THE BIBLE SAYS SO!

Bible chuan chutiang chuan a sawi a ni tiin Bible ṭan chhanin Daniela Hapta 70-na thu kan sawi tam ta viau mai. Ninawmah pawh a kal thei hial âwm e a! Ni êm lo se! Amaherawh chu Pathianin Israel fate A hruai tâwp dân kan hriat chian loh chuan kan Pathian Thu hriat dan a chhum bul hle dawn a ni. Rom lehkhathawn kan chhiar chuan Israel mi zawng zawng an pianthar vek hun a lo thleng dawn tih kan hmu (Rom 11:25-27), ṭawngkam pangngaia sawi chuan Jentail piangthar turte an pianthar fai vek hnuah Israel la dam zawng zawngte chu an piangthar vek ve dawn a ni, The Bible Says So! (Rom 11:26,27). Israel-te hi khawvel mihring chî leh kuangah chuan Pathian dik hre hmasa berte an ni. Nova hun lai tuiletah khan mihring an thi zo va. Lo inthlah pung leh zelte kha Babel insang sak khan an darh sarh leh ta vek a. Pathian hre lova thâmral tate an ni. Melkisedeka tih lohvah chuan Abrahama kha Pathian dik hre hmasa ber a ni. Ani'n Isakaah khan Pathian hriatna a tuh leh a. Isakan Jacobaah a tuh leh a. Anin a fa 12-teah a tuh leh a. Anni'n an fateah. Hetiang hian Pathian dik hriata A rawngbawlna (Kingdom of God) chu Israel-teah a lo kal thla zel a. A bikin chiang lehzualin Davida Lalna leh a Lalthutthleng kha tawp ni nei lovin chatuanin a awm reng dawn tî hialin Pathian zawlnei Nathana hmangin Pathianin Davida A hrilh a nih kha (II Sam 7:16). Mahse Solomona atangin Pathian thuawihna lam kawngah an hniam thla ta zel a. Lal (pangngai) neia an awmna chu Pathian an hawisan nasat tâk lutuk avang khan Babulon lal Nebukanezara hmang khan an Pathianin A tihtawpsak ta a. Bible zirnaa Jentailte Nî tih thin chu a lo awm ta.

Babulon lal chu Persia lalin rawn hnehin Persia hnuaiah an awm chhunzawm a .Persia chu Grik lal Alexander the Great-a'n a hneh a. Grik hnuaiah an kûn leh ta a. Rei lo te kum sawi tham loh Maccabea hovin an indipenden ve lawk. Mahse Rom chuan Grik-hote hnehin Rom hnuaiah an kûn leh ta a. Israel-te hnam nun khuan dik taka Pathian biakna thinlung hi a bosal tlat ta a. Zawlnei Malakia thih atang khan Baptistu Johana rawn au hma zawng kum 400 lai kha Pathianin A be tawh ngai lo. Zawlnei tumah an lo chhuak hek lo. Hei hi The 400 Years of God's Silence an ti thin. Kha ngawih reng hun kha Baptistu Johana khan Sim rawh u tia auvin a rawn titawp ta zu nia. Israel fate chuan an Tora leh an zawlneite zirtirna aiin an pipute thu rochhiah, an Talmud leh Mishah leh Gemara chu zâwm zâwkin Pathian thutak chu an bosan ta a. Kan Lalpa pawh khan an pipute thuro chhiah kha Pathian Thupek aia an ngaih pawi mawh zawk avanga Pathian thu an bawh bozia pawh A hau nghe nghe a. Chu vanga an Pathian biakna pawh a thlâwn a nihzia A hrilh kha (Math 15:5-9). Chuti khawpa an sual bosan tâk avâng khan kan Lalpa pawhin A thuchah pui ber atana A hman chu Pathian lalrama lut tura Sual Simna thu A rawn thupui tâk kha kan hre theuh a ni.

Mahse an Messia pawh chu an pawm leh lova, (mihring ṭawng chuan) an tihlum a. Daniela 9:26-ah chuan "hapta 62 hnuah" Hriakthiha chu tihbo a ni ta tiin a ziak. An pi leh pute atanga mahni Messia haina rilru nei an ni a. Pathian pawhin A lalram enkawl thei lo an nih avangin an hnen ata Pathian lalram chu A lâksak ta a, rah chhuah thei tur Jentailte hnenah A lo pe ta (Math 21:43; Tirh 28:28).

Israelte chu Pathian thu-ah chuan Abrahama atangin Pathian dik hria leh be hmasa berte chu an ni a. Mahse an Lalpa chu zui ṭha duh hek lo.Pathian lalram chu an chân ta. Pathian hunbi siam a lo inher chhuah leh hma chuan Pathian thutak hre thei rih lo tura an thinlung siamsak an lo ni ta (Math 21:43; Tirh 28:28; Math 13:10-15; Rom 11:8;II Kor 3:14,15).

Tichuan Daniela hapta 70-na a lo inher chhuah hma loh chuan sawi tham Israelte an piangthar dawn lo. An pianthar nasat hun tur chu Lal Isua lo kal hunah, Jerusalem Ziona Lala A ṭhut hunah daih a ni ang (Rom 11:25-27). Kan Lalpa ṭawngkam pakhat chu "Hmasa berte pawh hnuhnung berte an la ni thei" A tih kha a lo thleng dawn a ni. (Math 20:16).

Khawvel pumpui hnam hrang hrang zinga Pathian Tak hre hmasa ber kha, a hnam anga sawia piangthar hnuhnung ber an ni leh si dawn! Bible sawi dan chuan Jentail-ho piangthar turte an pianthar zawh vek hnuah ahnam pumpuiin an Messia an hre (dik) ve chauh ang. Hmasa ber kha Jentailte pianthar fai vek hnuah, Phengphehlepa khua chu tlai viau mahse, kum sang lalram tawlh lut ve thei turin an piangthar dawn a ni

He hun, Ziona A ṭhut hun hi, A lo kal leh hunah a ni ang. Heti hian han chhep chhuak ta ila.Daniela hapta 69-na pawnah,hapta 70-na thlen hma siin, Jentail Kohhrante chuan Lal Isua min pek leh tirh angin (Math 21:43; 28:18-20) Pathian Ram thu chu kan hril mek a. Nakin lawkah Rapture lo thlengin piangtharte chu vânah lak chhoh kan ni ang a. Math 24:15 thua Lal Isuan A sawi angin, Daniela Last Week chu a lo thleng ang.Mi thenkhatte tana pianthar theih tawh lohna hun a thleng nghal bawk ang. Damtein awm ila chu thu rapthlak tak chu lehpekah kan khel ang chu.

- Upa F. Lal Thanzuala, Ph : 9436141242