LUNGPHÙM PHÚM HNEM TAWH; HNAM LUNGPHÙMAH CHIANG LO

2018 MLA Election kan neih zawh hnu, MNF sorkar tirh aṭanga tun thlengin Mizoram Chief Minister, Pu Zoramthanga leh a fa chuam, Sports Minister, Pu Robert Romawia Royte te chuan hmun eng emaw zatah tihhlawhtlin ngei ngei tur lung an phúm. Thil hrang hrang sak a, siamna tur atan hian pawisa awm si lovin chéng nuai sing tel ruahmanna an siam tawh niin a lang. Khawi aṭanga risk a, phuahchawp turin nge maw an tih ni? 

Khaw hrang hrangah Lungphùm hnà thawk mekin, Tuidam Football Ground Artificial turf phahna tur lungphùm pawh phúm a nih tawh kha. He hunah hian sorkarin COVID-19 avanga SOP a siam chu a bawhchhia niin a lang a, tun thlengin hrem tura dàn anga hmalak engmah a la awm lo a ni. Dàn hmanga action láka hnehin, sorkarin dàn a ngaih pawimawh lohzia pholangtu chuan vaute a la tawk zawk zui a nih hmel bawk a. Engpawhnise, COVID-19 avanga sum leh paia sorkar a harsat èm èm lai leh sorkar hnathawk hlawh a pek mumal theih loh lai hian an tihtheih chhun lung an phúm vak ta mai niin a lang. He thil hian rah ṭha nge a chhuah ang rah chhia? Budget session neih leh hunah a chiang ang chu.

1st MAP Ground, Armed vengah Chief Minister leh Sports Minister-in lungphùm phúm tawhin, artificial turf phah tum a ni a. Amount Rs 500/- lakhs ruahman a ni a, Contractor Décor India Complete Sports Solution, Guwahati an ni nghe nghe. A tirah rinawm lanna atan hna an ṭan thuai a. JCB in eng eng emaw tur a lai chhe nual hman a, mah se  sum awm loh avang nge ni, an thawh zawm ta miah lo. Khatia laih chhiat neng nung, thawh zawm awm bawk si lo chu Armed veng khawtlang inlungrualin an lei laih chhiatsa chu hnawh lehin, ṭhalaite infiam theihna atan ruahmanna an siam leh ta ngawt mai a ni. A tihhlawhtlin theih loh tur chu sorkar hian tiam lo ngam mai ṭhin se.

MNF hian sorkar nawn tawh loh an inringsa rèng ni tur a ni, lungphùm an phúm vak vak mai a. An sorkar lai term khat (Kum 3 kal ṭan mek) chhunga an hnathawh an enin tlem an ti si. Hun lo kal zel tura a lo hlawhtlin ták mial a, a bulṭantu nihna (credit) an lak duh vang mai mai niin a hriat a ni. An sorkar term khat, kum 5 chhunga an zawh miah loh tur hna eng emaw zat atan lungphùm an phúm tluk tluk a ni ber mai. An hnathawh chu lungphùm hnà a ni ber e. Mipui hian hian thil tak tak hi chìk ila, an Politics Idealogy te, mipui mar min deh dan leh tun hma anga ram hluizia an la paih theih lohziate hi ngaihtuah chiang teh ang u khai! 

Hla siamtu chuan, "Sual thim thuk taka pila ka bo laiin, beidawng leh chauvin ka rum ṭhin a; Ṭhat tum thei si lo, chakna réng nei lo hian..." a tih ang deuh hi kan sorkar hrawn mék MNF sorkar nihna a ni ta berin ka hria. Insiamṭhatna lai tur an neih chuan insiamṭha se. Opposition Party chakna leh active peihna hi hmang ṭangkai se, insiamṭhatna atan hmang se ka ti ngawt mai. 

An lungphùm zawng zawng a hlawhtling vek ang em tih pawh hriat loha inhrosak vak vak ai chuan, kan hnam lungphùmte hi ngaihtuah nawn leh zawk ila. MNF-te hi Nationalism-ah hian an chiang chiah em? Mizoram mipui hi MNF sorkar zarah CAB/CAA thláwptu kan ni ta ngawt mai. A rilru natthlak mang e. Kan Kristian nun danah hian kan chiang chiah em tihte hi inzawt thar leh ang u. Kan Society thlir chuan thil hrang hrang a tam. YMA kan nei, kan tlawmngai, mi dang tana ṭhian chhan thih ngam hial pawh zu awm a. A ropui ngawt mai. Mahse, chu ngawt chu a la tawk zo lo. Democracy ram kan ni a; Politics hi ka tui ve lo, ka line tur a ni lo kan ti a nih pawhin Vote kan thlak a ngai tho. Vote thlak ngei hi India khua leh tui ṭha nihna a ni bawk. Chuvangin, kan hnam lungphùm dik tak zawk ngaihtuah chungin, kan zalenna ṭheuh hmanga mi ṭha lo kan hnawl ngam zel hi a hun ta tak zet e.

- David Zochhuanmawia (Vida Hrahsel Saza)