HNAM INPUMKHAT NAN MIZO ṬAWNG

22nd February, 1991-a Mizoram Legislative Assembly session-in India Danpui 8th Schedule-a Mizo ṭawng dah a nih theih nan "Eighth Schedule to the Constitution of India-ah Mizo ṭawng hi telh tura hmalak ni rawh se," tih resolution an pawm a. Resolution hi a hlawhtlin ngei theihna turin 9th Mizoram Legislative Assembly 6th. Session, 17th February–16th March, 2026 inkara neihah khan official resolution "Eight Schedule to the Constitution of India-ah Mizo ṭawng hi telh tura hmalak ni rawh se," tih lungrual taka pawm a ni leh zel hi lawmawm tak a ni.

Mizo ṭawng kan tih hian Mizo Kuki ṭawng te, Mizo Lai ṭawng te, Mizo Paite ṭawng te, Mizo Hmar ṭawng leh a dangte a awm nual awm e. Heng hnam chi hrang hrang ṭawng zingah hian tuna Mizo ṭawng kan tih tak hian tuipui ral aṭanga Sap rawn kalte khan A AW B an rawn siam a; kan Bible leh lehkhabu dangte letlingin, zirna sikul pawh Mizo ṭawng hian bul an ṭan a ni. Chuvangin, Kristian kan nih hnua kan thu leh hla zawng zawngte hi Mizo ṭawnga ziah leh phuah ṭan vek a tih theih awm e. Hemi avang hian Mizo ṭawng hi Mizo hnahthlak zinga lar ta bik riau pawh a ni mai thei e.

Mizoramah hnam hrang hrang kan cheng a, heng hnam hrang hrang zingah hian Mizo hnam erawh chu kan awm lo. Nimahsela, Mizo erawh chu kan inti deuh vek a nih hi. Mizo hnahthlak ṭawng hrang hrangte pawh hi an inzûl em em vek a, thumal inang pawh a tam hle. Chuvangin, Mizo chi pêng ṭawng zingah hian eng hnam ṭawng mah hi han danglam lutuk a awm lo va, tuna Mizo ṭawng kan tih pawh hi chi peng ṭawng hrang hrangte nen hian a inpawlh vek a. Mizo ṭawng hi Mizo hnahthlak zawng zawng hian hmang vek pawh ni ila, tu hnam ṭawng mah hi ṭawng thi a awm chuang awm lo e.

Mizoramah hian Mizo ṭawng hi inbiak pawh nana kan hman tlanglâwn ber a ni a, Mizoram chhehvela tlangmite zingah pawh hriat hlawh ber niin, hman theihna hmun pawh an tam hle. Mizo ṭawng tih pawh a phû a, tih âwm rêng a nihna chin a awm a ni. Hemi piah lamah hian khawvel hriata Mizo hnahthlak zawng zawngte’n Mizo ṭawng ngeia kan thu leh hlate ziaka kan dah theihna hmasa ber a nih avangin humhalh a, vawnhim a, tihhmasawn hi kan mawhphur liau liau a va ni em. Kan hnamin khawvel êng kan hmuhna leh kan dinchhuahna ṭawng a ni si a.

Mizorama chengte hi Mizo kan inti vek a, kan ṭawng pawh Mizo ṭawng kan ti mai bawk. Mi ṭhenkhat chuan Mizo ṭawng kan tih hi Lusei ṭawng tih leh Duhlian ṭawng ti tein min sawisak fo a; nimahsela, Mizorama chengte hi chuan lungsi takin Mizo ṭawng tiin kan pawm mai a ni.

Kan sawi tak ang khan, Mizo hnam an awm bik miau loh avangin Mizo ṭawng kan tih hi Duhlian ṭawng emaw, Lusei ṭawng a ni bik lo; Mizo chi pêng hrang hrang ṭawngin a tihhausak leh a tihphuisui a ni si a. Kan hla thu te, ṭawng upate leh hlado kan tih zawng zawngte hi Mizo chi pêng ṭawng aṭanga lak luh vek an ni a, chuvangin, Mizo hnahthlak zawng zawngte chuan lungrual takin kan ṭawng kan ti thei vek a ni.

Mizo ṭawng mawi leh ṭha vul zel ang che,

Kan zoram tinuamtu i ni;

Tlang tina Zofate min suih khawmin,

Kan hnam dinchhuahna bul i ni e.

- Hausanga Hauzel