Sorkar inpuanzarna uchuak a ni em?

'Lalnundika, Thing­tlang mi' tihin Vang­laini chanchinbu dated December 14, 2020-a a thu a ziah "Best Green State-a Mizoram thlan chungchang" tih kha han tui hnih ve ka duh. 

Kha thu ziak khan Mizoram sorkar thu­chhuah kha a rawn lip se ni berin a lang a, kha mi phenah zawk khan sorkar thuchhuah ṭhenkhat kalphung lam zawk leh sorkar inpuan zar duh dan hi sawi chhuahna remchang tak a ni tel bawk thei dawn a ni.

December 8, 2020-a Best Green State a Mizoram thlan a nih thu sorkar thuchhuah kha kan lo chhiar ve a, kha kha sorkar thuchhuah nge officer pakhatin ama mimal ngaihdan a ziah aw? tih hi thingtlang mi chuan kan hre duh. 

Kha thuchhuah kha thingtlang khuaa cheng zawng zawng, ramngaw leh lui dungte humhalh a, faina leh thianghlimna kawnga pawisa leh hna ṭhulha vawi tam tak hnatlang ṭhinte hian hre thiam ila chuan kan lawm lo hlawm khawp ang. 

Kha thu kha mi tam zawkin an hre lo a, a hriate pawhin a ngaihna an hre kher lo thei. Mahse mi vengva chin chuan a awmzia kan hria a, whatsaap ah kan inthawn darh a, kan helh hle a ni. A thu tlangpui chu hetiang hi a ni" a ti a, Mizoram sorkara Infor­mation Deptt officer pakhat thu ziak a rawn thur chhuak a. Khatah khan thingtlang mi khan a thu ziaktu kha a dem lovin ka hria a, mahse Mizoram sorkarin mifing pangngaiin kan hriat chian vek hmanga mi fing ve lote bum duhna a neih kha thiam takin zawhna hmangin a rawn phawrh chhuak ta zawk a ni. 

Khatiang kha kan sorkar thuchhuahah hi chuan awm tawh lo se, a awm tawh lohna turin kan Information Deptt lam pawhin meeting te neiin thil zir chiang hmasa se a ṭha ang. Magazine pakhat, Travel & Leisure India and South Asia’s India’s Best Award 2020-ah Mizoram chu Best Green State-ah a puang tih kha sorkar thuchhuah khan uar em em maiin a rawn ziak a. Chutah chuan, "Best Green State a Mizoram an thlan chhan hi ram hring mawi tak mai a nih piah lamah tun hnaia Tourism Department Responsible Tourism Policy tharah hian tunhma a la awm ngai lo, khualzin mite tlawh fo ṭhin hmun hma vawn thianghlim te, ramngaw, thing leh mau chereu tur ven te, ramngaw tichhe thei tur ram dang aṭanga thing leh mau lakluh khap te bakah Mizoram pawna nauban lakchhuah khap te leh thildang tam tak a tel a ni. 

He Policy hnuaiah hian zin mite intiam­kamnain a ken tel, ram humhalh tur leh vawng fai tura khualzinte hnena ngenna a chhawp chhuah vangte pawh a ni tel bawk," tih kha an rawn ziak a, a zahthlak hle a ni. Lalnundika zawhna zawh zinga, 

1. Responsible Tourism Policy engtikah nge siam a nih? Mipui hnenah puanzar a ni em? 

2. Tun hmaa la awm ngai lo khualzin mite tlawh duh hmun tifai turin Tourism Department  hi vawin engzatnge a thawhchhuah tawh? 

3. Tourism Policy thar vang hian thing leh maute humhalh niin a lo hring hman ta em ni? 

4. Tun hnaia Policy siam vanga Mizoram hi lo hring ta thut a nihna lai fiah takin sawi rawh," hi thur chhuak ila, sorkar thupuan hi a uchuak mah mah deuh lo maw? 

tih zawhna zawh zui a ṭul ta a ni. 

- Vanlalliana