭan tawh bawk. President thar lakluh ni leh a hma deuha buaina a chhuah loh na’n ram chhung security agencies hrang hrangte nen an thawkho dawn a ni. National Guard Burea Chief General Daniel Hokan­son chuan chawlhkar laihawl hian National Guard 10,000 chuang chu Washington khawpuiah tirhluh an ni dawn a, a ṭul thuta koh theih turin 5,000 dang inring rengin an awm bawk ang, a ti. 

Washington Mayor Muriel Bowser chuan January 6 a Capitol building beihna chu tunhma lama la awm ngai lo firfiak pawlte chetna tiin venhimna khauh zawka lekkawhtu tur sipai tam zawk a dil bawk. Pi Bowser-i hian American te chu Washington DC-a zin lo hram turin a ngen bawk. 

National Park Service pawhin fimkhur thu hlaah Washington Monument tlawh an khap rih tih sawiin National Mall leh Memorial Parks chhehvel pawh khar lailawk a ni mai thei tih an tarlang bawk.  US President atana rinawmna thu a tiam hnuah Biden hian president hlui Barack Obama, George W Bush leh Bill Clinton-a te ṭawiawmna karah inpumkhatna thuchah a sawi ang. Donald Trump erawh chuan a tel ve dawn loh thu lo sawi tawhin kum 152 chhunga US President kalchhuak zinga amah thlaktu tur lakluhnaa tel duh lo awmchhun a ni ang.

President Office ni 8 chauh luah tawh tur Trump-a paihthlak tuma hmalakna chu kalpui zel niin Nilaini hian House-ah vote lak a ni dawn a, a tlang ngeiin a rinawm. January 6 thil thleng avang khan Democrats bakah Republican party hruaitu eng emaw zat chuan Trump hi bang turin an duh tih BBC chuan an tarlang a. Mahse, amah ber a ban duh si loh avangin US Constitution 25th Amendment behchhanin paihthlak an tum ta a ni.

US Constitution 25th Amendment ang chuan, ‘US President ni lai chu rilru emaw taksa lamah emaw president dinhmun chelh tlak lova a awm chuan paihthlak theih niin paihthlak a nih chuan Vice President-in a ai a awh lailawk ang’ tih a ni. A paihthlak tumtute hian Thawhṭanni khan House-ah lehkha thehlutin an lehkhaah hian, ‘Buaina chawk chhuak tura mi dangte fuihpawrh’ tiin paihthlak an tum chhan an ziak a ni. Capitol building luhchhuah a nih hnua a vawi khatna’n nimin khan Mike Pence leh Trump hi an inhmu a, boruak ṭha tak hnuaiah an titi niin CBS News chuan an tarlang.

Social media hmang thei lo tura khuahkhirh a nih avangin Trump hian buaina a chhuah hnu khan eng thuchhuah mah a la nei ta lo a ni. Mike Pence hian 25th Amendment hi a kalpui duh lo a nih chuan, Nancy Pelosi chuan House of Representative inkhawm koin, President Trump-a paihthlakna tur impeachment ṭum hnihna sawihovin vote lak a ni ang. Rorelna In hniam zawk a paltlang ngei rin ni mah se Rorelna In sang zawk, Republican leh Democats-in member inzat an neihna Senate member hmun thuma ṭhena hmun hnihin an thlawp a ngai a, a tlang lovang tiin a sawi lawk ngam.

Engpawhnise, US chanchina term khat chhunga impeachment vawi hnih hmachhawn awmchhun Trump hi an haw viau a nih loh vek chuan a ṭha lo viau tihna a ni ngei ang.

Thulakna : News rintlak chauh puang ṭhin BBC

Note : News rintlakhovin Martial Law, Insurrection Act, Pope etc an tarlang lo. Chuvangin hemi kaihhnawih thuthang vel hi a dik lovang.

- Lawmkima Hmar