BIBLE: UAR LOH TUR UAR ZAWK

Zofate hi Kristian vek kan lo ni ta ti ila a dik awm e. Mizo te hi ringtu ṭha tak kan ni hlawm a, kan ngaihtuahna tam tak pawh kan Kristiannain min hruai hle a, kan tu leh fate hming phuah danah te pawh a lang zel a ni. Pathian thu pawh hi kohhran kaih hnawih ni lem lo programme-ah te pawh kan sawi tel zel a, pawlho thiltih leh political party thiltihah te thlengin.

Hetiang a nih lai hian keini Mizote zingah hian Bible thu sawi uar loh tur zawk kan sawi ṭhin a awm fo mai a, hei hi ka ngaimawh ta riau mai a, Pulpit-ah vawi 3 zet chu ka sawi ta, chutih laiin, ka sawi lohna Pulpit a tam si a, kan la sawi zel dawn niin a lang a. Chu chu mihring dam kum thu hi a ni.

Kan Bible thu, Sam 90:10-ah hian Mosia ṭawngṭaina thu kan hmu a, hetiangin, "Kan dam chhung kumte chu kum sawmsarih a ni a, chakna avangin kum sawmriat pawh a ni thei e," tih hi.

Mosia ṭawngṭaina thu, Sam 90-a mi hi Bible ah seng luh a nih avangin kan sawi ṭhin a, a dik reng mai. Chutih lai erawh chuan, Gen. 6:3-ah hian, amah Pathian ngeiin heti hian a lo sawi daih tawh a, "Ka thlarau chuan mihring chu kumkhuain a bei reng lo vang, nimahsela, kum za leh sawmhnih chu an la dam ang," tiin.

A tir lama kan tarlan ang khan, keini Mizote hian, Pathian ngeiin a lo sawi, Gen 6:3 thu ai hian Mosia ṭawngṭaina hla, Sam 90:10 thu hi kan sawi zawkin, kan sawi zing bawk si hi a fuh lo deuh a ni. Mosia ṭawngṭaina hla hi Bible chhunga mi a nih tho laiin, amah Pathian ngeiin a lo sawi, Gen 6:3 thu hi sawi uar tawh zawk ila a ṭha ngawt ang.

Kan Pathian thu meuh, a uar tur zawk uar lo va, a uar loh tur zawk ni awm tak kan sawi fo hian Mizote kan rilru pawh min nghawng viau em ni ang, dam rei kan neih tam vak loh chhante hi ngaihtuah ila. Chutih laiin, ringtute kan ni a, kan Bible pawh kan belhchian lehzual a ṭha awm mang e.

Bible kan sawi tak rau rau chuan, keini Mizote hi mahnia Pathian thu chhiar leh inzir peih lutuk lo mi kan ni hlawm. Mi tam tak chu Pulpit aṭanga thuhriltute thusawiah kan innghat lutuk a, chu chuan, rinna kawngah kan ṭhan tur angin min ṭhantir lo va, mi tam tak chu kan chak tur angin kan chak loh phah niin a lang.

Mahniin kan Pathian thute hi chhiarin zir ṭhin ila, chu chuan kan nun a tichakin, kan fei rei thei zawkin a rinawm. Pulpit aṭanga Sermon supply-tu hi chu kan nei reng ang, thuhriltu ṭha tak tak thusawi pawh ngaihthlak tur kan nei zel turah ngai ila, chutih laiin mahni ngei Pathian thu chhiar a, inlak ngah hi tum ila, kan Kristian nun pawh a chakin, kan nghet rei zawk ngeiin a rinawm.

- Rev. Lalbiaksanga Chinzah