TEMAMI PA THUKHAWCHANG Missionary Day serh hran

Eng ka ti zo ta nge ni, 1994 ah kha chuan Missionary lo thlen kum 100-na kha Mizoram Presbyterian Church leh Mizoram Baptist Kohhran te khan lungrual takin kan lawm ho kha a ni a. Hun a kal deuh a Missionary Day 11th January khan urhsun takin kan hmang dial dial a, a tirah kha chuan sawrkar Pisa chawlh pawh kha a ni loin ka hria, ka hresual mai thei, a hnu deuhah chuan sawrkar pisa chawlhah puan a ni ta kha a ni a.

Kum a liam a liam leh nual ta maw tihah(a kum chiah ka hre ta mai lo) chanchinbuah Missionary Day kan lawm dan pawnlawi tak mai hi ka ui thu leh heti mai lo deuha urhsun zawka kan hman theihna tura Kohhran lian pahnih ten hmala se ka duh thu ka ziak a. Hmalak chu sawiloh Presbyterian Kohhran te chuan 15th March chu Missionary Day ah an puang thar leh ta si a, keini naupang lam tan chuan pawm ber tur pawh hriatthiam a har ta nawk mai?

Ni e, Missionary Day chu eng hunah pawh kohhran lian pahnih hian lawm thin hi kan tihmawkmawh a ni a,tihmawkmawh anihna chhan erawh kan ngaihtuah thuk lo deuha ngaihna ka neih avangin kei hriatna tlemte nei hian ka han tuihnih leh lawk teh ang;- Missionary lo chhuah hmaa Zoram inrelbawl dan leh khawsak dan phung chu kan rualute chuan sawi nawn ngailoin in hre vek a, sawi thui ngaiah pawh ka ruat lo. Sawi ka duh ber chu ‘ZIRNA’ chungchang hi a ni. Kan Zosap lo chhuakte khan Pathian thu min hrilh tur chuan ziak leh chhiar thiam kha a pawimawh hmasak zia hriain an A,B,C zulzuiin A,AW B.. min siamsak a. A AW B hmasa kha chu tuna kan hman pawh hi a anih loh zia pawh a rualute chuan an hre em em a ni. Ziak leh chhiar thiamin a zui hmasak tur chu Pathian Thu ziahna ‘Bible’ chhiar thiam a ni a, chu chhiar thiamna chuan Mizotawng ngeia Bible kan neih theihna turin kori a tu nghal a, Bible pawh chu Mizotawnga lehlin a ni ta a ni. Chumi zawh lehah chuan Sap tawnga Pathian hla an neih te chu Mizotawngin leh leh a ni a, Kristian thu laimu, Bible leh Hla-a kan hriatte chuan min tichiang ta viau anih kha.

Kan Missionary te tumruhna leh hratkhawkhen zia hi ngaihtuah tham tak a ni-Mizotawng hre loin Mizote Kristiana min siam tur khan an lo chuang chhuak hlawl mai a, chutihlai chuan British sawrkar khan min awp anih kha.Mizotawng an han zir thiam hnua A,AW,B min han siamsak dante hi Pathian hnathawh mak tak chu a ni. Kan mithiam hmasate chuan Sap Fakna hlate chu mizotawngin an han dah a, chumaibakah, khuanghnih hla, kan kristianna lo thlen hmaa zu hmun sa hmuna zaihlimna zulzuia kan ringtu hmasaten an han dah chho zel ta chuan Kristianna chu mizo rilruah thu leh hlain a tuh nghet ta a ni(ka han ti ve mai teh ang, keima ngaihdan mai mai)

Aw le, Mizote chuan ziak leh chhiar kan thiam theih nan Sunday School ah te zirtirna, Pathian thu bakah kan mi hmasate khan an dawng a,chumihnuah Zirna Sikul te chu hawn niin Pathian thu zirrna kengtel loin zirna kha an han sawrbing leh ta a,lehkhathiam kan chhuak ta sup mai. Kan Pu JF Laldailova(fam) pawh Roman Puithiamin zotawng leh saptawng a thiam kawp dan hriaiin a bulah a hruai daih ta nghe nghe anih kha, ropui tak a ni.

Tichuan, zirna lama thiamn chuan hmuh theihin hmasawnna namenlo min thlen zui a, India ram pawnah hial thiamna chawk duhin kan mithiamte an feh chhuak ta anih hi, a ropuiin a hlu tak zet zet a ni. Tun ang dinhmunah hian Zosap te kha lo chhuak loin kan awmdan kha chhawm chho zel ta ila, enganginnge kan khawsak ang tih hi tuman an sawi dik lo hulhual ang. Zirna in min chawikan dan em em hi sawifiah thiam phak a ni lo, Pathian hmangaihna,zahngaihna,ngilneihna,khawngaihna leh lainatna ang te pawh hi tunthleng hian Mizotawng hian sawifiah phak rual an ni lo. He zirna lama thiamna nasa tak hian tun dinhmun hi min thlen a,khawvel tukverhah kan dak ta a, kan kutah khawvel inlumlet dan chu kan humin kan bih thei ta fur anih hi. Hetihlai hian khawilai thliarkar thenkhatah emaw chuan khawvel finnain a luh chhuah theih loh vanga saruaka la khawsa leh sa hel la ei te pawh an la awm anih hi?!

Chuvangin, Missionary Day chu Chawlhniin a nan loha sawrkar pisa chawlh anih ngat hi chuan, Preesbyterian kan ni emaw Baptist kan ni emaw eng kohhran pawh Missionary Day lawm thin apiangte chuan Chawlhni/Sunday aia khun khan leh zahawm hian hun hman hi kan tih tur a ni chiang. Kan Missionary te kha lokal lo se, Krismas hi kan hmang angem, hmang hauh lo ang. Hman deuha chanchinbua ka ziahah chuan tiang deuh hina ka tiin ka hria-“Missionary Day ah chuan Pathian biak Inkhawm dar a ri chuah chuah ang a, Missionary day lawm turin Biakbuk kan pan nguah nguah ang a, a hausa deuh kohhran chuan thingpui ruai mai nilo, ruai pui pawh theh hialin kan mawi tih hi ka ngaihdan anih laiin hetiang lamhawia awmni kham a awm si lo a, ram kal hunah te, feh hunah te, Picnic hunah te kan hmang mai mai si anih hi kohhran ama thibeh pha ve lo te chuan?!’

Tuna ka tihdan phunga Missionary te chanchin chhiar chhuah leh ringawt ang chi hi bansan a, ko kan thak a hun ta khawp mai tih hi tunkum Missionary Day, kohhran thenkhatten kan hmandan inang lo ah hian ka rilruah a lo thar leh a ni.

- R.Lalrinkima,

Hidden Lodge, Chanmari