Hun kal tawhte'n min beng harh ṭhin rawh se!

Mizo mipuite hi rilru nghet cherh chawrh, seh tawh seh tlat kan vâng hle. Chu mi rual chuan party ṭan lam nei, party tâna rinawm leh nghet tlatte erawh an awm ngei e. Mahse, mi rilru nghet leh nghing ve mai mai ngai lo kan tihte nen huang khata dah chi an ni lo thung. He rilru nghet lo kan nihna, luang thli chhêm nghîn ang dual dual kan nihna hian, Zoram politik khawvela hmasawnna tur kawng nasa takin a dal tlat ṭhin.

MNF leh Congress sawrkar laia thil dik lo leh fel lo thleng châmchî reng. Hna lak fel lo tak, contract lama induhsakna uchuak, minister lamin chan an neih ve tlatna, legislator ni tura kan thlan lalte'n contractor emaw an intih tlatna boruak rip tak awm reng, hmalakna reng rengah tute emawin hlâwkna an lo têl ve tlatna ang, party mi leh sa induhsakna luang liam, hna thawk chung sia hlemhletna awm ve tlat reng, a nuai za têl tehmeuh chheprelh a nih pawha tu mah mawhpuh tur awm thei lo, engkim dan anga kal thei miah lote avanga mipui rum ri bengchheng takte kha Zoram mipui tam zawk chuan kan theihnghilh hmin leh dêr tawh emaw tih mai tur a ni!

Party naupang tak ZPM an rawn sawrkar ta a. Kum hnih a liam khân nasa taka sawiselna social media lamah kan hmu mawlh mawlh a nih kha. Fûr chhia lo thlen vanga kawngpui a chhiat zual lai phei kha chuan hmun tinah ZPM chhuahsan an awm sup sup a. Dampa bial by election-a an chak loh phei kha chuan ZPM hi tlachhe ta duai anga ngai an tam a nih kha. Sawiselna nasa tak hnuaia an hmalakna leh hnathawh hrang hrang, muangmarin kan han hmu chho ta thung a. Congress leh MNF sawrkar hnuaia hlemhletna tenawm tak tak awm ṭhin nuai boin an awm chho ta mawlh mawlh a.

Neutral mit pu, fim taka thil thlir ṭhin tan chuan ZPM hnathawh leh hmalakna, dãnin kori a tùk dan, accountability awm ta mek, hlemhletna leh hleprûkna bo ta mek, hna lak dan fel ta thluam mai, minister leh MLA rual eirûkna leh hlemhletna lama an fihlim ta nia lang, minister leh block president lehkha neih ngai tawh lo, mi pakhatin hna hrang hrang lakna tura hna palia a inziah tlin theih takna, kawngpui siam dan ṭha leh healthcare ṭha em em, sawisel tur tlem tial tialte han hmuh hian lawm loh theih a ni lo.

Hmun tinah hmasawnna sûlhnu hmuh tur an awm ta a. Chumi rual chuan tun hma lama thleng ṭhin, sawi neuh neuh awm ṭhin lah a rim kan hre ta meuh lo mek a nih hi. CM leh a minister rual hlep rûkna lama an fihlim miau chuan hmasawnna dik tak hmuh loh theih a ni lo rêng a ni. ZPM hnuaia sawrkar thar leh kalphung thar lo thleng mek, a hnualsuat zawng leh a sawisel zawnga lo latute hi Zoram hmelma tih loh rual an ni lo.

Mahse, ZPM hi sawiselbo erawh an ni hauh lo thung. Kha chen ram tana lo vakvai tawh an nihna lo langin, ti ve lo tura an intiam bawhchhiat tam tak an nei ve tho. Restricted tender lamah an fihlim hlei thei lo a; an intiam anga tihhlawhtlin hleih theih loh pawh an nei ve fur tho. Chuti chungin MNF leh Congress sawrkar tawhte nena khaikhin râlah, ram tân tu hi nge kan hnemhnânpui tih phat rual a awm lo.

Social media leh Assembly aṭanga lo lang chiang em em a awm a. Opposition lamin ruling lam an beih dan aṭang ngawt pawh hian MNF leh Congress, a bikin MNF game ropui lohzia a lo lang. CM leh a minister chhaih buai, chhaih thinrim an tum tawp a. Chumi pah chuan tun hma lama an thil tih dik lo thup tum a, àwm ang lo tak tak hmanraw ruaia ruling beih an hreh hauh lo a nih hi. He zia hi bovin constructive opposition nei thei ila a duhawm em em. Tunah rih chuan chu chu beisei phâk a ni rih lo a ni.

ZPM hnathawh leh sawrkar danah duhkhawp loh kan nei a nih pawhin, an hma zawnga sawrkar tawh pahnihte nen khaikhin nachâng i hria ang u. Tu sawrkar mah hi ṭha famkim an awm dawn lo. Mahse, sawrkar dik lohna bulpui–hlemhletna leh eirûkna laka fihlim hi Zoram mamawh sawrkar a ni. ZPM kan fak mek laiin, anni lam pawh tun aia ṭha leh dik zawkin an la kal thei; an kal kan beisei bawk. A nih loh a, term tawp dawn hnaih lama an che nawi viau a nih ngat chuan Zoram hmabak chu a thim leh zual dâwn a lo ni e.

- Lalremliana Pachuau