ṬAWNG HMAN DIK

Mizo ṭawng hman dik chungchang hi kan chhiarin kan ngaithla tam tawh hle a, kan hman dik loh, kan lam dik lohte pawh kan hre kim thawkhat ṭheuh tawhin a rinawm a, mahse, a dika hman leh mai hi harsa kan ti tawh hlawm niin a lang.Chutiang kan ni chungin, thu 2/1 lek rawn tarlan ve hrâm chu ka la tum ve ta fan chu a nih hi. Vawiin aiah vawiin ni, ka ngeih aiah ka ngaih, tuboh aiah tubauh, nautê aiah notê etc. te hi chu kan sawi kai lo vang.

'Sem sem dam dam, ei bil thi thi' tih hi a ri hniam bîk awm lo, ri pangngaia lam rîk a, ri khampheia ri tluan chhuak tur a ni. Mahse, thu-ah te, hlaah te hian kan hmang sual lutuk ta! 'Saisù, Sailú' tih ri angin 'Sem sem dam dam' tih hi mi tam zawkin kan lam ri ta niin a lang. He upa thu/ṭawngkam awmzia hi kan hriat chian loh vâng pawh a ni mahna. Kan thil neihte zuar/hralh/leitîr lova a sema sem zêl mi chu dam vawng vawng se la, mahni thil neih tumah sem phal lova pumbil zêl mi chu thi mai rawh se, tihna a lo nih chu.

Chuvangin, ri khampheiin ‘sem sem’ tiin khawi hmunah pawh, eng hunah pawh a ri dikin lam ṭheuh tawh ila a duhawm khawp mai.

MAL TLUAN

He thu lam hnih tê pawh hi a thu awmze bo ṭhakin kan hmang nasa hle tawh mai. 'Mal' chu nu malpui 2 hi a ni a, mal tluan chu malpui aṭanga ke hmâwr thleng sawina a ni. He ṭawngkam hi fanau malsawmna nasa taka dawng tura induhsakna ṭawngkam a ni a, 'Mal tluanin fanau lo chawi ang che,' te an lo ti ṭhin. Hlaah pawh, 'Fanau mal tluan chawiin, khûp bih thlengin, Lalpa malsawm in chungah thleng se kan ti,' tih te pawh a awm.

Hei hi tam takin an lo hre pelh leh ta! 'Málsâwmna tluantling lo chang rawh u,' tihnaah ngaiin, 'Mal tlùan lo dawng rawh u' ti tein an hmang leh ta nawk nawk mai; hetiang hi tum ṭhelh dik tak a ni. Mizote hian Mizoṭawng hi kan thiam lo tawlh tawlh a, Youtube lamah message, comment leh thu awm sa chhiar leh sawi chhâwn tam zawkah te pawh hian ngaihthlâk leh chhiar hrehawm khawpa dik lo hi a thlawhin a thlâwk ta nuai nuai mai a nih hi.

Kan mother tongue, Mizo ṭawng hi chu vawn him leh hman dik hrâm hrâm tum ṭheuh ila, hawrawp dik lova kan ṭhalaite’n message an han type nek nuk mai te hi hmuh a va'n hrehawm thei tak êm!

- C. Lianmawia, Zonuam