NEITU RILRU PUA THAWH

Delhi Chief Minister Arjun Kejriwal-a khu a ngaih­sanawm bawk a. Hun rei deuh hlek tawha thil thleng a ni na in Delhi sawrkarin Raheja Builders a saktir Transit Camp chu CM a nih hnuah a hmunah a va tlawh thut mai a. A chung ceiling te chu a lo pawp heu huau mai a, a in sak a ṭha loin mihring chênna atâna hlauhawm khawp a ni tih a hmunah ngei a va hmu a, a lâwm lo kher mai. 

A mawhphurtupa chu mipui hmaah a chapchâr ta hmiah hmiah mai a, "Hei hi eng vang nge?" tiin a zawt a, chu pa chuan, "Ka pu a sakna a rei tawh a....hi...ih..chuti kha ti...." tiin hmai pha duiin a chhâng a. CM chuan, "I chênna in i sak saw tunah a chhe tawh em? Kum engzat nge a nih tawh? Engatinge mihring chênna tur hi mangkhawng ang maia i chhuah, i chênna tur i sak ang bawka ṭhain sa ta che" tiin hmaichhanah a chhuahchhal piap piap mai a. Chu contractor chu khawngaihthlak zâwk khawpin a chhuahchhal a, CM meuhin mipui hmaa chutia a chapchâr hmiah hmiah mai chu a tân chuan vânpui a chim hi a ni hrim mai a. Chutah chu building saknaa mawhphurtu officer rawn kal ve duh lo chu a phone tir a, phone hmangin CM chuan a'n hau zui leh hrep mai bawk a. An zak ve khawp ang chu! Delhi CM hnuaia hnathawh chu a inthlahdah theih loh e an ti hial ṭhin. 

Sawrkar hnathawk zingah te mi chhuanawm leh fak tlak, taima leh entawn tlak tam tak an awm. An zinga mi tlêmte inthlahdah leh zelthel te avangin sawrkar a mualpho a, dem a hlawh fo ṭhin. Office-a computer games lo khêl mai mai tâwk te kha an awm ṭhin a! Sawrkar hnathawk inthlahdah hi sawrkar pawi sawina a ni a, a tak takah chuan Pathian pawi sawina a ni! Bible chuan, "Miin hna a thawh duh loh chuan ei pawh ei suh se" a ti hmiah mai. 

Eizawnna atâna hna dil a, intât lut a, thawk ṭha leh duh si lo chu Bible zirtirna pawh a ni chiah lo. Kawng siam, lei dawh, in sak etc... eng pawh nise, hna chu a ṭha em, a tlo em tih hi a tehna tur a ni a. Sawrkar in kan sak pawhin mahni in sa angah inngai thei ila. 

Kohhran hnuaia rawng­bawlna leh kohhran enkawl thleng pawh hian a ni, miin neitu rilru pu lova hlawh­fa rilru pua hna a thawh reng reng chuan a hna a ṭha thei ngai lo va, a tum ber chu thawh zawh a ni a, a hnathawh tlo leh tlo loh a ngaihtuah ngai lo. Rawng­bawltu hlawhfa rilru pu, inthlah­dah, zelthel, tiṭha peih lo te hian kohhran leh mihring pawi chauh an sawi lova, Pathian pawi an sawi tel a ni.

Mahni hna ni lo, pâwl emaw, kohhran emaw, sawrkar hna emaw a nih avanga thlahdah leh zelthel deuha thawh ngawt duhna thinlung kan pu ṭhin hi a zia lo ngawt mai. Eng hna pawh thawk ila, mahni ta angin i thawk ang u. Kan sangha dil chu kan tlawh taima hle a, sawrkar sangha dil emaw, mi tute emaw sangha dil inhlawha kan enkawl erawh chuan kan tlawh zûr zut peih leh si lo! 

Sawrkar pawisa hmanna tur a nih chuan kan ren lo hiau hiau hle a, mahni ipte (pocket money) aṭanga thehchhuah tur a nih erawh chuan kan ui leh ṭun roh si a! Kan hna vawn/ thawh ṭheuhah hian theihtawp kan chhuah em tih lai hi a pawimawh fo ṭhin, miin a theihtawp a chhuah chuan thil dangah lo fel lo deuh mahse mipui hian an ngaidam thei khawp nia. Theihtâwp kan chhuah leh chhuah loh chu a lo dawngsawngtu mipui thinlungah a chiang ṭhin. 

Eng hna pawh thawk ila, hlawhfa rilru pu lo vin neitu rilru puin i thawk ang u, tichuan kan ram leh kohhran hi a dam leh ang a, chunglam malsawmna pawh a hranpaa dil tehchiam ngai lovin a rawn thleng zêl ang. 

- PC Nghàklianmâwia